Lo Spellecchia

Lo Spellecchia, Napoli, pe Mechele Loise Muzio, 1709

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO III

SCENA PRIMMA

LESENA, e SCIADDEO.

LESENA

E a la padula cchiù non se nce penza,

1000

Vi’ se Porzia addo’ stace,

E di a scapizza cuollo, che mo’ propejo,

Se nne vaa sola sola,

A zappare lo riesto,

De chello po’ de terra,

1005

Ch’ajere pe la pressa;

Lassajemo de fenire;

Sapatella che resta,

Ca po le dico a bocca c’hà da fare.

E abbesuogno che penza,

1010

Scuressa me e la casa,

E l’ammore ch’è peo;

Copinto m’ha feruto, e no lo creo.

SCIADDEO

Uh e che femmena spremmuta.

Da che Patremo m’è tata.

1015

N’aggio visto nnammorata

Peo de chella allesenuta.

LESENA

E ancora te staje llo co? E non si’ Juto?

SCIADDEO

Mo’ nce vao.

LESENA

Saglie ncoppa, e dincello,

Non chiammare da vascio.

SCIADDEO

1020

Comm’è brutta, mme pare propejo n’ascia.

SCENA II

LESENA sola.

LESENA

Da che bedde Maritemo, e mme disse

Marame che se cchiune,

Face le guattarelle, lo Zefierno,

Mme traseva già ncuorpo;

1025

N’arrecetto cchiù niente.

Non penzo cchiù a sparagno,

Mme scordo de mangiare, se be’ magno.

So’ arreddutta che mazzeco, e sputo,

Cammino, e stornuto,

1030

Non saccio che fa,

Non so’ prena, e lo ventre mme sbatte

Da pietto lo latte,

Mme senco scolà.

SCENA III

TUFOLO e la stissa.

TUFOLO

Ora vi’ che m’è dato.

1035

Quanno maje mme penzava io sbentorato,

Che songo (e faccio male a diremello)

La copia de Mamma,

La stampa de Fracasso,

Lo figlio de Salemmo, e meza Tassa,

1040

De cadere a lo fuosso de Copinto,

E pe na Femmenella,

Che non saccio s’è femmena, o che d’è

Perdere nnitto fatto,

Chello ch’a spata tratta,

1045

Da mille e sessant’anne,

Mm’aggio abboscato nguerra, co servire,

Chisto, e chilli auto senza maje morire.

LESENA

Janca me chisto è Tufolo,

Se lo sa farfariello, io songo juta.

TUFOLO

1050

Veccola cca, mio bene,

Bennaggia craje matino tu cca staje?

Votate, e tienemente a chi pe tene

Fa spotazzella, e n’arrecetta maje;

Che t’aggio fatto ne core de Torca.

LESENA

1055

Vattenne sto propejo desperata.

TUFOLO

Chesso che faje che d’è?

LESENA

Nce lo potesse dicere a lo manco.

TUFOLO

Sienteme na parola,

Potesse a lo mmacaro,

1060

Nzerrà lo matremmonio,

De li Patrune mieje, mo’ che sta sola.

LESENA

Mo’ mme nce voto, e bia,

Ma no Lesena penza,

Ca lo si farfariello, e trase ncuorpo.

TUFOLO

1065

Core mio.

LESENA

Sciato doce,

Mara me c’aggio ditto.

TUFOLO

Secoteja.

LESENA

Mme ne scolo chiano chiano.

TUFOLO

Comme te si’ sbotata?

LESENA

Vattenne cca sto propejo desperata.

TUFOLO

1070

Cana, che t’aggio fatto.

LESENA

Arrassate da me.

TUFOLO

Votate ca mo’ schiatto.

LESENA

Mimiao, e saje che d’è. (va via Lesena. Resta Tufolo solo.)

TUFOLO

A me st’aggravio (de pressa.)

1075

St’aggravio a me.

Chiammatela,

Arrivatela,

Fermatela,

Afferratela,

1080

Tenitela,

Acceditela,

Oh dio, che dico che. (Amoruso.)

Ah core de na pimmece,

Collaro senza posema,

1085

Banchetto senza museca,

Vajassa senza cotena,

Sorbetta senza zuccaro,

Caudara senza trepete,

Teano senza maneca,

1090

A me st’aggravio ne. (de pressa.)

No nc’è che dicere,

La voglio accidere,

Spaccà lo fecato

Sbentrà lo stommaco,

1095

L’uuosso majuscolo,

Le bene mascole,

Ohimè teniteme,

Che faccio che.

SCENA IV

SAPATELLA, PORZIA, e lo stisse.

PORZIA

Tufolo addove curre?

SAPATELLA

1100

Fermate che t’è dato?

TUFOLO

A me st’agravio,

St’agravio, &c.

PORZIA

Se pò sapè, che male t’è benuto.

SAPATELLA

Te potimmo ajutare a quaccosella.

TUFOLO

1105

Fortuna, che pe me sei troppo fella.

No nc’è che dicere, &c.

PORZIA

Siente cca.

SAPATELLA

Chiude l’uuocchie pe la porva.

TUFOLO

Bennaggia quanno maje ve pare niente

PORZIA

È bero frate mio, ma che nce faje.

SAPATELLA

1110

Che t’ha fatto, chi è stato?

PORZIA

Parla co mmico.

SAPATELLA

Dillo a mene, e bia.

PORZIA

Cchiù priesto lo confida a Porziella.

SAPATELLA

Spapura.

PORZIA

Via trascurre.

SAPATELLA

Quanno.

PORZIA

Priesto.

SAPATELLA

Lassalo.

PORZIA

No lo lasso, se non parla.

TUFOLO

1115

Ente caudo che sentono ste doje?

Quanto che d’è, che d’è,

Pe lo secunno Ammore,

Lassarraggio lo primmo. Ajemmè lo Core.

PORZIA

Core de Porziella,

1120

Non t’arraggiare no,

Jere na pecorella,

E te scatine mo’.

TUFOLO

Orzù non ne fia cchiune,

Tutto lo male appriesso a essa, e bia.

PORZIA

1125

Femmena addonca è stata?

Ste femmene, ste femmene

SAPATELLA

Ste femmene fratiello,

Fanno j cchiù de n’Ommo a razzaviello.

TUFOLO

E bi’ che n’è lo vero.

PORZIA

1130

Saccio ch’è Mamma, e fegno.

SAPATELLA

Co Mamma l’ave avuto;

Chella è na pazza, e chisto è nzallanuto.

TUFOLO

Parlammo a nnuje, de Rienzo, e de Fonzillo

Nuje che facimmo?

PORZIA

Comme?

1135

Che t’ha ditto Fonzillo.

SAPATELLA

Che t’hà ditto de me Rienzo, spapura.

TUFOLO

Chiano patrone meje,

No nce jammo mbroglianno,

Ca vuie pe quanto veo,

1140

Tutte doje mme parite,

Assaje caude de rine, e io trovare,

Mmiezo no mme vorria,

A qua ruotolo scarzo,

Sacciate ca pe buje, ahaje che dolore,

1145

Rienzo s’ascevolesce, e pe buje more.

PORZIA

Tienelo a mente, ch’io,

Po te do la resposta nauta vota,

Ch’aggio da j a sbrecare,

Lo riesto de chell’auto po’ de terra,

1150

Ch’aggio lassato de zappa mo’ nnanze,

E Mamma pe Sciaddeo,

Mme l’ha mannato a dicere.

TUFOLO

Siente cca non foì.

PORZIA

Po nce vedimmo,

Ntrebbonale, e dell’auto parlarrimmo.

TUFOLO

1155

Ente pressa, che porta,

E Uscia, che bo’ che dica,

A Fonzo, che m’aspetta,

È sciamme da la vocca, e l’uuocchie jetta?

SAPATELLA

Vattenne, e dille, ch’io,

1160

Nce voglio penzà buono,

E mo’ mo’, che te manna,

Ca te do la resposta d’ogne cosa.

TUFOLO

Orzù accosì restammo?

SAPATELLA

Vattenne.

TUFOLO

Nce vonno a li guaje mieje st’aute facenne.

SAPATELLA

1165

Sapesse ch’aggio fatto a la fortuna,

Che pe me n’ave n’ora de buon tempo,

Se manco fosse nata,

Pe campare a lo munno desperata.

Songo Ammore, e la fortuna,

1170

Pe mme fatte duje teranne,

E se pene mme dà l’una,

Mme dà l’auto porzì affanne.

SCENA V

FONZILLO, e la stissa.

SAPATELLA

Che buoje?

FONZILLO

Ssa grazia toja.

SAPATELLA

Vota vico.

FONZILLO

Non tanto.

SAPATELLA

Che pretienne.

FONZILLO

1175

N’occhiatella, no riso, o che mme mpienne.

SAPATELLA

Tu che dice?

FONZILLO

Pe te bella so’ muorto.

SAPATELLA

L’erva che no vorria, me nasce all’Uuorto.

FONZILLO

Videme.

SAPATELLA

T’aggio visto.

FONZILLO

Che te pare de st’arma?

SAPATELLA

È meza strutta.

FONZILLO

1180

De sta facce che chiagne?

SAPATELLA

Sta lo bascio.

FONZILLO

De sta voccha ch’è juta.

SAPATELLA

N’è cchiù vocca.

FONZILLO

De sto core nciajato?

SAPATELLA

È quase pazzo.

FONZILLO

De sto naso peruto.

SAPATELLA

Jetta sciamme.

FONZILLO

De sta lengua speruta?

SAPATELLA

Cerca ajuto.

FONZILLO

1185

E mbè?

SAPATELLA

Che buoje da me?

FONZILLO

Bella so’ muorto.

SAPATELLA

L’erva, che no vorria, mme nasce all’uuorto.

FONZILLO

Tradetora.

SAPATELLA

Seggia seggia.

FONZILLO

No mme scappe.

SAPATELLA

E saje che d’è.

FONZILLO

Sapatella.

SAPATELLA

Presentuso.

FONZILLO

1190

Facce bella.

SAPATELLA

Pedocchiuso.

FONZILLO - SAPATELLA

V(†) sulo a te.

Voglio bene,

V(-) ma no a te.

SCENA VI

FONZILLO sulo, e po RAZULLO.

FONZILLO

A lo scuoglio de li guaje,

1195

Songo dato già de pietto;

E annegato lo vasciello,

De sto core poveriello,

Dinto all’onna de lo Mare,

N’hà speranza d’afferrare

1200

Cchiù marina d’arrecietto.

SPELLECCHIA

Sio Fonzillo, ch’è stato,

Uscia non stace nzé;

Fosse ca Sapatella,

Non te vo’ bene propejo?

1205

Sia accisa essa, e la mamma,

E tu mme stinche buono.

FONZILLO

Ah Razullo Razullo,

Se co lo core mio parlasse tu;

Non derrisse accossì.

SPELLECCHIA

1210

È beretate, lo canosco io puro.

FONZILLO

Che ma? Songo muorto.

SPELLECCHIA

Nfunno de maro sia jettato, zitto,

No lo dicere cchiune,

Pozza morì lo ciuccio.

FONZILLO

1215

Che pozzo cchiù sperare,

Se pe te, che potive fare tanto,

Manco nne fice niente.

SPELLECCHIA

È tosta, quanto tuoste so’ li diente.

FONZILLO

Che farraggio?

SPELLECCHIA

Scordatenne.

FONZILLO

1220

Non sia maje.

SPELLECCHIA

Pensace buono.

FONZILLO

Songo juto.

SPELLECCHIA

Si’ n’Antuono.

Frate mio se no mme ntienne.

FONZILLO

Che farraggio.

SPELLECCHIA

Scordatenne.

SCENA VII

SAPATELLA, e RAZULLO.

SAPATELLA

Affé ch’è zoffonnato,

1225

Bene mio ca m’havea propejo nfettato;

Razullo.

SPELLECCHIA

Che decite.

SAPATELLA

Tu che pienze?

SPELLECCHIA

Che bo’ penzà no povero scasato.

SAPATELLA

Lo canosco ca pienze.

SPELLECCHIA

Penzava Sissegnore,

1230

E penzava ca vuje,

Se volite sentirelo,

Site tosta cchiù assaje, che n’è la ncunia.

SAPATELLA

Siente Razullo mio

Quanno l’ommo, che piglio pe marito

1235

No mme vace a lo genio, io no lo voglio,

Cchiù priesto mme contento,

(E te nne jorarria pe nzi’ a la vita)

De fareme a la casa vecchia Zita.

SPELLECCHIA

Ma non saje, sempe è buono

1240

(La voglio scanagliare.)

SAPATELLA

Che buoje che saccia. A tene,

E a nullo cchiù a sto munno, voglio bene.

SPELLECCHIA

A mene?

SAPATELLA

A tene sì, che nce faje scrupolo?

M’haje tanta, e tanta grazeja,

1245

Che no mme haverria Patremo, o mamma,

Te voglio pe Marito,

Damme la mano.

SPELLECCHIA

A me?

SAPATELLA

Quanno te sbriche?

SPELLECCHIA

Chesta è essa. Mo’ vene Rienzo a tiempo.

SAPATELLA

No lo dicere ancora a mamma mia,

1250

Né a nesciuno, ca po parlammo, addio. (via.)

SPELLECCHIA

Fa che buoje ca lo sango,

Sempe fa de le soje.

SCENA VIII

RIENZO, e RAZULLO.

RIENZO

A lo juuoco de l’ombra, lo core

Da no piezzo se passa co Ammore,

1255

E na basa de gusto non hà.

Pozzo avere pe nzi’ a la spatiglia,

Ch’isso sulo na Donna che piglia,

Quanno vole codiglio me fa.

SPELLECCHIA

Annevina, che bo’ st’auto scasato,

1260

Ma no mme mporta niente,

Ch’a tutte duje mo’ mo’ voglio nzorare,

E farele accojetare.

RIENZO

Vedesse quacche d’uno,

Pe sapè se Sciaddeo,

1265

M’ha ditto la boscia, o veretate,

Ca Porzia è a la padula.

Razullo tu staje cca? Commo no iste,

A zappare co Porzia tu porzì?

SPELLECCHIA

N’ha besuogno de me, c’ha bone vraccia.

RIENZO

1270

Addonca è beretate.

Co no zumpo mo’ propejo le so’ ncuollo.

Ente marmoria c’aggio,

Razullo te so’ cuoco

E abbesuogno, che torna mo’ a la casa.

SPELLECCHIA

1275

Vattenne a la bon’ora.

RIENZO

No sta cojeto maje chi se nnammora.

Fa che buoje che da lo core,

Maje l’ammore,

Se pò scrastà,

1280

È na spezie de zecchetella,

Che pastato nzi’ a le bodella,

Mette radeca, e chiuso sta.

Che nne sa chella mo’, ch’io le so’ tata,

E de l’Ammore sujo me dà la fede

1285

Mme vole pe marito, e se lo crede.

SCENA IX

PORZIA sola a la padula, e a la via po RIENZO.

PORZIA

Chill’aucelluzzo,

Che ba volanno,

Pe ncoppa all’urmo,

Cantando dice,

1290

Core nfelice,

Spera chi sa;

Chell’erva bella,

Che verdolella,

Ncoppa a lo prato,

1295

Posata sta,

Decenno va,

Core mchiajato te puoje sanà.

RIENZO

L’aggio azzertata affé, veccola llane,

Porzia mia, vide Rienzo.

PORZIA

E mbe’ che d’è?

RIENZO

1300

Comme che d’è, n’haje propejo cortesia

Torca de Varvaria,

De chi more pe te.

PORZIA

Chesta è la via,

Vattenne, e no mme dare cchiù tormiento.

RIENZO

Sienteme.

PORZIA

Frate mio parle a lo viento.

RIENZO

1305

Quanno t’ammollarraje.

PORZIA

Spero, che maje.

RIENZO

Si’ de preta, o che si’?

PORZIA

Bonnì bonnì.

RIENZO

Muovete a caretà.

PORZIA

Lasseme sta.

RIENZO

Core d’urzo.

PORZIA

Vavattenne.

RIENZO

Vi’ ca moro.

PORZIA

Crepa, e schiatta.

RIENZO

1310

Non te lasso se mme mpienne.

PORZIA

Vene Mamma, appila, sfratta.

SCENA X

RIENZO sulo.

RIENZO

Cana t’arrasse,

T’arrasse sì,

E st’arma lasse,

1315

Pe non sentì.

Dimme spietata,

Spietata sì,

Chi gnenetata,

T’ave accossì,

1320

Torna a benire,

Sienteme cca.

Mme faje morire,

Senza pietà;

Chesso lo faje,

1325

Lo faje pecché,

Pecché non haje,

Pena de me,

Non viene ancora,

Non viene ne,

1330

Nnanze che mora,

No mme lassà.

SCENA XI

SCIADDEO sulo, e po TUFOLO.

SCIADDEO

Quanta ne fa sperì sta casa nosta?

Ogn’uno che l’adocchia,

Vo’ falo sì pichiochia, e co la mazza,

1335

Li guante rutte, e le gammelle spase

Vo’ fa lo si Cafeo, tozzola, e trase.

Se le conto a uno a uno,

So’ domilea e trent’uno

Sei via nove, e binte tre,

1340

Chisto chiagne, chillo more,

Chisto dice oh dio lo core,

E nesciuno penza a me.

TUFOLO

Sciaddeo pe te trovare.

N’aggio lassato pizzo.

SCIADDEO

1345

S’a tre cavalle l’uno,

A uso de nzalata,

Se vennessero tanta nnammorate,

E trasessero a me li tre cavalle,

Io creo ca n’enchiarria,

1350

Tutta sta chiazza, e manco abbastarria.

TUFOLO

Che d’è, mme puorte collera:

No m’aje data resposta.

SCIADDEO

Che te voglio responnere,

Quanno pe te è mancato,

1355

De mme parlare.

TUFOLO

Orzù nonne sia cchiune,

Dimme na cosa, e lassa fare a mene.

SCIADDEO

No confietto zocato no mme manca,

Spapura.

TUFOLO

Io creo ca sacce,

La quale mente cosa, e ba scorrenno.

1360

Ch’io songo

SCIADDEO

Quanno parle?

TUFOLO

Ch’io songo

SCIADDEO

Dillo priesto.

TUFOLO

Ch’io songo Mo’ te dico,

Te rentienne de freve,

De pepitola mmocca,

1365

De stommaco sbottato.

SCIADDEO

Pecché?

TUFOLO

Pecché tu dice!

Se sapisse de stera frate mio

Saparrisse, ch’io povero scaduto,

Pe na femmena donna so’ mpazzuto.

SCIADDEO

1370

Saccio ca tu vuoje bene

A la Patrona mia.

TUFOLO

E a te chi te l’ha ditto?

SCIADDEO

Lo fecato.

TUFOLO

Sciaddeo tu si’ mmal

Io creo ca farfariello tiene ncuorpo.

SCIADDEO

1375

Nzomma che s’ha da fare?

TUFOLO

Sapisse frate mio, che l’aggio fatto,

Che no mme tene mente?

SCIADDEO

Da che Razullo frate mio le fice,

Vedere lo marito

TUFOLO

E mbe’ che d’è,

1380

No lo vedette io puro?

SCIADDEO

Che pe chesso,

Se no la lasse ire, e cchiù nce parle;

A te puro no juorno,

Comme disse Spellecchia,

Pegliarrà farfariello.

TUFOLO

Vi’ ca mme gabbe.

SCIADDEO

1385

Tie che cellevriello.

TUFOLO

E io no lo sentiette

Marommene, e che dice

So’ propejo no pechiochia,

Mo’ sì ca non nce parlo,

1390

Addonca avea raggione,

Mo’ nnanze de votareme le spalle, e se ne ire.

SCIADDEO

N’avea raggione cierto.

TUFOLO

Mme ne jarria mo’ propejo a no desierto.

Vuocchie mieje, che siate accise

1395

E pecché ve state affitto,

Pe seje anne, e cinco mise,

Voglio chiagnere mo’ schitto.

SCENA XII

LESENA, e li stisse.

LESENA

Tufolo core mio.

TUFOLO

Lesena addio.

LESENA

Ma che dico.

TUFOLO

Che faccio.

SCIADDEO

È nzallanuta.

LESENA - TUFOLO

1400

Se lo sa farfariello, io so’ speduto.

LESENA

È possibbole io mo’, che no nce parla?

TUFOLO

È possibbole io mo’ che no la vea?

LESENA

Quanno la scumperraje fortuna mia?

TUFOLO

Quanno t’accojetarraje? sorte mmardetta.

LESENA

1405

Se fosse de macigno.

TUFOLO

Se fosse de mautone.

LESENA

Puro le deciarria na parolella.

TUFOLO

Puro le jettarria na scarolella.

LESENA

Tufolo core mio.

TUFOLO

Lesena addio.

LESENA

1410

Ma che dico.

TUFOLO

Che faccio.

SCIADDEO

È nzallanuta.

LESENA - TUFOLO

Se lo sa farfariello, io so’ speduta.

LESENA

Siente No Vavattenne.

TUFOLO

Parla Sì Statte zitto.

LESENA

TUFOLO

E tu so’ perzona sengolare.

LESENA

1415

Mo’ te dico.

TUFOLO

Aggio ntiso.

LESENA

Vascia l’uuocchie.

TUFOLO

Va llà.

LESENA

Non t’accostare.

TUFOLO

Penza buono a che faje.

LESENA

No mme parlare.

TUFOLO

Sputa a n’auto pontone.

LESENA

Stornuta a n’auto pizzo.

TUFOLO

1420

Allargate.

LESENA

Mm’arrasso, o che tormiento.

TUFOLO

Ammarra l’uuocchie.

LESENA

L’aggio commogliate.

TUFOLO

No mme tenere mente.

LESENA

Non te nimiro.

TUFOLO

Ammafara la vocca.

LESENA

Cchiù non parlo.

TUFOLO

Non te movere niente.

LESENA

Songo affitto.

TUFOLO

1425

Abbenta co le mano.

LESENA

So’ abbentata.

TUFOLO

Statte teseca.

LESENA

È fatto.

TUFOLO

Ahje fiero duolo.

Mo’ parimmo li quatto de lo muolo.

LESENA

Tufolo core mio.

TUFOLO

Lesena addio.

LESENA

1430

Ma che dico.

TUFOLO

Che faccio.

SCIADDEO

È nzallanuta.

LESENA - TUFOLO

Se lo sa farfariello, io so’ speduta.

LESENA (sola.)

Zorfariello mmaleditto

Tu nce curpe a tanta guaje,

Che te fa sto core affritto,

1435

Che no sfizio no le daje.

SCENA XIII

RIENZO, e FONZILLO.

RIENZO

Fonzillo mio, che sciorte è chesta nosta,

Io creo, che da che asciette lo Narciso,

Caso peo de lo nuosto non s’è ntiso.

FONZILLO

Vide che stravaganza,

1440

Voglio bene a chi bene vole a tene,

E chella, che buoje tu, vo’ bene a mene.

S’avesse chianto,

Pe nauta tanto,

Manco storduta,

1445

Sarria pe me,

Quanno cchiù strillo,

Ca so’ Fonzillo,

Tanto cchiù muta,

Non saje che d’è.

RIENZO

1450

Veramente, è accossì? Dimme na cosa,

A che nce resorvimmo?

FONZILLO

Jammo a bocare tutte duje no rimmo.

RIENZO

Comm’addicere.

FONZILLO

Ammore,

Già che nnemico a ttutte, duje se mosta,

1455

Lassammole a bon’ora,

Scordammoncenne, e jammoncenne fora.

RIENZO

Vejato a te, che lo porrisse fare.

FONZILLO

Ma che buoje, che te dica frate mio,

Saje che bo’ di crepare,

1460

Co na femmena tosta cchiù de preta.

RIENZO

Comme so’ cane.

FONZILLO

Orzù statte cojeto,

Nanta cosa nce faccio, e po bonnì,

Voglio ire co Razullo,

Isso le parla, e io stongo a sentire,

1465

Chi sa fuorze mancasse,

Pe chi non sa parlare de lo guajo nuosto.

RIENZO

Fa che buoje ca lo ligno è sempe tuosto.

SCENA XIV

PORZIA, e RIENZO.

PORZIA

Fonzo Fonzo addo’ curre.

RIENZO

Eccome ccane.

PORZIA

E sempe pe dananze

1470

Mme vene chi non voglio. Ah ca lo cano,

M’ha bisto, e se n’è juto.

RIENZO

Porzia mia so’ speduto,

Io non trovo arrecietto,

Sempe che penzo a tene,

1475

Mme senco venì manco.

PORZIA

Ente che pena.

RIENZO

Mo’ che la sciorta mia

T’ha mannato cca sola,

Ammollate no poco

Agge pietà de ll’arma, ch’è nnozente.

PORZIA

1480

Nce pierde le Parole, e non faje niente.

RIENZO

Chi te deze lo latte

Da qual’Urzo si’ schiusa

Teranna, che pe me maje no ce siente.

PORZIA

Nce pierde le parole, e non faje niente.

RIENZO

1485

Me t’addonocchio nnanze,

Piglia sta mazza, e accideme,

Spaccame l’arma mpietto

Ca puro so’ contento,

S’a te che mme daje morte, moro rente.

PORZIA

1490

Nce pierde le Parole, e non faje niente.

RIENZO

Torname a lo mmacaro

Lo Core, già ch’ammare no mme puoje.

PORZIA

Chesto sì ca lo faccio se lo buoje.

Iesce fora, chisto è isso,

1495

Pigliatillo, eccolo cca.

Ente core caperrone

Steva mpietto, e lo patrone

Non senteva gualejà.

RIENZO

Pozzo fare, che boglio,

1500

Che appriesso a sta teranna sconoscente

Nce perdo le parole, e no mme sente.

Chella e mbe’ che t’ave ditto

Core affritto,

Che de te non hà pietà.

1505

Ma tu oh dio non si’ chiù core,

E pe tanto, e tanto ardore

Arzo manco saje parlà.

SCENA XV

SAPATELLA co li panne lurse pe lavarele a la fontana dello Ullo, e po RAZULLO, e FONZILLO.

SAPATELLA

Chest’auto nce voleva

A scura Sapatella.

1510

Pe lavare tanta panne

Non m’abbastano sett’anne,

E gnamamma le bo’ mo’.

Bene mio venesse pure

Mo’ Razullo ca securo

1515

Nce vorria parlà no po’.

FONZILLO

Dico la veretà ca no arrecetto,

Ma zitto, eccola cca.

SPELLECCHIA

So’ sbregognato.

FONZILLO

Parlale mprimmo tu,

Ch’io stongo a sto pontone, e se mme pare,

1520

De parlarence io po, nce parlo io puro.

SPELLECCHIA

T’aggio ntiso Ma penza.

FONZILLO

Che buoje di’.

SPELLECCHIA

Ca se vene

FONZILLO

La mamma?

N’avè paura, ch’io da cca te chiammo.

SPELLECCHIA

Vuoje cchiù fortuna mia, si arrecettata,

1525

Che pe gusto d’Ammore, ch’è no cano,

Nzi’ a lo patre ha da fa lo roffiano.

FONZILLO

Sta attiento, e parla buono,

Dille ca l’arma mia, non sa che è riso.

SPELLECCHIA

(Meglio sarria pe me, che fusse acciso.)

1530

Sapatella.

SAPATELLA

Segno’: chi t’ha mannato

Pe ste bie sulo, sulo,

Songo io, o no song’io?

Singhe lo bemmenuto frate mio.

FONZILLO

Ajutame fortuna.

SPELLECCHIA

1535

So’ benuto cca sulo

Pe direte, e fa cunto

Comm’io te fosse patre,

Ca te voglio dà Rienzo pe marito.

SAPATELLA

Ma patre no mme si’.

SPELLECCHIA

Te songo patre,

1540

Ca patre te pozz’essere.

FONZILLO

Viva Razullo.

SAPATELLA

Ste chiacchiere a che servono,

Mme si’ marito, e se te l’allecuorde,

Mo’ nnanze mme nne diste la parola.

FONZILLO

Scazza mme delleggiava lo frabbutto.

SPELLECCHIA

1545

Io marito?

SAPATELLA

No chiù, sbrigate, e bia

Damme la mano.

SPELLECCHIA

Vide

SAPATELLA

Tu che dice?

SPELLECCHIA

Fonzillo

FONZILLO

Tradetore.

SPELLECCHIA

Siente

SAPATELLA

Priesto.

SPELLECCHIA

Te songo patre

SAPATELLA

È fenzejone.

FONZILLO

Voglio

Cacciarele lo core co sta mazza. (Esce fora.)

1550

Razullo jere tu chillo,

Che mme volive fa l’ammasciatore?

Frabutto tradetore,

Non me gabbe cchiù no, chisto è lo premio

De le fatiche toje?

SAPATELLA

Soccurzo, ajuto,

1555

A tiempo a tiempo mamma co Sciaddeo;

Corrite.

SPELLECCHIA

Io tradetore.

Fatt’a reto.

FONZILLO

Te voglio acconcià buono.

SCENA UTEMA

LESENA, SCIADDEO, PORZIA, TUFOLO, FONZILLO, e li stisse.

LESENA

Bell’ommo, e che creanza è chessa c’aje?

Ferniscela.

SCIADDEO

1560

Na preta, oh dio na preta.

LESENA

Che d’è tanta fracasse.

RIENZO

Ch’è stato, che cosa è? manco fernite.

PORZIA

Scompitela.

TUFOLO

No cchiù ca se mme nzorfo.

SPELLECCHIA

Orzù, giaché lo Cielo

1565

M’ha portato a bedè tanta rummure,

Sacciate, ch’io so’ propejo,

E beccone l’esempio sano, e bivo.

Spellecchia. (Se leva la vareva apposticcia.)

LESENA

Ianca mene.

Razullo era maritemo,

1570

Comme farraggio, comme?

SCIADDEO

E faceva l’astroleco de chiune.

PORZIA

So’ de sasso.

SAPATELLA

De preta.

RIENZO

C’aggio ntiso.

FONZILLO

So’ Fonzillo, o chi so’?

TUFOLO

Mo’ songo mpiso.

SPELLECCHIA

E azzò che p’allegrezza

1575

Cca so’ benuto, e v’aggio ditto chillo,

Che songo, e quanto fice;

A Lesena co Tufolo perdono

De Rienzo che sia Porzia,

Sapatella de Fonzo.

SCIADDEO

1580

Bene mio, e che beo.

TUFOLO

E nuje nce nguadiammo co Sciaddeo.

SCIADDEO

Orzù pe l’allegrezza

Voglio saglì a la casa

Pegliare la ntrezzata,

1585

Che nce restaje da carnevale sciuto,

E co na sonatella, e na cantata

Fare ncommerzione n’abballata.

RIENZO

Porzia mia si’ contenta?

PORZIA

Pe gusto ch’è benuto gnore tata,

1590

Lo core te darria, se lo volisse.

FONZILLO

E tu.

SAPATELLA

Pe l’allegrezza

De Tata, te darria porzì lo sango.

SPELLECCHIA

Lesena mia che dice?

LESENA

Che boglio di’, mme sengo addecreata. (Esce Sciaddeo.)

SCIADDEO

1595

Allegramente, chesta è la ntrezzata.

TUTTE

Sona sona la Tarantella

Rienzo è fatto de Porzejella.

Co Pestato vecino è lo Ullo

Sta co Lesena Razullo.

1600

Sta da rasso Palazzo, e Forcella

Fonzo è fatto de Sapatella.

Sto a lo Ullo, e lo Maro non veo

Sta co Tufolo Sciaddeo.