| |
| |
| La taverna de Mostaccio, Napoli, A spese de Nicola de Bease, 1740 |
| a cura di Paologiovanni Maione |
|
|
|
|
|
| ATTO TERZO |
|
| SCENA PRIMMA |
|
| LELLA, e po MOSCARDINO. |
|
| LELLA |
| Chi lo ssa comme jette |
1100 | La cosa d’ajersera. |
| MOSCARDINO |
| Ste figliole mme jocano a tressette.. |
| Ma vecco Lella: E mbè? so’ azziune cheste, |
| Che baje facenno? |
| LELLA |
| (Uh! janca me, e che lotano! |
| Voglio cercare de nne lo fa ire.) |
1105 | Moscardino, vattenne, |
| Ch’aggio appura, che non venga Titta. |
| MOSCARDINO |
| Io non sapea, ca Lella |
| Era tanto deritta, |
| Che mme volea... |
| LELLA |
| Vide ca vene Titta. |
| MOSCARDINO |
1110 | Ma che? t’aje da mollare, |
| Né sempe ha da durare |
| Pe mme tanta desditta. |
| LELLA |
| Tu proprio vuo’ aspettà, che benga Titta. |
| MOSCARDINO |
| A lo mmacaro dimme... |
| LELLA |
| Ah bene mio |
1115 | Parlammo chiaro: Tu vuo’ fa l’ammore |
| Pe pazzeà co mmico |
| O co lo fine de lo matremmonio? |
| MOSCARDINO |
| Matremmonio? Nce voglio |
| Penzà no poco. |
| LELLA |
| No mo cca resuorvete. |
| MOSCARDINO |
1120 | (Io mo le voglio rennere |
| Chello, che mm’ha fatt’essa.) |
| LELLA |
| Non respunne? A la fine |
| Non aje sempe da ì rociolejanno |
| Da cca, e da llà: ca si bbe’ fusse strummolo, |
1125 | Puro aje da fa la fitta. |
| MOSCARDINO |
| Va trasetenne, che non venga Titta. |
| LELLA |
| Si non piglie mo stato |
| Quanno lo vuo’ piglià? De t’acquietare |
| La strata cchiù deritta, |
1130 | È chesta cca. |
| MOSCARDINO |
| (Vide ca vene Titta.) |
| LELLA |
| Quann’aje bona ntenzione, |
| Da dimano potriamo fa la scritta. |
| MOSCARDINO |
| Tu propio vuo’ aspettà, che benga Titta. |
| LELLA |
| T’aggio ntiso, briccone. |
| MOSCARDINO |
1135 | Ora da me che buo’? N’aggio ntenzejone |
| De me nzorà pe mo ca non è tiempo |
| Mo de fa ssa pazzia, |
| E siente lo pecché bellezza mia. |
|
| Mo li giuvane so’ aucielle, |
1140 | Che bonn’ì spezzolejanno |
| Pruna, fico, e percochelle, |
| E cantanno libertà. |
| Quanno vonno fa l’ammore |
| A li nide no nce vanno; |
1145 | Pecché llà lo Cacciatore |
| Nche l’abbista nce la fa. |
|
| SCENA II |
|
| LELLA, RINA, e po MEZACAPO. |
|
| LELLA |
| No nce può dire niente. Isso ha raggione. |
| RINA |
| Lella mia, creo ca saje |
| Commo rescette cauda la mmenzione. |
| LELLA |
1150 | Mme ll’aggio mmacenato, |
| Ma te dico lo vero, nce lo bole |
| Co st’Uommene nzustuse. |
| RINA |
| Oh ca so’ preziuse! |
| Le pastocchie, che lloro |
1155 | A nuje gliottere fanno, non so’ niente; |
| E po tanto le coce |
| Na norchia de le noste; |
| Ch’a nnuj’autre a la fine la buscia |
| Non se po di’, ch’è male: |
1160 | Pecché a nuje nc’è na cosa naturale. |
| MEZACAPO |
| (O te veccole cca.) schiavo Signora |
| Coffejatrice de nuje locche. |
| RINA |
| Io creo, |
| Ca tu mme vuoglie bene: e tutto chello, |
| Che piace a mmene, a tte non dia desgusto. |
| MEZACAPO |
1165 | Oh bravo manco male: |
| Ca si farrà porzì filosochessa. |
| LELLA |
| Che nce vuo’ fare, Mezacapo, è tiempo |
| De stare allegro mo, che simmo giuvane. |
| RINA |
| Eh già pecché l’ammore |
1170 | Mo s’è arreddutto a bernia, e poco songo |
| Chill’uommene, che ncappano. |
| LELLA |
| No chesto n’è defficele, |
| Ma chello, che mme pare a mme mpossibbole, |
| È che n’ommo ncappà pozza na femmena. |
| MEZACAPO |
1175 | Chi ve l’ha ditto chesto? |
| LELLA |
| Lo dich’io. |
| MEZACAPO |
| Ora ncopp’a st’articolo |
| Ve voglio fa sentì lo senzo mio. |
|
| Ogge l’Ommo è pescatore, |
| Mponta l’ammo de l’ammore |
1180 | Mpizza l’esca de lo vagno; |
| E buje commo a bavoselle, |
| Pecché amate lo guadagno, |
| Ve venite a fa ncroccà. |
| E si cierte Signorelle |
1185 | Fanno mo le schefoselle, |
| È pecché li pescature |
| Stanno tutte a li calure, |
| E n’ann’esca da jettà. |
|
| SCENA III |
|
| LELLA, RINA, e TENZA da dinto. |
|
| LELLA |
| Vi’ quanto sape Mezacapo. |
| TENZA |
| Rina? |
1190 | Vide ca la gallina |
| Negra me s’è perduta. |
| RINA |
| Qual’essa mo? |
| TENZA |
| La penta capelluta.. |
| RINA |
| Addio Lella: Mo vengo, e la cercammo. (se nne trase.) |
| LELLA |
| Vide, che nce sarrà pe sta gallina. |
1195 | Ma che raggia, che tengo |
| Co chill’asso de coppa |
| De Moscardino; ma n’è niente, tutte |
| Li giovenielle d’oje |
| Songo accossì; fidà no nte ne puoje! |
|
1200 | Non se ve a parlare, |
| Ch’è tutt’apprenzione, |
| No nce cchiù passione, |
| Cchiù amore no nc’è. |
| Ve vo’ coffeare |
1205 | Chi dice ca more, |
| No nc’è sto dolore |
| Creditelo a mme. |
|
| SCENA IV |
|
| TITTA, e po RINA. |
|
| TITTA |
| È possibele, ch’io |
| Da sta perra de Rina |
1210 | N’aggia d’avere maje no gusto? Essa |
| Ch’è de chelle, che sape |
| Quanta parme nce vonno a fa na canna, |
| Me promette gran cosa, e po mme nganna, |
| E beccola cca te. |
| RINA |
| Va saglietenne. (votata dint’a la Casa.) |
1215 | Va, c ape na schefienzia de gallina |
| Sta chiaja aje revocato. |
| TITTA |
| Addio, sia Rina. |
| RINA |
| Titta vattenne oje ca sto fratosa. |
| TITTA |
| Che fuorze no rescette |
| A genio tujo la cosa |
1220 | D’ajersera? |
| RINA |
| Uh è che lotano. |
| TITTA |
| Haje raggione: co mmico |
| Tu te spasse, e devierte; |
| Mme despriezze, mme vutte, mme strapazze, |
| E manco si’ contenta: |
1225 | Mme taccarie, mm’adacce, |
| Mm’accide, e manco vuo’ che m’allamenta. |
| RINA |
| Uh quanta belle cose, che saje dire. |
| TITTA |
| E tu quanta cchiù belle nne saje fare. |
| RINA |
| Io pe mme saccio cosere, e filare. |
| TITTA |
1230 | E fa la cana co chi t’amma, sgrata. |
| RINA |
| E fare chello, che mme pare, e piace. |
| TITTA |
| Ne pe mme nce speranza? |
| RINA |
| Addo’ la truove |
| Tu pigliatella. |
| TITTA |
| E lo pregà non serve? |
| RINA |
| Si non serve sign’è ch’a n’a patrone. |
| TITTA |
1235 | Sti sospire che ghietto? |
| RINA |
| No ghiettarele. |
| TITTA |
| Ste lacreme, che mm’esciono dall’uocchie. |
| RINA |
| Fattell’ascire pe le recchie. |
| TITTA |
| Ah barbara, |
| Femmena nata creo |
| Nfrà li sierpe, nfrà l’urze, e nfrà li lupe! |
1240 | Saccio ca mme vuo’ accidere |
| Co ste schiattiglie. Viene, |
| Forniscela na vota, |
| Levame da sto munno, e da ste pene. |
|
| Già che a pietà ste lacreme |
1245 | Manco te sanno movere, |
| Ecco sto pietto accideme, |
| No mme fa cchiù campà. |
| Manco non pozzo oddio |
| Avè da te la morte? |
1250 | Povero core mio, |
| Sciorte, |
| Che cchiù può fa? |
|
| SCENA V |
|
| TENZA, e RINA. |
|
| TENZA |
| Ffiglio’ te fete proprio |
| La casa n’è lo ve’? |
| RINA |
| Mo mme ne traso. |
| TENZA |
1255 | Io già t’aggio caputo: Tu te vuoje |
| Spassoleà co tutte, |
| E n’apprecà co nullo; ma la sgatre, |
| Ca già pe tutta craje |
| Voglio, che a Titta daje |
1260 | Fede de matremmonio. |
| RINA |
| Non sia maje. |
| Io marito? Io soggetta |
| A n’ommo peducchiuso, |
| Che s’ha da fare dommene, e patrone |
1265 | De me, de quanto tengo, |
| E si vo’ mme refila lo cozzone? |
| Non sia pe ditta. |
| TENZA |
| Tienelo pe fatto, |
| Sia dottoressa mia, |
| Abbesogna levare la pazzia, |
1270 | E da a do’ tene: craje |
| Te voglio arrecettà. |
| RINA |
| Vide che guaje. |
| TENZA |
| Ca non è bita chesta, |
| Che faje tu, figlia mia. |
| Saccio ca si’ modesta, |
1275 | Ca si’ na carta bianca, |
| Ma ll’uommene so’ arucole, |
| N’abbesognante darle confedenzia: |
| Ca si na parolella |
| Senza male pensiero |
1280 | Le dice pazzeanno, |
| Lloro vonno fa subbeto addavero. |
|
| Coll’uommene d’oje |
| Non ghì pazzejanno; |
| Pecché te la fanno |
1285 | O vuoje, o non vuoje: |
| Non direlo a mmè. |
| Da chiste lontano |
| Besogna che staje. |
| Pecché, si le daje |
1290 | No dito; la mano |
| T’afferra sì affè. |
|
| SCENA VI |
|
| RINA sola. |
|
| RINA |
| Vi’ che s’ha puosto nghiocca! addonca io |
| M’aggio da mmaretà quanno n’ancora |
| Aggio trovato n’ommo a genio mio; |
1295 | Afforza mm’aggio da pegliare Titta |
| Che pe me non è carne, e non è pesce? |
| Oddio che pena è chesta! |
| Io mme sento morì. Già bao perdendo |
| Mpenzannoce li senze. Ah! già me pare |
1300 | De vedè che lo mare |
| Addevorà mme venga! |
| Che lo Cielo de botta |
| Subbessare mme voglia! Che la terra |
| Sott’a li piede mieje, s’apra, e me gliotta. |
1305 | Negra me, che resorvo? |
| Vi’, mmiezo a che borrasca so’ mmattuta! |
| Vi’ che onne! che scuoglie! io so’ perduta. |
|
| Già sto mmiezo a la tempesta |
| Commo nave co l’antenne |
1310 | Sperze, rotte, e sconquassate, |
| Che pe ll’onne nfuriate |
| Vo’ fuì... né sape addo’. |
| Sciorte mia, che cchiù pretienne |
| Da chest’arma sbenturata? |
1315 | Già mme vide desperata, |
| No m’affriggere cchiù mo’. |
|
| SCENA VII |
|
| MEZACAPO, e NTRETELLA. |
|
| MEZACAPO |
| Votta sso vuzzo a maro oje stencenato. |
| NTRETELLA |
| (Oh Mezacapo! Mo che no nce tata |
| Me nce voglio spassà; le voglio bene |
1320 | No lo pozzo negà.) |
| MEZACAPO |
| Mantie’ mantiene, |
| Che te vaga lo piello. |
| NTRETELLA |
| Faje sempe co ssa lengua taccariello. |
| MEZACAPO |
| Oh Ntrete’, justo mone |
| Avea proprio no sfivolo |
1325 | De te vedere. |
| NTRETELLA |
| Ed io te sto aspettanno |
| Cchiù che no soleno aspettà na chioppeta |
| Li caule d’agusto. |
| MEZACAPO |
| Ahu da do’ le caccie |
| Sse belle chelle de parlà, che manco |
1330 | Le sa di’ no dottore. |
| NTRETELLA |
| Da dint’a chisto core addo’ pettato |
| Nce staje tu mmiezo, sgrato. |
| MEZACAPO |
| A mme sgrato! Ah non direlo Ntretella; |
| Ca si tu penetrasse l’affecchienzia, |
1335 | Che te porta ssa facce carpecata, |
| Derrisse fuorze, ca tu si’ na sgrata. |
| NTRETELLA |
| Ora chesto po no, ca so’ figliola... |
|
| SCENA VIII |
|
| MOSTACCIO, e li stisse. |
|
| MOSTACCIO |
| Oje Mezacapo siente na parola. |
| NTRETELLA |
| Uh mo si chisto no mme fosse patre |
1340 | Vi’ che la mannarria. |
| MOSTACCIO |
| Non te muove? |
| MEZACAPO |
| Mo vengo (gioja mia |
| Vi’ ca mo torno, aspettame.) |
| MOSTACCIO |
| Sa che buo’ fa Ntretella? |
| Va preparanno na colaziongella |
1345 | Pe Mezacapo quanno torna. |
| NTRETELLA |
| È lesto. |
| MOSTACCIO |
| Jammoncenne. |
| MEZACAPO |
| Mo vengo. |
| NTRETELLA |
| Torna priesto. |
|
| SCENA IX |
|
| NTRETELLA sola. |
|
| NTRETELLA |
| Ahu diceno buono le grimmalde, |
| Ch’a sto munno, che corre, |
| No nce gusto furnuto. |
1350 | Mo che steva a lo meglio |
| Messere a sconcecareme è benuto, |
| Ma che doce dellietto |
| È lo parlà d’Ammore |
| Co chi te port’affetto, |
1355 | E te stace stampato int’a lo core. |
|
| Co lo fatillo |
| De chisto core |
| De st’arma mia |
| Sempe l’ammore |
1360 | Nce forria fà. |
| E dire a chillo, |
| Te voglio bene, |
| Tu vuo’ che mora; |
| Ah quanno vene |
1365 | Chella bell’ora |
| De nc’accocchià. |
|
| SCENA X |
|
| MEZACAPO, e MOSTACCIO, e po NTRETELLA. |
|
| MOSTACCIO |
| Ah, ah, mm’aje fatto ridere de core. |
| MEZACAPO |
| Ma no nce l’ha boluto? |
| MOSTACCIO |
| Sine sì bene mio ca so’ scusuto. |
| MEZACAPO |
1370 | Orsù te si’ scordato... |
| MOSTACCIO |
| O sì la colazione. |
| Addove si’ guaglione, |
| È cuotto lo pullasto? |
| NTRETELLA |
| È lesto tutto. |
| MOSTACCIO |
| E bia mettite tavola. |
| MEZACAPO |
1375 | Che te nne pare so’ tornato subeto. (a Ntretella.) |
| NTRETELLA |
| Comm’aje fatto? |
| MEZACAPO |
| Non sa co no partito. |
| MOSTACCIO |
| Commo n’aje appetito? |
| MEZACAPO |
| A chi? a funno de mare |
| Pozza ì ssa parola. |
| NTRETELLA |
1380 | Ah, ah, ah. |
| MEZACAPO |
| Compa’, no po’ de chiaro |
| A genio tujo. |
| MOSTACCIO |
| Cacciale di lampe |
| De chello schetto. |
| NTRETELLA |
| Assettate. |
| MEZACAPO |
| Na cardata a stò frisco |
| Te vace dint’all’ossa maste. |
| MOSTACCIO |
| È bero; |
1385 | Ma lo magnà de la taverna proprio |
| È cosa de segnore, |
| E pare ch’aggia po n’autro sapore. |
|
| La taverna nche ce accuoste |
| A l’allegra te fà stare: |
1390 | Chillo frie, |
| Chisto arroste, |
| N’autro porta lo magnare; |
| Cca se sciacqua, |
| Llà se sbatte, |
1395 | Ccà rummore de piatte; |
| Chi contrasta, |
| Chi peppea, |
| E chi canta llara rà. |
| Chi se nfeccia, e chiacchiarea, |
1400 | Chi sta sazio, e chiù ttaffea; |
| Chi a la mmorra sta juoquanno, |
| Chi sonanno, e chi cantanno, |
| E cadenno se nne và. |
|
| SCENA ULTIMA |
|
| TITTA secutanno MOSCARDINO, e po tutte. |
|
| TITTA |
| Lassa bonora lassa. (a Tenza.) |
| MOSCARDINO |
| Viene viene. |
| MOSTACCIO |
1405 | Che d’è, che d’è? |
| MEZACAPO |
| Ch’è stato? |
| NTRETELLA |
| Uh negramene. |
| TENZA |
| Cojetate. |
| RINA |
| Via Titta. |
| LELLA |
| Ch’è succiesso? |
| TITTA |
| Rina lo ssà. |
| TENZA |
| Ne ne? v’aggio caputo: |
| È stata gelosia. |
| Or’io voglio fornì ssa guittaria. |
1410 | Titta Rina è la toja pe despietto |
| De sto segnore. |
| RINA |
| Io mme lo pigliarraggio, |
| Ma quanno vedarraggio |
| Ca Lella s’hà sposato Moscardino. |
| MEZACAPO |
| Dice buono, fornitela ssa bbaja, |
1415 | Siò Moscardi’, siè Lella, vaja vaja. |
| LELLA |
| Io pe da gusto a Rina mme contento. |
| TITTA |
| Ed io porzì. |
| MOSCARDINO |
| Ed io non sò fuggire |
| Quel che prescrive il fato. |
| MEZACAPO |
| E biva il sosamello innargentato. |
| TITTA |
1420 | Tenza chesto pe ttè schitto lo faccio. |
| MOSTACCIO |
| Ed io da fora comm’a catenaccio. |
| TENZA |
| E a mmè compare mio |
| Sola mmè vuo’ lassà? |
| MOSTACCIO |
| Mmè te pigl’io. |
| LELLA |
| Pe fà sta festa cchiù combrita, e bella |
1425 | Mezacapo, e Ntretella |
| S’avarria da sposà. |
| MOSTACCIO |
| Sia fatto. |
| MEZACAPO |
| E biva |
| Mostaccio mio. Tù si’ contenta? |
| NTRETELLA |
| E commo |
| No mmuo’ che stia contenta |
| Quanno piglia marito na Zitella? |
| TUTTI |
1430 | E biva viva la Tavernarella. |
|
| Che doce contiento |
| Che sento a sto pietto! |
| Chiù bello dellietto |
| No ncè, non ssè dà. |
|
|
|
|
|
|
|
|
|
|
|
|
|
|
|
|
|
|
|