| | |
| | |
| | La taverna de Mostaccio, Napoli, A spese de Nicola de Bease, 1740 |
| | a cura di Paologiovanni Maione |
| |
| |
| |
|
| |
| | ATTO PRIMMO |
| |
| | SCENA PRIMMA |
| |
| | Notte. |
| | MEZACAPO, che porta MOSCARDINO dinto a lo vuzzo suio accostanno nterra, e sbarcanno. |
| |
| | MEZACAPO |
| | Rieie, Nardullo, rieie: potta de nnito |
| | Ch’aje le ghiord’a le mmano? |
| | Sia na vanna na vanna, |
| | Muovete, tira ssò vracciullo, oje suonno, |
| 5 | Sia nterra... arrieje arrieje ca se rompe |
| | Lo struoppolo, e se nn’esce |
| | Ssò scarmo, fuss’acciso. |
| | Scennite Signorè. A mulo mulo, |
| | Te voglio fà sentì no rimmo all’uffo. |
| | MOSCARDINO |
| 10 | Ll’ora pare a preposeto. |
| | MEZACAPO |
| | Poco nce vo’ pe ghiuorno: |
| | Essa v’aspetta? |
| | MOSCARDINO |
| | Chi? |
| | MEZACAPO |
| | Rina. |
| | MOSCARDINO |
| | Securo. |
| | MEZACAPO |
| | E a le mmano mmardette, mo ch’è scuro. |
| | Ma Segno’, chesta tene |
| 15 | Na sarma de ncappate, statt’attiento. |
| | MOSCARDINO |
| | Ah. Ah. Ah., mme ne rido: |
| | Ca io so’ lo cuccupinto |
| | De ssa revera. |
| | MEZACAPO |
| | E ccà nce stace Titta, |
| | Segno’, ch’è lo mammone |
| 20 | De stò contuorno. |
| | MOSCARDINO |
| | E sa’ che mazzeiatone |
| | Le fece a chisso l’autro juorno. |
| | MEZACAPO |
| | Vuie? |
| | MOSCARDINO |
| | Io, chi? sie’, Mezacapo: |
| | Io mme vao devertenno |
| | Co tutte sse fegliole, |
| 25 | Meno le mmano quann’accorre, e spenno. |
| | MEZACAPO |
| | Ora sescate. |
| | MOSCARDINO |
| | Fis, fis. |
| | MEZACAPO |
| | (Chisto mme pare |
| | No sbafante squarcione, |
| | E ccà cierto nce abbusca lo cottone, |
| | Ma lo vagno non vene.) |
| 30 | A Signorè? |
| | MOSCARDINO |
| | Che buoie? |
| | MEZACAPO |
| | La razia vosta. |
| | MOSCARDINO |
| | Sì sì: tiene lo riesto |
| | De na doppia de quatto co lo giro? |
| | MEZACAPO |
| | Tengo lo riesto de... |
| | Auh! Che lapparone |
| 35 | Mme scappava da vocca. |
| | MOSCARDINO |
| | Zitto zitto |
| | Ca mo s’affaccia. |
| |
| | SCENA II |
| |
| | TITTA ncammisa da lo barcone, e li stisse. |
| |
| | TITTA |
| | Chi sarrà ssò guitto, |
| | Ch’hà sescato... O bonora! |
| | MEZACAPO |
| | (Uh! Titta mo’ nce nasce quà tempesta.) |
| | TITTA |
| | Chist’è chill’a leviento, che ll’autriere |
| 40 | Nne lo fece fuire. |
| | MEZACAPO |
| | Oh bona chesta. |
| |
| | SCENA III |
| |
| | RINA ncammisa da lo barcone suio, MOSCARDINO, e MEZACAPO da vascio. |
| |
| | RINA |
| | Chi è lloco? |
| | MOSCARDINO |
| | Rina bella? |
| | RINA |
| | Chi si’? |
| | MOSCARDINO |
| | So’ Moscardino. |
| | RINA |
| | E a chest’ora che buo’? |
| | MOSCARDINO |
| | La razia toia. |
| | RINA |
| | Che staie p’essere mpiso, |
| 45 | Che buo’ la grazia? |
| | MEZACAPO |
| | O bello compremiento! |
| | MOSCARDINO |
| | Che d’è? tù no staje justa? |
| | RINA |
| | O justa, o scarza, |
| | Che fusse affezeiale de la zecca, |
| | Che m’aie da mesurà? và, mme credeva, |
| | Che mm’avesse sescato Mezacapo. |
| | MOSCARDINO |
| 50 | Donca pe Mezacapo |
| | Te si’ affacciata? |
| | RINA |
| | E no lo ssaie ancora? |
| | MOSCARDINO |
| | Femmene veramente! |
| |
| | SCENA IV |
| |
| | TITTA co la scoppetta mmano, e LELLA che lo trattene, e po TENZA da lo barcone co la lucerna allummata mmano tutte mieze spogliate, e li stisse. |
| |
| | TITTA |
| | E lassa potta d’oje, lassa... |
| | MEZACAPO |
| | Oh bonora! |
| | Titta co la scoppetta. |
| | LELLA |
| | Ah frate mio, |
| 55 | Lasselo j. |
| | MOSCARDINO |
| | Addo’ vaje? |
| | RINA |
| | Uh negramene! |
| | MEZACAPO |
| | Chiano potta de nnico, |
| | Titta, ca stongh’io cca. |
| | TITTA |
| | Scostate. |
| | MEZACAPO |
| | Lassa, |
| | Ca chillo mena. |
| | MOSCARDINO |
| | Statte n’aje paura. |
| | MEZACAPO |
| | Haie paura ste brache. |
| | TITTA |
| 60 | Nò nce vuo’ proprio credere, |
| | Muorto de famme nè? |
| | MEZACAPO |
| | Né chist’è chillo, |
| | Ch’avive mazzeiato? |
| | TENZA |
| | Ch’è succiesso? ch’è stato? |
| | Titta co la scoppetta. |
| | TITTA |
| | Pe l’ammore |
| 65 | De ssa bella Segnora, che t’è figlia. |
| | A chest’ora se fà stò parapiglia. |
| | TENZA |
| | Và trasetenne dinto facce tosta. |
| | RINA |
| | Mo nce ne jammo. |
| | TITTA |
| | Siente pedecchiuso, |
| | Si assumme chiù ccà nnante, |
| 70 | Te voglio fà di parte ssò caruso. |
| | MEZACAPO |
| | Aie sentuto? |
| | MOSCARDINO |
| | Eh! bonora si non fosse |
| | Pe portare respetto a ssà figliola, |
| | Le volea fà lo riesto. |
| | LELLA |
| | Ah! scquarcionciello, |
| | Va, ch’aie da fà co mmico. |
| | MOSCARDINO |
| 75 | A mmè? Siente... |
| | MEZACAPO |
| | Sfornitela ssà joja. |
| | MOSCARDINO |
| | Che buo’ che trasa... |
| | LELLA |
| | Tè a la faccie toja. |
| | MEZACAPO |
| | E bon prode nce faccia. |
| | MOSCARDINO |
| | Che te ne pare, Tenza? |
| | TENZA |
| | Vattenne ca t’abbio |
| 80 | Stà testolella ncapo. |
| | MEZACAPO |
| | Meglio. |
| | MOSCARDINO |
| | Siente: |
| | Chesto sa’ perché l’aggio sopportato? |
| | TENZA |
| | E bà a la forca, lazaro frustato. |
| |
| | SCENA V |
| |
| | MEZACAPO, e MOSCARDINO. |
| |
| | MEZACAPO |
| | Schiavo sio coccopinto |
| | De stà revera. |
| | MOSCARDINO |
| | Che buo’ di’ pe chesso? |
| | MEZACAPO |
| 85 | Ca t’anno fatto gran fenizze. |
| | MOSCARDINO |
| | Siente: |
| | Le ngiurie de le ffemmene |
| | Io l’aggio pe faure. |
| | MEZACAPO |
| | Ora Segno’, |
| | Lo viaggio... |
| | MOSCARDINO |
| | Sa quanto nce aggio spiso |
| | Appriesso a chesta lloco |
| 90 | De... |
| | MEZACAPO |
| | Gnorsì v’aggio creddeto; |
| | Ma lo viaggio mio. |
| | MOSCARDINO |
| | Aie da sapè, ca io |
| | Ccà songo lo patrone... |
| | MEZACAPO |
| | Co salute. |
| | Mà lo viaggio dico... |
| | MOSCARDINO |
| | E te voglio contà no bello ntrico. |
| | MEZACAPO |
| 95 | A Segnorè? |
| | MOSCARDINO |
| | Nò siente... |
| | MEZACAPO |
| | Vhe buo’ sentì na cufece; |
| | Và piglianno l’aruta. |
| | MOSCARDINO |
| | Te ccà potta de mene, |
| | Che mme ne fuio? Piglia. |
| | MEZACAPO |
| | Quant’è chisso? |
| | MOSCARDINO |
| 100 | È no feroce, e no nce autro sfranto. |
| | MEZACAPO |
| | Io non saccio... |
| | MOSCARDINO |
| | Coietate, |
| | Ca de ciente docate, |
| | Che perdette aiersera, |
| | Autro non mm’è restato: |
| 105 | Stipa. |
| | MEZACAPO |
| | (Vi’ che milordo arroienato!) |
| | Ma ccà senza felusse, |
| | Che si’ benuto a fà? |
| | MOSCARDINO |
| | Senza felusse? |
| | Sempe stà vorza è chiena, |
| | De doppie, e de zecchine, |
| 110 | De polese de cammio. |
| | MEZACAPO |
| | (E sarva guardie.) |
| | MOSCARDINO |
| | Me spasso, me deverto, |
| | Co ssè fegliole. |
| | MEZACAPO |
| | (È curiuso.) |
| | MOSCARDINO |
| | Faccio |
| | Semp’alliegro, e contento |
| | Na bella vita. |
| | MEZACAPO |
| | E tristo testamiento. |
| | MOSCARDINO |
| |
| 115 | Io mme piglio li quatto d’Agusto, |
| | Mme do uocchio |
| | Cò chest’e cò chella; |
| | La brutta mpapocchio, |
| | Pasteggio la bella, |
| 120 | Regalo co gusto, |
| | Refilo, ammenaccio; |
| | Stà vorza, sto vraccio, |
| | E chesta lo ssà. |
| | So’ fegliulo, nc’è bagno, so’ ammato, |
| 125 | A nullo do mpaccio, |
| | Stò semp’ammolato; |
| | Da tutte me faccio |
| | Temere, e stemà. |
| |
| | SCENA VI |
| |
| | MEZACAPO, e TENZA. |
| |
| | MEZACAPO |
| | Ah. ah. ah. lo bello sbafante! |
| 130 | Va’ na doppia lo pilo. |
| | TENZA |
| | Comme dice? |
| | MEZACAPO |
| | O te stò mascarone, |
| | Che more pe Mostaccio. |
| | TENZA |
| | Non vuo’ felà, e che buo’, che te carosa? |
| | MEZACAPO |
| | Vedimmo de scroccarele quaccosa. |
| | TENZA |
| 135 | O Mezacapo. |
| | MEZACAPO |
| | Addio, sia Tenza bella. |
| | TENZA |
| | Uh bella mo. |
| | MEZACAPO |
| | Nò tu quanto chiù staie |
| | Chiù fegliola te faie; |
| | Hà raggione Mostaccio, |
| | Ca tu nne lo faie ire mpilo mpilo. |
| | TENZA |
| 140 | E isso n’hà tre ghinorne, |
| | Ch’aperta ssà taverna. |
| | MEZACAPO |
| | E questo è il caso: |
| | Diceno li dotture. |
| | TENZA |
| | Oh Mezacapo mio, si chest’è bero |
| | Te voglio regalà di moccature. |
| | MEZACAPO |
| 145 | Sse cose non nce vonno |
| | Co mmico mo’. |
| |
| | SCENA VII |
| |
| | MOSTACCIO aprenno la taverna, e li stisse. |
| |
| | MOSTACCIO |
| | Caccia ssi scanne, oie suonno. |
| | MEZACAPO |
| | E beccotillo te, mo te lo porto. |
| | TENZA |
| | Sine sì, ca nfra tanto m’arresedio. |
| | MEZACAPO |
| 150 | Potta è chiù brutta, che non è lo debbeto. |
| | MOSTACCIO |
| | Appienne ssa caudara, |
| | Miette legna a ssò fuoco... Oh Mezacapo, |
| | Che se fà? |
| | MEZACAPO |
| | A lo commanno. |
| | MOSTACCIO |
| | È Tenza chella? |
| | MEZACAPO |
| | Sì. |
| | MOSTACCIO |
| | La figlia de chessa |
| 155 | Mme fa sperire. |
| | MEZACAPO |
| | E essa |
| | Squaglia pe ttè la povera fegliola. |
| | MOSTACCIO |
| | Pe mme? |
| | MEZACAPO |
| | Pe ttè (nne mento pe la gola.) |
| | MOSTACCIO |
| | E tu comme lo ssaie! |
| | MEZACAPO |
| | La sfortunata |
| | S’è fedata co mmico |
| 160 | (M’aggio da fare a gusto na cardata.) |
| | MOSTACCIO |
| | Auh compa’, e che sciamma |
| | M’aie abbescato mpietto. |
| | MEZACAPO |
| | Sa’ che buo’ fare, accostate a la mamma, |
| | Falle no descorzetto |
| 165 | De chille tuoie (che non concrude maie.) |
| | MOSTACCIO |
| | Lassa fa a mme. Tenza bonnì, che faie? |
| | MEZACAPO |
| | Essa non sape ca Mostaccio è surdo; |
| | Lloco sarrà lo mbruoglio. |
| | MOSTACCIO |
| | T’aggio da servì a niente? |
| | TENZA |
| | Schitto voglio |
| 170 | (Che tu affetto mme puorte.) |
| | MOSTACCIO |
| | Ch’à ditto? ca vo’ quatto schiattamuorte. |
| | MEZACAPO |
| | Ah ah ah ah. |
| | MOSTACCIO |
| | Non ridere bonora. |
| | Ora Tenza accortammo lo cammino, |
| | Pecché lo matremmonio, |
| 175 | È ghiusto commo... Verborazia; commo... |
| | MEZACAPO |
| | N’accocchiamiento. |
| | MOSTACCIO |
| | Appunto accocchiamiento; |
| | La qualemente cosa, quanno n’ommo |
| | Ave no po’ de comme s’addemmanna. |
| | MEZACAPO |
| | Sì, sì, sì. |
| | MOSTACCIO |
| | Quanto vi tuffe. |
| | MEZACAPO |
| | Se lassa |
| 180 | Vuo’ dicere tu mo. |
| | MOSTACCIO |
| | Justo se lassa; |
| | Lassato po che s’è... |
| | MEZACAPO |
| | Tann’è concruso |
| | Lo negozio. |
| | MOSTACCIO |
| | Concruso gnor mio sine. |
| | MEZACAPO |
| | E bia sie Tenza già la cosa è fatta. |
| | Tu si’ contenta? |
| | TENZA |
| | Io cierto |
| | MEZACAPO |
| 185 | E tu? |
| | MOSTACCIO |
| | So’ contentissimo. |
| | MEZACAPO |
| | Addonca va bellissemo. |
| | Jammoncenne. |
| | TENZA |
| | No ferma, Mezacapo. |
| | Già che mme vuo’, dammonce mo la mano. |
| | MEZACAPO |
| | A potta d’oje, la mbroglia |
| 190 | Mo se scommoglia. |
| | TENZA |
| | Creo, ca conzolato |
| | Stammatina sarrà sto core affritto. |
| | MOSTACCIO |
| | Rina vo’ no piatto de zoffritto? |
| | Patrona... |
| | TENZA |
| | À negra me ca chist’è surdo. |
| | MEZACAPO |
| | No la cosa riesce a mazzeata. |
| | TENZA |
| 195 | Ora via vienetenne, fato mio. |
| | MOSTACCIO |
| | Che mme vuo’ portà ncoppa? |
| | TENZA |
| | None damme ssa mano. |
| | MOSTACCIO |
| | E che buo’ fa? |
| | TENZA |
| | So’ cinco, e cinc’a diece. |
| | MOSTACCIO |
| | E la mmalora che te torca. |
| | TENZA |
| | Commo? |
| 200 | Chesto, che bene a ddi’, fusse mpazzuto? |
| | MEZACAPO |
| | Ah, ah, ah bene mio ca so scosuto. |
| | MOSTACCIO |
| | Addonca tu? |
| | TENZA |
| | So’ la mogliere toja. |
| | MOSTACCIO |
| | Mogliere a mme? mogliere de lo boja. |
| | TENZA |
| | Uh faccia mia! e tu nfi’ a mo ch’aje ditto? |
| | MOSTACCIO |
| 205 | Ca volea sposà figliata. |
| | TENZA |
| | Tu figliema! |
| | MOSTACCIO |
| | Io figliata. |
| | TENZA |
| | E tu saje, che catarro tene chella? |
| | MOSTACCIO |
| | E si tene la zella |
| | Nce la sanammo. |
| | MEZACAPO |
| | Ah, ah, ah, ah. |
| | TENZA |
| | Sarraje |
| 210 | Tu no zelluso, schefenzuso, puorco. |
| | MOSTACCIO |
| | Vattenne, mascarone de fontana. |
| | TENZA |
| | Si t’afferro, ssa lengua n’attoppaglio |
| | Me ne faccio, m’aje ntiso? |
| | MEZACAPO |
| | Via mo non sia pe ditto. |
| | MOSTACCIO |
| 215 | E tu sa’ che nce metto, |
| | E tte smenozzo dint’a lo zoffritto? |
| | TENZA |
| |
| | Mostaccio de gatta, |
| | Straccione, sfelenza, |
| | Co Tenza, mo tu? |
| 220 | Tò non nce vo’ cchiù. |
| | L’avive allummata |
| | La bella fegliola, |
| | Te fà cannavola |
| | Stà faccia de fata? |
| 225 | Ma muore accossì. |
| | Arraggiate, schiatta; |
| | So’ ricca, so’ bella, |
| | So’ fresca, e addorosa |
| | Chiù assaje de na rosa; |
| 230 | Te po quanno vole |
| | Lo spireto ascì. |
| |
| | SCENA VIII |
| |
| | MEZACAPO, MOSTACCIO, e po RINA. |
| |
| | MOSTACCIO |
| | Ah, ah, ah, vi’ che nciampeco |
| | Ch’avea pigliato la grimmalda. |
| | MEZACAPO |
| | Sidece. |
| | MOSTACCIO |
| | Mà lo triunfo non se vede. |
| | MEZACAPO |
| | Ammasca. |
| 235 | Lo partito ca pare cà mo’ assomma... |
| | MOSTACCIO |
| | Veccola ccà. |
| | MEZACAPO |
| | Schiavo sia Rina bella. |
| | RINA |
| | O bonnì Mezacapo. |
| | MEZACAPO |
| | Mme pare na viola de Frevaro. |
| | RINA |
| | E tu a mene de Maggio no papagno. |
| | MEZACAPO |
| 240 | Comme si’ bona! |
| | RINA |
| | E tu comme si’ caro! |
| | MEZACAPO |
| | Ccà stà Mostaccio nuosto. |
| | RINA |
| | À negra me, mme fà venì lo vuommeco. |
| | MOSTACCIO |
| | Comm’hà doglia de stommaco? |
| | MEZACAPO |
| | Ah, ah. |
| | RINA |
| | Ch’à ditto? |
| | MEZACAPO |
| | Niente, è curiuso; |
| 245 | È surdo, e quanno parla |
| | Non quaglia maje, sacce |
| | Ch’è mpazzuto pe ttè. |
| | RINA |
| | Che bell’accunto. |
| | MEZACAPO |
| | Nò pigliammonce gusto. |
| | MOSTACCIO |
| | Che t’hà ditto? |
| | MEZACAPO |
| | Ca vo’ che t’abbecine. |
| | MOSTACCIO |
| 250 | Vo’ quinnece carrine? |
| | MEZACAPO |
| | Nò vo’ che t’abbecine. |
| | MOSTACCIO |
| | Oh e di’ accossì. Bella mbreana mia |
| | (Nota st’accommenzaglia) |
| | Io da quanno vedette ssà faccella, |
| 255 | Che bao correnno co le brache mmano |
| | Comme chi hà la mmedecina ncuorpo. |
| | MEZACAPO |
| | Ah, ah, ah. |
| | RINA |
| | Comme parla polito! |
| | MOSTACCIO |
| | Gnora nò n’è appetito. |
| | MEZACAPO |
| | Meglio. |
| | MOSTACCIO |
| | Chesta |
| | Eje na... uscia me ntenna... comme fosse |
| 260 | Comm’à dire na cosa. |
| | MEZACAPO |
| | Sì na cosa de chesse. |
| | RINA |
| | Sì, sì, ch’è quant’a di’ ca si’ ncappato. |
| | MOSTACCIO |
| | Comme crepato? |
| | RINA |
| | Nò ncappato. |
| | MOSTACCIO |
| | Appunto. |
| | Mà pò non saccio si la chella vosta |
| 265 | Se vo’ accocchiare cò l’affetto mio. |
| | RINA |
| | Mme faccio mmaraveglia! |
| | Si’ ommo tu d’essere refutato? |
| | MOSTACCIO |
| | Comme frustato? |
| | RINA |
| | Nona refutato. |
| | MOSTACCIO |
| | Non segnore. |
| | RINA |
| | E pecchesso. |
| 270 | Dint’a la tavernella de stò pietto, |
| | Pe tte, Mostaccio mio, |
| | Nò nce mancarrà maje quacche sguazzetto. |
| |
| | Mostaccio bello, |
| | Mm’aje arrobato |
| 275 | Lo corecillo; |
| | Si’ aggraziato, |
| | Si’ tutto sale. |
| | (Comm’è anemale!) |
| | Mme faje morì. |
| 280 | Già de stò core |
| | Tutto l’ammore |
| | T’aggio scopierto. |
| | (Che bello nzierto |
| | Videlo vi’.) |
| |
| | SCENA IX |
| |
| | MOSTACCIO, MEZACAPO, e po NTRETELLA da la Taverna. |
| |
| | MEZACAPO |
| 285 | Nnè vuo’ chiù pè treccalle? |
| | MOSTACCIO |
| | Oh Compa’, chiagneme |
| | Ca so’ precepetato. |
| | NTRETELLA |
| | (Vecco chi mm’hà lo core spertosato) |
| | Tata ancora staje lloco, |
| | E la taverna quanno se provede? |
| | MEZACAPO |
| 290 | Oh! Ntrete’, te so’ cuoco. |
| | MOSTACCIO |
| | Siente: si Mezacapo |
| | Vo’ quaccosa da lloco, |
| | Dalle chello che bbo’. |
| | NTRETELLA |
| | Cò gusto, e pecché no? |
| | MEZACAPO |
| | Faccie de doppia |
| 295 | De Spagna mia. |
| | NTRETELLA |
| | Faccie |
| | De presentuso. |
| | MOSTACCIO |
| | Siente Mezacapo, |
| | Saglietenne Ntretella. |
| | NTRETELLA |
| | Gnorsì. |
| | MEZACAPO |
| | No ntè partì. |
| | NTRETELLA |
| | Nò gioja mia. |
| | MOSTACCIO |
| | Io mone te vorria... |
| | MEZACAPO |
| | Tu mme vuo’ bene? |
| | NTRETELLA |
| 300 | E che te par a tte? |
| | MOSTACCIO |
| | Direte lo trommiento, |
| | Che stò patenno. |
| | MEZACAPO |
| | E quanto me vuo’ bene? |
| | NTRETELLA |
| | Quant’a lo core mio. |
| | MOSTACCIO |
| | Che mperrò... ancora lloco? (a Ntretella.) |
| | MEZACAPO |
| 305 | Chesto le stea decenno |
| | Che se nnè jesse. |
| | NTRETELLA |
| | A faccie de frabutto. |
| | MOSTACCIO |
| | E accossì lo trommiento... se n’è ghiuta? |
| | MEZACAPO |
| | È arrevata già ncoppa. |
| | No ntè movere cana. |
| | MOSTACCIO |
| 310 | Che patesco pe chesta. |
| | MEZACAPO |
| | Vi’ ca pare che s’apre la fenesta. |
| | Damme ssà mano gioja. |
| | NTRETELLA |
| | Nò nò pò nce vedimmo. (trase.) |
| | MEZACAPO |
| | Auh bonora! |
| | MOSTACCIO |
| | Ch’è stato? |
| | MEZACAPO |
| 315 | Niente niente, |
| | Via di’ la cosa mo’ de li trommiente. |
| | MOSTACCIO |
| |
| | Mme sento ncuorpo na... |
| | Na comme s’addemmanna, |
| | Che bà da cca, e da llà. |
| |
| | MEZACAPO |
| |
| 320 | E nania nella, e nania nà. |
| |
| | MOSTACCIO |
| |
| | Mme pare che sta sciamma, |
| | Mà pò mme ntracca e fella. |
| |
| | MEZACAPO |
| |
| | Và pe lo cardo mo. |
| |
| | MOSTACCIO |
| |
| | Vasta è na cosa bella, |
| 325 | Che... tu m’aje ntiso già. |
| | Ma Rina saje che fà? |
| | Fà comm’a la focetola, |
| | La quaglia, l’arcigliola, |
| | Che... che... che. |
| |
| | MEZACAPO |
| |
| | Vasta e zetera. |
| |
| | MOSTACCIO |
| |
| 330 | Che quanno... |
| |
| | MEZACAPO |
| |
| | Quanno vola |
| | Ferma nò stà... |
| |
| | MOSTACCIO |
| |
| | Gnornò, |
| | Pe ll’aria se nne và. |
| |
| | MEZACAPO |
| |
| | Uh bravo ah ah ah. |
| |
| | SCENA XI |
| |
| | MEZACAPO, e NTRETELLA sceglienno la nzalata. |
| |
| | MEZACAPO |
| | Bene mio, cà mo’ sbotta la vessica, |
| 335 | Comm’è partecolare! |
| | NTRETELLA |
| | Se nn’è ghiuto? |
| | MEZACAPO |
| | Sì nne l’aggio abbiato; |
| | E tu mpesa vi’ comme m’aje chiantato. |
| | NTRETELLA |
| | E mmè chesso che d’eje? |
| | MEZACAPO |
| | È troppo assaje |
| | Pe chi stace pe ttè dint’a lo ffuoco. |
| | NTRETELLA |
| 340 | Ora via, famme ridere no poco. |
| | MEZACAPO |
| | Che sso’ Polecenella? |
| | NTRETELLA |
| | Nò levame na chella; |
| | Dimme pecché te chiamme Mezacapo? |
| | MEZACAPO |
| | Oh! potta d’oje, e che addemmanna! |
| | NTRETELLA |
| | Sbricate. |
| | MEZACAPO |
| 345 | Ntrete’, con ghi sapenno. |
| | NTRETELLA |
| | Nò Mezaca’ dimmello, |
| | Si mme vuo’ bene. |
| | MEZACAPO |
| | Sine, musso bello, |
| | Ca te lo boglio di’. Saccie ca io |
| | Jett’a la guerra contr’a li Franzise; |
| 350 | Né nc’è stata barruffa |
| | Ch’io non aggia abbuscato. |
| | NTRETELLA |
| | Sciù che breogna! No Napolitano |
| | Farese refelà da no Franzese. |
| | MEZACAPO |
| | Eh figlia! quanno chisse te so’ ncuollo |
| 355 | Si’ muorto, si mbe’ fusse nò leone: |
| | Ca stroppeano ogne sciorte de nazione. |
| | NTRETELLA |
| | E accossì. |
| | MEZACAPO |
| | No juorno uno de chisse |
| | Mme mollaje tale sciabbolata ncapo, |
| | Che se nne jette chiù de meza nterra. |
| | NTRETELLA |
| 360 | Nigro te sfortunato! |
| | MEZACAPO |
| | Chiste frutte se cogliono a la guerra. |
| | NTRETELLA |
| | Ora vi’ che desgrazia! poveriello |
| | Che chelleta, che n’aggio! |
| | Nò mme l’avisse ditto. |
| | MEZACAPO |
| 365 | Che nn’aje ntiso dolore? |
| | NTRETELLA |
| | Nce mancava a sto core |
| | St’autra affrezzione. |
| | MEZACAPO |
| | E pecché mmo’? |
| | NTRETELLA |
| | Vattenne, |
| | Vuo’ che lo ddica proprio. |
| | MEZACAPO |
| | E chi te tene? |
| | NTRETELLA |
| | Nn’aggio pietà, pecché te voglio bene. |
| | MEZACAPO |
| |
| 370 | Nenna amata, faccella de fata, |
| | Lo ccanosco, cà bene mme vuo’, |
| | E stò core, Ntretella mia bella, |
| | Pe prejezza, pe contentezza, |
| | Nzuoccolo, nzuoccolo se nne và. |
| 375 | Sempe alliegre volimmo nuje stare, |
| | Sempe nziemmo volimmo scialare; |
| | Chi n’hà midea che pozza crepà. |
| |
| | SCENA XII |
| |
| | LELLA, NTRETELLA, e po MOSCARDINO. |
| |
| | LELLA |
| | Bonnì bonnì, Ntretella. |
| | NTRETELLA |
| | Oh Lella ben menuta. |
| 380 | Ched’è? tu staje sbattuta. |
| | LELLA |
| | A sore mia, |
| | N’aje ntiso che nce stato ccà mo’ nnante |
| | Co chillo pazzo? |
| | NTRETELLA |
| | Chi mo’? |
| | LELLA |
| | Moscardino. |
| | NTRETELLA |
| | Chillo che ccà lassaje |
| | Ll’auto juorno pe pigno lo spatino. |
| | LELLA |
| 385 | Marame! lo spatino? |
| | NTRETELLA |
| | E che te cride? |
| | Tutte ssi guappetielle |
| | Che banno linte, e pinte |
| | Co li pennacchie, e buorde a li cappielle, |
| | Se morono de famme... |
| | LELLA |
| | Uh! zitto zitto |
| 390 | Ca mo’ pare ca vene. |
| | NTRETELLA |
| | (Bello nchiasto.) |
| | LELLA |
| | Ma io le voglio bene. |
| | MOSCARDINO |
| | Lella, che te nne pare de la fremma, |
| | Ch’aggio avuta co frateto? |
| | LELLA |
| | Ed aje faccie, ed aje core |
| 395 | De veniremme nnanze tradetore? |
| | MOSCARDINO |
| | E ch’aggio fatto? |
| | LELLA |
| | Niente. Unante juorno |
| | Viene a parlà co Rina. |
| | MOSCARDINO |
| | E ssi mme vene attuorno, |
| | Né mme vo’ lassà ì. |
| | LELLA |
| | Non è lo vero, |
| 400 | Palloniero mpostiero; |
| | Cà chella non tè pote padejare. |
| | MOSCARDINO |
| | E i’ che nne voglio fare; |
| | Mme stiano bone a mme ss’autre fegliole, |
| | Mpartecolare ccà Ntretella mia. |
| 405 | N’è lo ve’? |
| | NTRETELLA |
| | Lo malan che diè te dia |
| | Dint’a ssà faccie. |
| | MOSCARDINO |
| | Uh mo’ ssi taglie. |
| | LELLA |
| | Birbo, |
| | Mortella d’ogne festa, |
| | Nce lo bole. |
| | MOSCARDINO |
| | Ah, ah, ah, è bona chesta. |
| | LELLA |
| |
| | Tu te cride ca ncappata |
| 410 | So’ cottico, e ll’aje sgarrata: |
| | Ca si ll’odio de stò core, |
| | No nte pozzo chiù bedè. |
| | Io te voglio fà sfrattare |
| | Da ssà strata, ingannatore: |
| 415 | Ch’accossì s’hà da trattare |
| | No squarcione comm’a ttè. |
| |
| | SCENA XIII |
| |
| | NTRETELLA, MOSCARDINO, e RINA da lo barcone. |
| |
| | MOSCARDINO |
| | Ah, ah, ah. E puro è bero, |
| | Ca pe mme chessa lloco |
| | Se farria scortecà co no rasulo. |
| | NTRETELLA |
| 420 | Sì da la parte de lo cuozzo. |
| | RINA |
| | Oh bravo! |
| | Ancora stace ccà stò santarello |
| | De Zampognaro. |
| | MOSCARDINO |
| | E Rina, |
| | Pe mme non và mpazzia. |
| | RINA |
| | Uh janca mene |
| | E che buscia ch’hà ditto. |
| | NTRETELLA |
| 425 | Rina mia statte zitto: |
| | Lassamence spassare no tantillo. |
| | RINA |
| | Sì fà lo fatto tujo ca ll’aggio a gusto. |
| | MOSCARDINO |
| | Rina, e Lella ncrosione |
| | Pazzejano pe stò fusto; |
| 430 | Ma nce perdono ll’uoglio, e lo sapone. |
| | NTRETELLA |
| | E perché? |
| | MOSCARDINO |
| | Ca Ntretella |
| | Mme stà propio pittata int’a lo core. |
| | NTRETELLA |
| | E non te nne vuo’ ì meza bannera, |
| | Asso de coppa: Arzo: |
| 435 | Allevrecato: Spito senz’arrusto. |
| | RINA |
| | Oh bene mio che gusto. |
| | MOSCARDINO |
| | A mmè? |
| | NTRETELLA |
| | Statte d’arasso: |
| | Ch’a le chiocche t’abbio |
| | No zuoccolo de chiste, e te sfracasso. |
| |
| 440 | Milordiello arrojenato, |
| | A mme mo’ cò ste sgheresse? |
| | Tengo vagno, songo ammato, |
| | Sia Ntretella, uscia me ntenna... |
| | E lo chiappo che te mpenna, |
| 445 | Strafalario, scumm’allesse, |
| | Co chi crede de parlà? |
| | A mme mo’ co lo partito? |
| | Va te nforma, spilacito, |
| | Quanto sà stà capozzella; |
| 450 | Stà Nennella |
| | Quanto sà. |
| |
| | SCENA XIV |
| |
| | MOSCARDINO, RINA, e po TITTA. |
| |
| | MOSCARDINO |
| | Oh, bonora cca Rina, Rina mia. |
| | RINA |
| | Io pe ttè vao mpazzia: |
| | Lella more pe ttè. Tu no nce cride |
| 455 | Si no nc’abbusche? Titta |
| | Te ll’hà da fà. |
| | MOSCARDINO |
| | A preposeto: mo nnante |
| | Addenocchiato nterra |
| | M’hà cercato perduono ssò birbante. |
| | RINA |
| | (Oh Titta) Titta siente, e statte zitto. |
| | TITTA |
| 460 | Sentimmo. |
| | RINA |
| | E accossì: Titta |
| | T’hà cercato perduono. |
| | MOSCARDINO |
| | E de che muodo; |
| | Ma io mentr’isso s’arrecommannava |
| | Azzò no lo vattesse, |
| | Aggio alzato stò vraccio |
| 465 | Pe le mollà no nnaccaro: |
| | Zuffe... |
| | TITTA |
| | A chi mo? |
| | MOSCARDINO |
| | A chi te vole male, |
| | Amicone del core. |
| | RINA |
| | Ah, ah, ah, chest’è bona. |
| | MOSCARDINO |
| | Si te pozzo |
| | Servì a niente commanneme, quartiglia: |
| 470 | Ca ccà songh’io pe tte. (se nne và.) |
| | TITTA |
| | Vi’ che coniglio. |
| | RINA |
| | Lasselo ì, non vi’ ch’è no redicolo. |
| | TITTA |
| | Ma tu nfra tanto te devierete. |
| | RINA |
| | E comme. |
| | TITTA |
| | Ah Rina già canosco |
| | Ca tù co mmico no nc’aje genio, e puro |
| 475 | Saje pe tte che patesco: Tu te spasse |
| | Co chisto, e mo co chillo, |
| | E Titta sempe stà de na manera. |
| | RINA |
| | Chi d’ammore stà dinto a la galera |
| | Chiste vescuotte magna: |
| 480 | Agge pacienzia, e spera. |
| | TITTA |
| | So’ stracquo de sperare. |
| | RINA |
| | E tu arreposate. |
| | TITTA |
| | Io m’arreposarria |
| | Accant’a tte. |
| | RINA |
| | E buscia: |
| | Ca tu si’ auciello d’acqua, |
| 485 | Mo si’ ccà, mo si’ llà. Non aje fermezza. |
| | TITTA |
| | Chesto mo’ n’è lo vero, |
| | Cà schitto Rina mia |
| | Me stà dint’a lo core e lo pensiero. |
| |
| | Li scuoglie mmiezo maro |
| 490 | Si all’onne cederranno, |
| | Tanno |
| | Porrà mancare |
| | St’arma de fede a tte. |
| | Sempe costant’e forte |
| 495 | S’arraggio nfi a la morte, |
| | Non dobetà de me. |
| |
| | SCENA XIV |
| |
| | MEZACAPO, e RINA, e po NTRETELLA a lo barcone. |
| |
| | MEZACAPO |
| | Potta de me! si ll’ascio |
| | La perucca le levo. |
| | RINA |
| | Co chi ll’aje Mezacapo? |
| | MEZACAPO |
| 500 | Co chillo passaggiero, |
| | Ch’aggio sbarcato ccà: lo truffajuolo |
| | M’ha mollato no tridece de chiummo. |
| | RINA |
| | E tu pe chesso mo te vuo’ arraggiare? |
| | MEZACAPO |
| | E sì ca li denare |
| 505 | S’asciano nterra. |
| | NTRETELLA |
| | (Oh Rina, e Mezacapo |
| | Sentimmo.) |
| | RINA |
| | Piglia cca. |
| | MEZACAPO |
| | Che cosa è chesta? |
| | RINA |
| | È no tarì ch’aggio arrobbato a mamma; |
| | No nte piglià cchiù collera. |
| | MEZACAPO |
| | Po dice |
| | Non volè bene a Rina! |
| 510 | Bellezza mia commanname, ch’a mmaro |
| | Pe tte, facce de fata, |
| | Mme jettarria. |
| | RINA |
| | Pe farce na natata. |
| | A mme mo te nne viene: a mme, che saccio |
| | A quale dito tiene lo ponticcio. |
| | MEZACAPO |
| 515 | Non è lo vero, uocchio traseticcio |
| | Ca io pe tte a sto pietto... |
| | No ghi sapenno... vasta. |
| | NTRETELLA |
| | Ah, tradetore. |
| | RINA |
| | Ddi’ te guarde Ntretella; |
| | Ca mbe saccio, ca chella è ll’arma toja. |
| | MEZACAPO |
| 520 | Ma tu mpietto allummata |
| | M’aje Renella na sciamma. |
| | Che... |
| | RINA |
| | Zitto, zitto, ca mme chiamma mamma. (se nne va Rina.) |
| | NTRETELLA |
| | (Te voglio fa sta frisco.) (trase, e piglia na giara d’acqua.) |
| | MEZACAPO |
| | So’ chiacchiare, po dice ca le femmene |
| 525 | Non so galante. |
| | NTRETELLA |
| | Mezacapo. |
| | MEZACAPO |
| | Figlia, |
| | Gioja mia, che commanne? |
| | NTRETELLA |
| | Azzeccate cca sotta. Poveriello! |
| | Saccio, ca tiene mpietto |
| | Allummata na sciamma, |
| 530 | Nn’aggio pietà: primma che te nne vaje |
| | Te la voglio stutà. (le mena l’acqua ncuollo.) |
| | MEZACAPO |
| | Benaggia craje! |
| | Ntrete’ potta de nnico, |
| | Ch’aje fatto! Vi’ che lotano! |
| | M’avarrà ntiso quanto ll’aggio ditto. |
| 535 | Mo no mme sarva manco Veneviento. |
| | Fegnimmo: co le femmene bisogna |
| | Sapè sonare chiù de no stromiento. |
| | E mbe’ Ntrete’, so’ cose chesse lloco? |
| | NTRETELLA |
| | Nce volea no po’ d’acqua a tanto fuoco. |
| | MEZACAPO |
| 540 | Saccio, che mme vuo’ di’, ma compatisceme |
| | Ca all’utemo simm’uommene. |
| | NTRETELLA |
| | E ll’uommene |
| | Sa comme songo? |
| | MEZACAPO |
| | Commo? |
| | NTRETELLA |
| | Comm’a li pettorine, |
| | Ch’addefrescato ch’anno a na taverna, |
| 545 | Mettono sotta, e passano chiù nnante. |
| | MEZACAPO |
| | Non songo tutte soccie |
| | Le deta de la mano. |
| | NTRETELLA |
| | Ora nce canoscimmo |
| | Disse a lo Cacciatore l’arcegliola. |
| | MEZACAPO |
| 550 | Te canosco decette |
| | A la Vorpa lo Gallo. |
| | NTRETELLA |
| | Vi’ quanto saje. |
| | MEZACAPO |
| | So’ asciuto già de scola. |
| | NTRETELLA |
| | Addio sio Gallo. |
| | MEZACAPO |
| | Schiavo si arcegliola. |
| | NTRETELLA |
| | Scocchia cca. |
| | MEZACAPO |
| | Vuo’ abburlà. |
| | NTRETELLA |
| | Scocchia te dico. |
| | MEZACAPO |
| 555 | E ca vuo’ pazzeà. |
| | NTRETELLA |
| | E ttu faje addavero; |
| | Ma sto muorzo te ll’aggio d’annozzare. |
| | MEZACAPO |
| | Ntrete’, leva ssa baja: |
| | Ca tu mme farraje fa quarche spreposeto. |
| | NTRETELLA |
| | Che ffaje, che non te mpienne. |
| | MEZACAPO |
| 560 | Via mo faccimmo pace. |
| | NTRETELLA |
| | Non c’è pace, che tenga: abbìa, vattenne. |
| | MEZACAPO |
| |
| | Non tanto despietto |
| | Ca sonco arreddutto |
| | Pe tte no vascuotto, |
| 565 | Ca peno pe tte. |
| |
| | NTRETELLA |
| |
| | Vattenne frabutto, |
| | Passea pe sso nnietto; |
| | Te scarto, te votto, |
| | Non faje chiù pe mme. |
| |
| | MEZACAPO |
| |
| 570 | Non esse ncocciosa. |
| |
| | NTRETELLA |
| |
| | Tu parle a lo viento. |
| |
| | MEZACAPO |
| |
| | E chessa mo è cosa? |
| |
| | NTRETELLA |
| |
| | So’ sorda, non sento. |
| |
| | MEZACAPO |
| |
| | Vuo’ propio, ch’io chiagno? |
| |
| | NTRETELLA |
| |
| 575 | E chiagne, che buoje? |
| |
| | MEZACAPO |
| |
| | Aù cana, aje ragione. (chiagne.) |
| | E cchesse schiattiglie |
| | Agg’io da patè! |
| |
| | NTRETELLA |
| |
| | Sì sì, mo me piglie: |
| 580 | Ssa bella menzeone |
| | Sacc’io già che d’è. |
| |
| |
| |
| |
