Opera Buffa Napoli 1797 - 1750
  
  
 Lo Spellecchia, Napoli, pe Mechele Loise Muzio, 1709
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO II
 
 SCENA PRIMMA
 
 SAPATELLA, PORZIA, e RAZULLO.
 
 SAPATELLA
 Io non saccio che d’è,
 M’have na grazia st’Ommo,
 Che le darria porzì lo core mio.
 PORZIA
 Fosse Mago, che dice?
545E io se mme cercasse,
 La cammisa, che tengo,
 Porzì nce la darria de bona voglia.
 SAPATELLA
 Annevina che d’è?
 PORZIA
                                     Se non nce mbroglia,
 È Ommo de lo Cielo sciso nterra.
 SPELLECCHIA
550Sarria na grossa cosa, (a parte.)
 E ste fegliole meje,
 Non fossero ncappate porzì lloro
 A lo bisco d’ammore?
 SAPATELLA
 Le darria quanto aggio.
 PORZIA
555Io mo’ lo mettarria dinto a lo core.
 SAPATELLA
 
 Na sencopia,
 Mme nc’è benuta,
 Che le farria,
 Nzi’ a la Zetella.
560La menestrella
 L’acqua volluta.
 
 PORZIA
 
 So duje pasticcie.
 Chill’uuocchie ardite,
 Che traseticce,
565Nigre, e rotunne,
 Pe nzi’ a li funne,
 So’ saporite.
 
 SPELLECCHIA
 È zierto che de me parlano ncocchia,
 Ma che sacciano ch’io le songo Patre,
570N’è possibbole maje,
 Le lassaje peccerelle,
 Ch’a malapena l’uuocchie,
 Aprevano qua bota pacca pacca
 E mmano me facevano la cacca.
 SAPATELLA
575Razullo?
 SPELLECCHIA
                   Eccome cca.
 PORZIA
                                           Comme nc’è sente.
 SAPATELLA
 Siervence buono, e statte allegramente.
 SPELLECCHIA
 Farraggio quanto pozzo,
 Pe servireve sempe, e no sgarrare.
 PORZIA
 E nuje che simmo aggente,
580De na casa ch’è bona, e aggraziata
 Te stemmarrimmo sempe comme a tata.
 
 SCENA II
 
 FONZILLO, RIENZO, e li stisse.
 
 SPELLECCHIA
 Eccote l’auto mbruoglio.
 RIENZO
 Bella se tu non mmamme io morarraggio.
 PORZIA
 
 Non dubbetare,
585Te voglio ammare,
 Spera spera fuorze chi sa;
 Vuoje cchiù da me? che pozzo fare,
 Chiagne chiagne, e lassame sta.
 
 RIENZO
 Agge pacienzia, e crepa affritto core.
 FONZILLO
590Agge pietà de chi pe te se more.
 SAPATELLA
 
 Quanto cirche, tanto spera,
 E pe me sospira assaje,
 Chiagne mo’, c’haje mala cera,
 Ca no juorno ridarraje.
 
 SPELLECCHIA
595Chesso mporta a lassà le femmenelle,
 So a lo prencipio de le Guattarelle.
 FONZILLO
 
 Songo auciello ncappato a lo bisco
 Na sghizza de frisco,
 No nc’è cchiù pe me,
600N’aggio pizzo de cuorpo saniccio,
 Pe me no pasticcio,
 De gusto no nc’è.
 
 SPELLECCHIA
 So’ chiacchiere, le femmene,
 Che so’ peo de na funa nfracetata
605No juorno che le lasse senza te
 Te la fanno porzì se fusse re.
 RIENZO
 
 Se pienze ca te lasso,
 Teranna è banetà;
 Vedarraje mprimmo l’auciello,
610Ì pe l’aria senz’ascelle,
 Lo Garofano fetire,
 L’arco cchiù non comparire,
 Cammenare nzi’ a lo sasso,
 Ch’io te pozza abbannonà.
 
 FONZILLO
615Bell’Ommo stisse tune,
 Co Lesena, la Mamma,
 De ste fegliole?
 SPELLECCHIA
                               Gnoressì, pecchene.
 RIENZO
 Pecché porrisse, co no bello muodo,
 Ajutarence a fa sto Matremonio.
 FONZILLO
620E nuje, se nce prommiette de lo fare,
 Pe nzi’ a lo core, te volimmo dare.
 SPELLECCHIA
 Stateve allegramente, e jatevenne,
 Ca se mme vene fatto,
 Spero de contentare tutte duje;
625Uscia comme se chiamma?
 FONZILLO
 Fonzillo, e borria propejo Sapatella.
 SPELLECCHIA
 E uscia?
 RIENZO
                   Me chiammo Rienzo,
 Borria Porzia se volesse.
 SPELLECCHIA
 Iatevenne, e lassate fare a me.
 RIENZO
630Se nce vuoje decrejare stace a te.
 
 SCENA III
 
 RAZULLO sulo.
 
 SPELLECCHIA
 Io creo ca se revuote,
 Lo Munno sano sano,
 Non puoje trovà cchiù peo,
 Mmalora brutta fatta,
635Male iuorno ncopennio, de moglierema,
 E porzì la fegliola antecolella,
 Bene mio l’aggio asciata,
 Co russo, riccietielle, e nnammorata.
 
 Comm’a miccio a la serpentina,
640Co la femmena s’hà da sta;
 Se te sferra pe na manna,
 A Cornito se fa a trovà.
 
 SCENA IV
 
 LESENA, e SCIADDEO.
 
 LESENA
 Si’ stato a la Padula.
 SCIADDEO
                                       Songo stato.
 LESENA
 Aje devacata, tutta la monnezza.
 SCIADDEO
645Na vota, e meza, e mme ne so’ benuto.
 LESENA
 L’aje posta addo’ te disse.
 SCIADDEO
 L’aggio posta a li vruoccole, e le foglia.
 LESENA
 Nc’era viento.
 SCIADDEO
                             Pecché?
 LESENA
                                              Pecché lo viento,
 S’è spotestato, miezo lo terreno,
650De la Padula mia, se pò portare,
 E a chillo che le faje?
 SCIADDEO
                                         Na secotata;
 Chi è pazzo se la piglia co lo viento,
 Lo viento, quanno è biento, è sempe viento.
 
 E abbesuogno che nce la dica,
655Schiatto, o crepo la veretà, (a parte.)
 Patrona si’ na lesena, (nfaccia, e de pressa.)
 N’abramma nquintassenzia,
 Spezeca mprimmo capete,
 Na roseca,
660N’arzeneca,
 No spicolo,
 N’arucolo,
 La vera canetà.
 
 LESENA
 
 Forfantone.
 
 SCIADDEO
 
                         C’aggio ditto.
 
 LESENA
 
665No la scappe cchiù da me.
 
 SCIADDEO
 
 Pe sta vota schitto schitto
 No mme dare.
 
 LESENA
 
                              Maro a te. (Secotato che l’ha no piezzo, po dica la stessa Lesena.)
 
 Te te chi fa de l’Ommo,
 Che fa de l’Ommo te;
670Ammennola de Marzo,
 Ruotolo, e miezo scarzo,
 Parentese vestuta,
 Formicola scelluta,
 Cotena de vajassa,
675Retaglia de focile,
 Museco senza pile,
 Scampolo de nocelle;
 Reillo senz’ascelle,
 Tu me la paghe affé.
 
 SCENA V
 
 TUFOLO, e lo stisso.
 
 TUFOLO
680Signa Lesena mia, che ve sentite?
 Uscia, no stace nzé.
 LESENA
 L’aggio co sto fraschetto.
 SCIADDEO
 Faciteme na jostizia,
 Vedite de nuje duje chi a cchiù raggione.
 LESENA
685Raggione? e che raggione,
 Te mmierete forfante, anemalone.
 TUFOLO
 Trascurre, ca te senco.
 SCIADDEO
 L’aggio chiammato Lesena
 Arzeneca, spezeca,
690Spicolo d’aglio assottegliato, e essa,
 Mme vo’ accidere propejo,
 Vedite s’ha raggione,
 De pegliarese collera co uno,
 Che la chiamma pe nome.
 TUFOLO
695Signa Lesena mia fatte a corejere,
 Tiene le mmano a te.
 LESENA
 Che m’ha chiammato lesena, va buono,
 Ma spezeca.
 TUFOLO
                         Spezeca? Ah Malantrino,
 Te mmierete n’abbuffo;
700Abbotta ste mascelle;
 Piezzo de cata piezzo, e non parlare;
 Questa è mia donna, e l’haje da respettare.
 SCIADDEO
 So’ lesto, eccome cca,
 Lo Cielo se lo bede,
705S’avesse mamma mo’ n’abboscarria.
 LESENA
 Malan che di te dia. Che buoje che dica
 Io songo na frustata,
 Na femmena de niente,
 Che te pegliaje pe caretate, e mone,
710Io so’ la servitrice, e tu patrone.
 TUFOLO
 
 Core bello non t’arraggiare,
 Non t’affriere tanto no:
 Ca l’arraggia te pò schiattare,
 Puoje morire de subeto mo’.
 
 LESENA
715È grazeiuso propejo bello, e buono.
 SCIADDEO
 Nnanze notte le dia panteco, o truono
 Capetanejo de stoppa,
 Core de crapettiello,
 Vo’ fa de l’ommo, e de no pecoriello.
 
 SCENA VI
 
 RAZULLO da na quinta, e lo stisso.
 
 SPELLECCHIA
720Nzi’ a mo’ n’aggio potuto,
 Trascorrere co Porzia, o Sapatella,
 Se trovo chille Giuvene so’ guaje,
 Non saccio che le dicere,
 Ma na pastocchia è lesta. Ecco moglierema,
725No mme voglio partì da sto pontone,
 E sentì de che parlà, ca sto Tufolo,
 No mme pare leggitemo.
 TUFOLO
 La cosa è pe concrusa.
 LESENA
 E io se tu mme piglie,
730Miettete ncapo ca non voglio niente,
 Né boglio che pe te manco se spenna
 La dote che te dongo,
 E s’arraggio de farmi, aje da arraggiare.
 SCIADDEO
 E ba ca se lo piglia pe marito,
735Scuressa comm’è pazza.
 SPELLECCHIA
 Mme lo disse lo core, ed è accossì,
 E bi’ ca mo’ la vede ssa jornata,
 Maressa annegrecata.
 TUFOLO
 Orzù dance lecienzia
740Ca li patrune mieje
 Mme jarranno trovanno da no piezzo.
 LESENA
 Non te scordà de me?
 TUFOLO
                                          Né tu de Tufolo.
 
 Addio sciato addoruso,
 Voglieme bene sa,
745De Tufolo amoruso,
 Se puoje, non te scordà.
 
 LESENA
 Non dobbetà ca si’ lo core mio.
 TUFOLO - LESENA
 Addio facce mia bella, addio, addio.
 SCIADDEO
 Uh dovana de sale, e addove si’. (fora Razullo.)
 SPELLECCHIA
750Patrona mia bonnì.
 LESENA
 A tiempo a tiempo. Statte allegramente,
 Razullo ca la sciorte
 Se vole
 SPELLECCHIA
                 Quacche nova de matremmonio è chessa?
 LESENA
 E tu comme lo saie?
 SCIADDEO
755A la bon’ora sia.
 Ve site mmaretata.
 SPELLECCHIA
 Mme lo disse lo core.
 LESENA
 N’è lo core Razullo, è stato Ammore.
 SPELLECCHIA
 
 Io mperzò che mme la spasso,
760Notte, e juuorno co Sautanasso,
 Saccio l’ora che fa la luna,
 Mme la faccio co la fortuna;
 Saje che dico no nce penzà.
 Nzi’ a lo naso farfariello,
765T’è arrevato, e lo cellevriello,
 Stace quase pe se votare,
 Se non lasse de sosperare
 De volerete mmaretà.
 
 SCIADDEO
 La facce lo deceva,
770Tene l’uuocchie nzertate a nigro Mago.
 LESENA
 Addonca te rentienne tu de stelle?
 SPELLECCHIA
 Me rentengo de stelle, e de chianete,
 So’ Astroloco, Feloseco, e Copeta.
 LESENA
 E addove l’aje mparate tante cose?
 SPELLECCHIA
775Ntorchia.
 LESENA
                     Ntorchia?
 SPELLECCHIA
                                          Gnorzì.
 LESENA
 Dice cose da fareme mpazzì.
 
 È fenuta pe me l’allegrezza,
 Va trovanno lo core addov’è,
 Comm’a pesce, che fuje da la rezza,
780È fojuta la sciorte da me.
 
 SCIADDEO
 La patrona, se pe oje, ssa mmalorata.
 LESENA
 Scura me annegrecata.
 SPELLECCHIA
 M’è resciuta si affé la mmenzione.
 SCIADDEO
 Nc’è l’ha cantata tutta la Canzona.
 SPELLECCHIA
785Vuoje vedere mariteto?
 LESENA
                                              Maritemo?
 SPELLECCHIA
 Mariteto, e cacata cosa puro.
 LESENA
 Comm’a dicere mo’?
 SPELLECCHIA
                                         Ciento diavole,
 Te faccio comparere se le buoje?
 LESENA
 Vorria, e non vorria.
 SCIADDEO
                                        Mme fa tremmare.
 SPELLECCHIA
790Iammoncenne a la casa.
 Ca mo’ mo’ te nce voglio fa parlare.
 LESENA
 Iammoncenne. Fortuna,
 Quanno la scomparraje pe me na vota,
 Io trevolejo, e tu n’affie la Rota.
 
795Quanto a n’uocchio de Gallina,
 L’Arma mia s’è fatta già;
 Tremmolejo comm’a na foglia,
 Se Razullo non nce mbroglia,
 Chisso è Ommo, e sanetà.
 
 SCENA VII
 
 PORZIA sola.
 
 PORZIA
800Credeva de passarela nzelenzio,
 E adaso adaso l’Arma,
 Mme tenco pezzecare,
 Da non saccio che pimmece ammorosa,
 Uh Porzia poverella.
805Tira lo carro, e bia;
 Prega la sciorta a lo mmacaro c’agge,
 Chillo che t’ha feruta;
 E non te desperà se be’ si’ juta.
 
 Fonzillo de sto core,
810Addove staje, addo’,
 Viene ca Porziella,
 Pe te che si’ na stella,
 S’ascevolesce, e more,
 Se tu non curre mo’.
 
 SCENA VIII
 
 RIENZO, e la stissa.
 
 RIENZO
815Porzia, Porzia.
 PORZIA
                             Che buoje?
 RIENZO
 Sienteme, e quanno,
 Bella de sto core non te piace,
 Chello che boglio dicere?
 Passame l’arma mpietto,
820Spertosame lo fecato,
 Ca n’è niente morire pe na fata.
 PORZIA
 Vattenne ca sto propejo desperata. (va via.)
 
 SCENA IX
 
 RIENZO sulo.
 
 RIENZO
 Desperata, e che dice?
 Desperata e pecché?
825Desperata la figlia de lo Sole?
 Desperata la figlia de la Luna?
 Viene cca non foire,
 Cannolicchio ammoruso,
 Spuonolo de sta vita,
830Ancino de sto fecato,
 Non vi’ ca moro ne? l’arma già scola.
 
 Chi te fice de preta lo Core,
 Che non siente pietate de me;
 M’aje lassato faccella d’Ammore;
835Quanno st’arma sospira pe te.
 
 SCENA X
 
 TUFOLO, e lo stisso.
 
 TUFOLO
 Patrone?
 RIENZO
                    Che patrone?
 Chi è patrone, n’è schiavo.
 TUFOLO
 Co chi l’avite avuto?
 Volite che n’accida quatto, o cinco?
 RIENZO
840E saje comm’è smargiasso,
 È tutto guapparia quanno è da rasso.
 TUFOLO
 Deciteme ch’è stato?
 RIENZO
 Vattenne ca sto propejo desperato.
 TUFOLO
 
 Se mme saglie lo senapo,
845St’anno faccio a fecozzune,
 Non se vonno mette ncapo,
 Ch’io sto cca pe li patrune.
 
 Lo voglio secotare.
 
 SCENA XI
 
 SAPATELLA, e lo stisso.
 
 SAPATELLA
 Fermate addove vaje Tufolo ammato.
 TUFOLO
850Vattenne ca sto propejo desperato. (via.)
 SAPATELLA
 Cchiù de mme desperato non puoje stare;
 Ammore m’hà feruto de manera,
 Che cchiù non so, chi so’, né ch’ella ch’era.
 
 N’è cortiello, e taglia Ammore,
855N’è vergala, e percia l’arma;
 No nce vede, e d’ogne Core,
 Quanno vo’ porta la Parma.
 
 SCENA XII
 
 FONZILLO, e la stissa.
 
 FONZILLO
 Sia beneditto Apollo,
 Core mio ca na vota t’aggio asciata.
 SAPATELLA
860Vattenne ca sto propejo desperata.
 FONZILLO
 Desperata tu ne; songo io bosciarda,
 Chillo che pe te sulo,
 Comm’a Cano che bace attuorno all’uuosso,
 N’arrecetta cchiù niente;
865E tu si’ desperata?
 Va ca nne niente.
 
 Che t’aggio fatto Cana,
 Che n’haje de me piatà.
 Da te st’arma lontana
870Contenta maje no sta.
 
 SCENA XIII
 
 TUFOLO, e lo stisso.
 
 TUFOLO
 Patrone?
 FONZILLO
                    Che patrone, songo niente.
 TUFOLO
 E una, e una a doje;
 Nzanetate pozz’essere, ch’è stato?
 FONZILLO
 Vattenne ca sto propeio desperato. (va via.)
 TUFOLO
875Lo Cellevrello mio già se n’è juto,
 Non saccio che mme dicere, o penzare;
 Sacciammo chiste c’anno?
 So’ jute all’Incorabbole, o nce vanno?
 
 SCENA XIV
 
 LESENA, SCIADDEO, e TUFOLO.
 
 LESENA
 Ente chi veo? chi mm’è benuto nnanze;
880Tufolo, chillo oh dio,
 Che mme tene legata?
 SCIADDEO
 Che pazzia che l’è data a sta Vecchiarda,
 E non vede ch’hà ll’vuocchie,
 Afrecate de seta Carmosina.
 LESENA
885Tufolo mio, che d’aje?
 TUFOLO
 Sto un quanquo trebbolato,
 Pe l’antiche memorie già sparse,
 E poscia, che mi chiede Ussignoria,
 Vorria darve un malan che dio ve dia.
 LESENA
890Che bonno di’ cheste parole mo’?
 SCIADDEO
 (Vo’ di’ ca pe mogliere non te vo’!)
 LESENA
 
 Si’ mme spacche a felle a felle,
 L’aggio a gusto ’nveretà!
 De chess’ossa, e chesta pelle,
895Capetale nne può fa.
 
 SCENA XV
 
 RAZULLO, e li stissi.
 
 SPELLECCHIA
 Lesena a tiempo, a tiempo t’aggio asciato.
 SCIADDEO
 (Nnevina che sarrà chesta mmasciata.)
 LESENA
 Che cos’è?
 TUFOLO
                       Che t’accorre?
 SPELLECCHIA
 Chiano chiano sio Tufolo.
 TUFOLO
900Parlame co cchiù termene?
 O mo’ mo’ co no cauce,
 Te manno ncoppa a n’astreco,
 E te faccio morì pe mmiezo a ll’aria?
 SPELLECCHIA
 Orsù già che tu si’ tanto valente;
905(Lo voglio fa morire de pavura.)
 Vide chella fegura?
 LESENA
 Qua feura che dice?
 TUFOLO
 Tu sbarie?
 SPELLECCHIA
                       Voze di’ chella stella.
 TUFOLO
 La veo gnorsì.
 LESENA
                             Che nne vuo’ fa de chella.
 SPELLECCHIA
910Ora chella è la sora
 De la sora de Marte peccerella,
 Parente de parente de Giunone,
 Figlia a lo sio Saturno,
 Cajenata de Mercurio,
915Ammica de Madusa, e ba scurrenno;
 Lesena siente buono?
 Dite ca si te tuorne a mmaretare,
 Mariteto t’accide, e puoje crepare.
 TUFOLO
 Si’ mmaretata adonca.
 SCIADDEO
920Maro me ca mo’ crepo de paura.
 LESENA
 Da quant’hà, che maritemo è atterrato.
 SPELLECCHIA
 Sienteme, e statte zitto.
 TUFOLO
 Jate secotejanno.
 SPELLECCHIA
 Pigliame chella mazza.
 SCIADDEO
925Addo’ sta?
 SPELLECCHIA
                       No la vide?
 TUFOLO
 Che bo’ fa?
 LESENA
                        Che sacc’io?
 SCIADDEO
 Eccola cca.
 SPELLECCHIA
                       Dammella;
 Mo’ te faccio vedè s’è bivo, o muorto,
 Lo povero Spellecchia.
 SCIADDEO
930Mo’ se nne va pe l’aria la vecchia.
 TUFOLO
 Vi’ a che guaje sto pe ttene.
 LESENA
 Bene mio ca so’ morta mare mene
 SPELLECCHIA
 
 Sautanasso io te comanno,
 Che Spellecchia mo’ volanno,
935Tu mme puorte propejo cca.
 Portamillo si be’ stesse
 Cocenandose l’allesse
 Mmiezo all’uorto pe magnà.
 
 LESENA
 Io tremmo comme a canna.
 TUFOLO
                                                     Io mo’ sconocchio.
 SCIADDEO
940Aggio perza la vista io so’ speduto.
 SPELLECCHIA
 Mariteto è benuto?
 TUFOLO
 È benuto?
 SCIADDEO
                      Addo’ stace?
 SPELLECCHIA
 Non te partì, ca mo’ lo chiammo, e bene.
 (Uh bene mio, e che pavura tene.)
 
 SCENA XVI
 
 TUFOLO, SCIADDEO, LESENA, e po RAZULLO.
 
 TUFOLO
945Lesena, che nne dice?
 LESENA
 Songo morta.
 TUFOLO
                            Sto stupefatto.
 SCIADDEO
                                                         Io tremmo.
 TUFOLO
 Vi’ a che guaje, che mm’aje puosto.
 LESENA
 Jammoncenne da ccane zitto, zitto.
 SCIADDEO
 N’è cosa, ca lo sape lo mmarditto.
 
950Lo core tippe, tappa
 Mme sento fare già.
 Se l’arma no mme scappa,
 De marmora sarrà. (Recetativo a muodo d’aria. Razullo vestuto da Spellecchia.)
 
 SPELLECCHIA
 Presentosa, sfacciata, arma de chiummo
955E mbe’ chist’è l’affetto, che mme puorte?
 L’uuocchie mieje non so’ muorte,
 E buoje l’ammore mio mannare nfummo.
 Si non lasse de fa le guattarella,
 Parlaraggio a na zierta femmenella,
960E ncuorpo te farraggio
 Trasire Farfariello, co lo paggio. (parte.)
 
 SCENA XVII
 
 LESENA, TUFOLO, e SCIADDEO.
 
 LESENA
 Mara me ch’aggio visto?
 TUFOLO
 Oh bene mio, che sfunnolo, che tengo.
 SCIADDEO
 So’ asciuto da li panne.
 LESENA
965Spellecchia è pe securo.
 TUFOLO
 Mm’è benuta la freve.
 LESENA
 Tufolo mio ch’è stato?
 TUFOLO
 Lo Nfierno bene mio ncuorpo mm’è entrato.
 SCIADDEO
 (Mme nce voglio spassà co tutte duje.)
 LESENA - TUFOLO
 
970V(†) Tufolo gioja mia,
                                            Uh mmare nuje.
 V(-) Lesena de sto core,
 
 LESENA
 
 Morta pe tte song’io,
 Oh Tufolillo mio.
 
 TUFOLO
 
 Lo core mio si’ tune.
 
 SCIADDEO
 
975Già veo pe li tallune,
 Saglì non saccio che.
 
 LESENA - TUFOLO
 
 Che bide?
 
 SCIADDEO
 
                      Veo na sciamma.
 
 LESENA - TUFOLO
 
 Addove?
 
 SCIADDEO
 
                    Pe la gamma;
 Che saglie comme a grillo.
 
 LESENA - TUFOLO
 
980E ba ch’è lo tentillo
 V(†)      ncappata
 Nce so              affé.
 V(-)      ncappato
 
 SCIADDEO
 
 De riso crepo affé.
 
 LESENA - TUFOLO
 
985Lo vide cchiù?
 
 SCIADDEO
 
                              Lo veo.
 
 LESENA - TUFOLO
 
 Caccialo si Sciaddeo.
 
 SCIADDEO
 
 E comme pozzo fare?
 V’avite d’appelare.
 
 LESENA - TUFOLO
 
 Che cosa mare nuje.
 
 SCIADDEO
 
                                        Lo naso.
 
 LESENA - TUFOLO
 
990L’ammarro adaso adaso.
 
 SCIADDEO
 
 La vocca, co li diente.
 
 LESENA - TUFOLO
 
 Lo vide?
 
 SCIADDEO
 
                   Lo veo quase niente?
 
 LESENA - TUFOLO
 
 Se nn’è squagliato ne!
 
 SCIADDEO
 
 Zitto ca cchiù non nce.
 
 LESENA - TUFOLO
 
995V(†)    morta mara
 So’                          me.
 V(-)    muorto maro
 
 SCIADDEO
 
 De riso crepo affé.
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional