La taverna de Mostaccio

La taverna de Mostaccio, Napoli, A spese de Nicola de Bease, 1740

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

ATTO II

SCENA PRIMMA

RINA da lo barcone sujo felanno, e LELLA da lo sujo cosenno na nforretella de cammisa.

LELLA

Rina, po dice, ca non si’ Massara.

RINA

Chello ch’io mo aggio da dire a Lella:

Da quant’ha, che n’aje visto

585

L’affetto tujo?

LELLA

Chi? chillo mpostiero?

RINA

Uh mo Mpostiero! asciuoglie;

Che buo’ negare, ca le puorte affetto?

LELLA

No mmeretà, ma quanno accossì fosse,

Saje, ca l’affetto nuosto è gghiusto comme

590

A lo riso sarduoneco,

Che no nce passa da cca, cca.

RINA

Mo propio

Ll’aje ditta justa. Uh te Mostaccio, Lella,

Scorcogliammo quarcosa a sso nzertone.

LELLA

Uh lassammolo ire ch’è sozzuso.

RINA

595

O sozzuso, o pulito;

Chill’uommene, che danno,

Nò l’avimmo da ire mesuranno,

Lella mia, co lo squatro, o lo compasso:

Ca puorco schifo non se fa maie grasso.

SCENA II

MOSTACCIO, e le mmedeseme.

MOSTACCIO

600

Oh te! vecco li sciure de Posileco.

RINA

Mostaccio, ch’aje portato?

MOSTACCIO

Scinne ccà, ca lo bide.

RINA

Mo vengo: scinne, Lella.

LELLA

Comme vuoje.

MOSTACCIO

Sine sine scennite tutte doje.

605

Aggio da ire tanto, e tanto attuorno

A ste doje giovenelle,

Che nce ll’aggio da cogliere no juorno;

Pecché se sole di’, ca quanno n’ommo

Se vo’, mme ntenna uscia, fare... Che saccio

610

No po’ de chella...

RINA

Eccoce ccà Mostaccio.

MOSTACCIO

Oh bemmenute.

RINA

Via dance quarcosa.

MOSTACCIO

Pigliateve quant’aggio.

Te ccà: piglia sia Lella.

LELLA

Uh comm’è bella stà carcioffolella!

615

Provammo; io mo’ de cheste me n’abbotto.

MOSTACCIO

Sape de caso cuotto?

LELLA

Me n’abbotto. (forte.)

MOSTACCIO

Oh! che d’è sò strellà! Che songo surdo?

RINA

Ah, ah, ah, ah.

LELLA

Abbiannillo mo’.

RINA

Mo ne l’abbio.

MOSTACCIO

Rammagliettiello mio,

620

Io t’aggio da parlare.

RINA

E io porzì, ma sa comm’aje da fare?

LELLA

(Che le darrà a rentennere!)

RINA

Tu mmiero le doj’ora

Vienetenne da ccà vestuto femmena,

625

Ca parlammo.

MOSTACCIO

E pecché vestuto femmena?

RINA

Ca si a lo bruoco te vedesse Mamma,

Credendo ca si’ femmena nò strilla.

MOSTACCIO

Si, mme quatra la cosa,

Vi’ ca io mme ne vengo.

RINA

Vienetenne.

LELLA

630

Rina, vejat’a ttene! (redenno.)

Vi’ commo sciale co lo bello tujo.

RINA

Che nn’aje mmideja?

LELLA

Securo.

MOSTACCIO

Ora chesta è cchiù cauda,

Vuje decite addavero?

RINA

635

Vide comm’è carillo!

LELLA

Bello naso!

RINA

Bell’uocchie aggraziate.

MOSTACCIO

Auh! va t’arrepara ste stoccate.

Belle fate ciancioselle,

No tammurro è chisto core,

640

Site vuje li mazzarielle;

Via spassateve a sonà.

Taratappa tappa ttà.

Ma nfratanto vuje sonate,

Ed io sento lo dolore,

645

Sse manelle dellecate

Ve le boglio mo vasà (le vo’ vasà la mano, e lloro non vonno.)

Chest’è troppa canetà. (se nne và.)

RINA

Ah, ah, ah, vi’ comm’è preziuso.

LELLA

Vecco cca Moscardino.

RINA

Sore mia,

650

Trova n’auta mmenzione co chist’auto

Pe le fa no corrivo. (se nne và.)

LELLA

Sì spassammonce.

SCENA III

MOSCARDINO, e LELLA.

MOSCARDINO

Che nc’è sia Lella, t’è passata ancora

La boria de mo nnante?

LELLA

Uh quanta cose

Che t’avarria da dire.

MOSCARDINO

E bia dimmelle.

LELLA

655

No ca po vene Titta.

MOSCARDINO

E comm’aggio da fare?

LELLA

Vienetenne

A doje ora ccà sotta, ca t’aspetto:

M’azzò che Titta mio non te canosca,

Avarrisse da fegnere lenguaggio.

MOSCARDINO

660

Comme vuo’, parlarraggio

Spagniuolo, ca nne saccio doje parole.

LELLA

E buono.

MOSCARDINO

De lo riesto tu mo cride,

Ca io vao appriesso a Rina.

LELLA

E ch’è buscia?

SCENA IV

TENZA da parte, e li stisse.

TENZA

E n’auta vota ccà sso scauza cane!

665

Voglio sentì che dice.

MOSCARDINO

Lella mia

Io mo co Rina! Essa

Se mpettolea co mmico.

TENZA

Ah busciardone!

MOSCARDINO

E chillo mascarpone

Chella gliannola negra

670

De la mamma.

LELLA

Chi Tenza?

MOSCARDINO

Sì: mme vene a nfettà matina, e sera.

TENZA

Uh facce mia chest’aggio da sentire,

E no lo sbrenzolejo? oje spoglia mpise,

Io songo mascarone?

675

Io te vengo a nfettà? vuo’, che t’afferra,

E te scippo sto naso

De cestarella? Lella figlia mia,

No lo credisse a sto frustato?

LELLA

Saccio

Quanto pesa ssò meza perucchella.

MOSCARDINO

680

Cheste so’ tutte grazie,

Che mme fa la sia Tenza, e la sia Lella.

LELLA

Lassalo ì, Commare:

Se sa ca chisto è n’argatella. Quanta

Femmene vede, tutte quante dice

685

Ca moreno pe isso. Ma sacc’io

Comm’ave da fenì.

MOSCARDINO

Sì bene mio,

Decite comm’avimmo da fenire?

LELLA

Sienteme, Tenza mia.

TENZA

Te sto a sentire.

LELLA

Oje li giuvene,

690

Ma tal’e quale;

So’ comm’a surece

De speziale,

Che pe na refola

De zuccariello

695

Dint’a le trapole

Vanno a morì.

Nò nte ne ridere

Sà squarcionciello:

Ca sta desgrazia

700

Te po succedere;

E da Posileco

Chino de vrognola

Te nn’aje da ì.

SCENA V

MOSCARDINO, TENZA, e po MEZACAPO.

MOSCARDINO

Oh! te te! simmo surece

705

De speziale puro.

TENZA

E che te mmacene!

MOSCARDINO

Ma io non so’ na bestia, che cca bengo

A ghiettare le doppie.

TENZA

E addo’ le ghiette,

Ca mme l’aduno io co no panaro.

MOSCARDINO

Schitto a lo marenaro,

710

Che ccà mm’ave portato,

Pe regalo na doppia ll’aggio dato.

TENZA

Na doppia!

MOSCARDINO

E che te cride?

MEZACAPO

(Ecco l’ammico.)

Oh sio truffa viagge, a sonature

Viene a fa serenate.

MOSCARDINO

715

A mme truffa viagge! Vi’ sia Tenza,

Che fremma aggio d’avè?

TENZA

Via Mezacapo,

Ca mo si mpertenente:

Aje avuta na doppia, e t’allamiente?

MEZACAPO

Chi m’ha data ssà doppia?

TENZA

Stò segnore.

MOSCARDINO

720

Mo derrà, ca n’è bero, (a Tenza.)

Statt’a sentì...

MEZACAPO

Ah, ah, tu non saje buono

Chi è sto scava rapeste: aje da sapere,

Ch’a mme pe lo veaggio

Mm’a mollato no tridece de chiummo.

MOSCARDINO

725

Chi mo?

MEZACAPO

Tu strafalario

E si no mme lo cagne,

Ssa spennazzola la facc’ì pe ll’ario.

MOSCARDINO

Vattenne lazzarone,

Ca te faccio sto pietto comm’a crivo.

MEZACAPO

730

A truffajuolo; leva Tenza...

MOSCARDINO

Tienolo,

Ca cca nterra lo lasso.

SCENA VI

NTRETELLA, e li stisse.

NTRETELLA

Janca me che fracasso!

TENZA

E bia mo scumpela.

NTRETELLA

Mezacapo, ch’è stato?

MEZACAPO

Ll’aggio co sto frustato.

MOSCARDINO

735

Vi’ quanta chiacchiare aje

Mo che staje mmiezo a chesse.

MEZACAPO

Potta! lassatemillo

Nnaccareà.

NTRETELLA

Tu fusse quà tentillo?

TENZA

Vavattenne da cca mo che staje buono.

MOSCARDINO

740

Pe mmo te la perdono,

Ma nnante craje matino

T’aggio da fa vedè chi è Moscardino.

Vedite che guappe

Mme veneno nnante!

745

Si sotta mme ncappe,

Te voglio, birbante,

Mezzare a parlà.

Vi’ comme fereja...

Tenite bonora...

750

Si sciala, grelleja,

Nce stace la gnora,

Che t’aggio da fà!

SCENA VII

MEZACAPO, TENZA, e NTRETELLA.

MEZACAPO

Ora che ve nne pare

De s’assedia feneste?

NTRETELLA

Oh veramente

755

Tu si’ na bella cosa.

MEZACAPO

Che ancora staje marfosa,

Cimmarolella mia?

NTRETELLA

Ora da me che buo’? via sfratta abbia,

Ca n’avimmo abbesuogno de buffune.

TENZA

760

Che state accostiune?

MEZACAPO

None: la sia Ntretella

Se vo’ spassà co mmico.

NTRETELLA

Io mo’ spassà co ttico?

No nce vol’autro, tè che bello sfuorgio!

TENZA

765

Ma ch’è stata la cosa?

NTRETELLA

Tenza non ghi sapenno.

TENZA

Senza che parle, figlia mia, te ntenno.

Tu mo nce ll’aje co chisto

Pecché l’avarraje visto

770

Ciammellà co quacc’autra?

NTRETELLA

Justo chesso.

MEZACAPO

Ma non dice ca essa s’acchiappaje

Doje libbre de torrone, che le deze

Non saccio chi a la festa.

TENZA

Che tu porzì nce iste?

MEZACAPO

E a quale festa

775

Non và stà segnorella.

NTRETELLA

E tu a quale fontana

Non tè firme a sciacquà.

TENZA

Lloco scusateme,

Ca pegliate vajano tutte duje

Pecché se sole dicere...

MEZACAPO

780

Stà ntiso.

NTRETELLA

Ah, ah, ah, sta ntiso. (contrafà Mezacapo.)

Comme si’ brutto! le’ facce de mpiso!

Tu mo’, pecché bide,

Ca rido con ttico,

Già pienze, già cride,

785

Ca songo la toja?

Ma non te n’adduone

Ca si’ nò levrone,

Nò brutto sciollà!

(N’è bero, è na gioja:

790

Io chesto lo dico

Pe farlo arraggià.) (a Tenza.)

A mme viene a dire:

Ntretella Ntretella,

Mme sento morire;

795

E pone co chella

Mme faje la pazzia:

Uh mo’ te vorria

Ssà facce sceccà.

TENZA

Uh vide vide Tutta ca secuta

800

Chillo squarcione co la mazza mmano.

MEZACAPO

E isso fuje co la spata allato.

SCENA VIII

TITTA co na mazza mmano attaccanno MOSCARDINO, e li stisse.

MOSCARDINO

Tu non se sà che buo’ da me?

TENZA

Ch’è stato?

MEZACAPO

Fermate, Titta.

TITTA

Siente, marionciello,

Pe l’ammore de chiste

805

Non te rompo sse braccia;

Ma nce vedimmo appriesso. (se nne trase.)

MOSCARDINO

Po dice p oca n’Ommo è temerario!

S’io mo’ accedeva chisto

Dint’a la casa soja,

810

Che se decea de me?

MEZACAPO

(Bonora chisto

Si nò mme vene voglia

Proprio de lo sguarrà.)

TENZA

Ma ch’è succiesso?

MOSCARDINO

Mme cercaje ll’auto juorno ssò birbante

Mpriesteto seje ducate, io nce le dette,

815

Mo songo juto pe cercarencille,

E isso dapo’ avermele negate

Corre a piglià la mazza.

TENZA

E tù stò spito

Pecché lo puorte?

MOSCARDINO

E si c’aveva paura

De quaccuno pe farcelo provare.

MEZACAPO

820

E pecché nò ll’aje fatto?

MOSCARDINO

Ca la sore,

Che steva a la fenesta,

Mme trattenne decenno:

Lassalo jre pe l’ammore mio;

Ma si lo scontro maie...

MEZACAPO

Te veccotillo

825

Ca mo’ torna.

MOSCARDINO

Ora chisto

Se vo’ propio abbuscà na remessione.

Jammoncenne. (se nne fuje.)

MEZACAPO

Ah, ah, ah, ah, ah.

TENZA

Sì, leva l’accasione. (Titta torna ad ascire.)

TITTA

Se l’ha felata?

MEZACAPO

Sine, nche t’ha bisto

830

Auzaje li puonte: ma che fù la cosa?

TENZA

Comme nò ll’aje sentuto?

MEZACAPO

E tù a chillo daje creddeto?

TITTA

Ssò Lazzaro

È scravaccato dint’à lo Ciardino,

Addo’ Lella tenea spase li panne;

835

E co na magna dellegenzea bello

S’aveva arravogliato doje cammise;

E mente le boleva

Mpizzareselle dint’a li cauzune,

Io mme ne songo accorto,

840

Aggi’ auzata la voce: isso ha lassato

Li panne, io con a mazza

Ll’aggio po secutato.

TENZA

Ah, ah, ah, ah, oh bene mio

Ca mo’ mme piscio sotta! e iss’ha ditto

845

Ca t’hà mprestato seje ducate.

TITTA

A mme?

MEZACAPO

Ca tu nce ll’aje negate,

Ca si n’era pe soreta

Isso già t’accedeva.

A TRE

Ah, ah, ah, ah, ah.

TITTA

850

Vide che ba vennenno

Da cca st’allevrecato.

MEZACAPO

No chisto de nuje duje

Ha da esse no juorno dessossato.

È na cosa curiosa

855

Co sse meze perucchelle,

Vonno fà li ncappatielle,

Li segnure co lo donno,

E se moreno de suonno,

Fanno zelle pe campà.

860

Vedarraje n’allevrecato,

Che non have che magnare,

E s’appalda a lo treato

Pe fà di’ ca spenne e spanne:

Ma po quann’a da pagare,

865

Si li zaffie zaffie no le manne,

Nò nce taglio de pagà.

TENZA

Ah, ah, ah, bravo bravo.

Titta, damme licienza.

TITTA

Te so’ schiavo.

SCENA IX

TITTA, e RINA.

TITTA

Tutto chesto va buono, ma nfratanto

870

Rina sempe commico è cchiù schiattosa.

RINA

Titta, ddo’ è ghiuta mamma?

TITTA

Appriesso a Mezacapo.

RINA

Oh ll’aggio a gusto. (va pe se nne trasire.)

TITTA

E mo’ addo’ vaje?

RINA

Mme ne saglio ncoppa.

TITTA

È possibile, Rina,

875

Ch’io t’aggia tanta poca grazia? oddio

Tutto lo sdigno, e ll’odio tujo songh’io.

RINA

Siente Titta: l’affetto de nuje femmene

È fatto a spacca strommola,

O caro lo bennimmo,

880

O lo donammo a tombola.

TITTA

Ma tu a mme nò lo binne, né lo duone.

RINA

(Porzì chisto nce voglio a la menzione.)

Titta, chisto n’è luoco, e non è ora

De parlà de ssè cose: tu sta sera

885

Vienetenne a doj’ora, pecché io

Te starraggio attennenno

Pe faret’a canoscere

Si te dono l’affetto, o te lo benno.

TITTA

Rina, e che nova è chesta che mme daje!

RINA

890

Ma tu che signo faje

Azzò che non pigliammo quacche grancio?

TITTA

Sisco.

RINA

E po ch’aje sescato.

Azzò che meglio saccia ca si’ Titta,

Accommenza a parlareme franzese;

895

Ca saccio can ne saje.

TITTA

Sì ca mme ne mparaje

Quatto parole chillo affeziale,

Che stette ccà stà stata.

RINA

Puo’ dicere cchiù mo’ ca songo sgrata?

TITTA

900

Nò, mo’ canosco ca mme puorte ammore.

RINA

Eh! lo sape sto core

(Già mme scappa la risa.)

Quanto pe ttè... tu mme vuo’ fa arrossire.

TITTA

Rina nò cchiù, ca tu me faje morire.

905

Quanno parle, quanno ride,

Bella vocca saporita,

Tu m’accide,

E me daje vita;

Mme daje gusto, e faje penà.

910

E co ss’uocchie pinte e belle,

Che doje stelle

So’ d’ammore;

Faje contento chisto core,

E chest’arma sosperà.

SCENA X

RINA, NTRETELLA, e MEZACAPO co lo calascione.

RINA

915

Nigro te già te cride esser arrivato,

Ma da cca n’autro poco te n’adduone

O vecco Mezacapo

E se nne vene co lo calascione.

Oje Ntretella Ntretella?

NTRETELLA

920

Che buo’, Renella mia?

RINA

Mo vene chesta via

Co lo ntrunchete ntranche Mezacapo.

NTRETELLA

Ne ne? st’amm’a sentire

Addo’ vace a sonà.

RINA

Zitto ch’accorda.

MEZACAPO

925

Che cancan ha sta corda?

RINA

A tte bene la cosa. (a Ntretella.)

NTRETELLA

Ah nce lo pperde.

RINA

Non può credere quanto

Mme fa mollà stò suono

NTRETELLA

E a mme porzì.

MEZACAPO

930

Mo sta sopierchio buono. (canta Mezacapo, e sona.)

Nenna, tu vide commo chiagno e strillo,

E sempe te vuo’ fa cchiù ncocciosella;

Che t’aggio fatto che mme strazie dillo,

Cimmarolella mia cimmarolella.

935

Saccio ca sta aparato lo mastrillo,

Pecché mme la vuo’ fa la postecella;

E io mme voglio fa no sorecillo

P emme la rosecà ssa cotenella.

Ssa cotenella e Rina,

940

Io so’ lo gallo e tu si’ la gallina.

NTRETELLA - RINA

E la gallina, e sette

Chi vo’ ì a spasso, cca so’ le barchette.

MEZACAPO

Ahù chi vo’ morire,

Cresommolella meje co ll’ossa duce.

945

Oh ca te vedo ridere,

Core mio, t’è passata la mengrania?

NTRETELLA

Oh co ttico mme voglio peglià collera?

Non songo tanto pazza.

Uh negramene ca mme so’ scordata

950

De serrà lo cascione.

MEZACAPO

E mbe, Ntrete’, addo’ vaie?

NTRETELLA

Addio Rinella.

RINA

Nce vedimmo craje. (se ne va Ntretella.)

Che nce vuo’ fa, tutte le serenate

So’ de la sia Ntretella.

MEZACAPO

955

E si a tte maje non pozzo

Arrivarete a di’ na parolella.

RINA

E che parola mm’aje da dire?

MEZACAPO

Vasta.

RINA

Ora sà che buo’ fa? vestuto femmena

Vienetenne a doj ora,

960

E a la porta de Lella

Aspettame, ca vengo, e nce parlammo.

MEZACAPO

E pecché mo da femmena?

RINA

Ca si pe sciorte nce vedesse mammema,

Credenno ca si Lella non fereja.

MEZACAPO

965

E biva Rina.

RINA

Ora via sù governate.

MEZACAPO

Commo te nne vuo’ ire,

E non mme vuo’ ntonà na paisanella?

RINA

Aggi appaura, che non venga mamma...

MEZACAPO

E che t’ascia facenno quà sbreuogno?

970

Via, vance mo’.

RINA

Via sona. Mme vregogno. (Mezacapo sona, e Rina canta.)

Comme la voglio fare sta sagliuta,

Comme la voglio fa ssa pettorata?

Vienece, Nenna mia, viene m’ajuta,

Che te pozza vedere mmaretata.

975

Vi’ ca la notte già se n’è benuta,

Vide ca chesta è ll’ora che m’aje data;

Scetate, Nenna, si te si’ addormuta,

No mme fa stare cchiù mmiezo a sta strata:

Mmiezo ssa strata e Lella,

980

Quanno mme la vuo’ aprì ssa fenestrella.

MEZACAPO

Ssa fenestrella, e agnesa

Ca ca mme faje morì, facce de mpesa.

RINA

Uh vedo venì mamma,

Vavattenne vattenne.

MEZACAPO

Auza la gamma... (fuje Mezacapo.)

SCENA XI

TENZA, e RINA.

TENZA

985

Ah facce tosta, presentosa, guitta.

Te cride fuorze che non t’aggia ntiso.

RINA

E ch’aggio fatto che! na canzoncella

Manco non se po di’.

TENZA

Capo cardella,

Tu non saje, che bo’ dicere

990

Cantà co n’ommo a sciato a sciato.

RINA

Uh duorme

Pe cchesto ncanto, ca so’ figlia a Tata;

Né fegliola norata

Po sta mmiezo a n’aserzeto.

TENZA

N’è lo vero, è buscia,

995

Ca mo lo Munno è tristo, figlia mia.

Mo non serve cchiù a di’ so’ nnorata,

N’anno filo le femmene bone;

Ca lo tiempo, e la malantenzione

Fanno ll’ommo arrevare addo’ vò.

1000

Tu può stà comme vuo’ reterata,

Te può fa de na vreccia cchiù tosta;

Ca si n’ommo te face la posta,

Si è Ciaferro, va scappa si può.

SCENA XII

RINA sola.

RINA

Veramente na femmena a l’antica

1005

È sempe pettemosa;

Ma mo’ lo Munno è fatto n’auta cosa.

E io da quatto juorne,

Che nce aggio da campà, nce voglio stare

Co lo core contento;

1010

Ma si mbe, ca non sento

Passione pe nesciuno int’a sto core,

Puro vedo, ch’Ammore

Canoscenno ca io

No nce lo voglio propio int’a sto pietto;

1015

Nce vo’ trasì pe forza, e pe despietto.

Non così lo Cacciatore

Va la cerva seguitanno,

Comm’alliegro, e pazzeanno

Vene ammore

1020

Appriesso a mme.

E mme vole pe despietto

Tormentare chisto pietto,

Senza dirme lo pecché.

SCENA XIII

Notte.

MEZACAPO, e MOSTACCIO vestute foretane: Lo primmo da na parte, e lo secunno dall’autra.

MEZACAPO

O la bella fegura del gallotto!

1025

P emme non saccio commo

A Rina l’è benuto sso crapiccio.

MOSTACCIO

Creo ca paro no cancaro mpasticcio.

MEZACAPO

Già saranno doj’ora: Uh comm’è bruoco!

MOSTACCIO

Mo d’amore lo fuoco

1030

Spero d’addefrescà.

MEZACAPO

Chesta de Lella

A mme pare la porta.

MOSTACCIO

Chesta pare de Rina la portella. (Mezacapo va a mettere sotto la porta, de Lella, e Mostaccio sott’a chella de Rina.)

SCENA XIV

MOSCARDINO, e TITTA accappottate, e li stisse.

MOSCARDINO

A le mbroglie de notte

Besogna stare accuorto.

TITTA

1035

Ammore, votta tu ssa varca mpuorto.

MOSCARDINO

Ma si non faccio arrore.

TITTA

Ma si non piglio grancie.

MOSCARDINO

Chesta me pare Lella.

TITTA

Chessa Rina mme pare.

MOSCARDINO

1040

Dammo lo signo mo co lo parlare.

TITTA

Adiù madamuselle.

MOSCARDINO

(Ah potta d’oje!

No franzese.)

MOSCARDINO

Adios, adios mucciaccia.

MEZACAPO

(Mmalora no Spagnuolo.)

TITTA

Mme samble, che vù fet

1045

An abì magnifiche.

MOSCARDINO

(Ah, ah, ah, vo sapè si magno fico,

È vuoglio, è vuoglio, è vuoglio.)

MOSTACCIO

En mi persona chiere,

Che tu furtuna aglies.

MEZACAPO

1050

(Va cercann’aglie! è feccia, è feccia, è feccia.)

MOSCARDINO

(Ma jammonce scostanno,

Ca sto monsù mme sconceca lo juoco.)

MEZACAPO

(Ma jammonce arrassanno

Ca chisto lloco mme po dare mpaccio.)

TITTA

1055

Rien vù di’?

MOSCARDINO

No ablas?

TITTA

Ma dov’è ghiuta?

MOSCARDINO

Dove se mpezzata? (Mostaccio e Mezacapo passano mmiezo.)

MOSCARDINO - MEZACAPO

Sta notte la facimmo la frettata.

SCENA XV

TENZA co na lucerna mmano coperta co lo mantesino, e li stisse.

TENZA

Governate commare.

Uh sto mmarditto viento

1060

Mme la farrà stutà ssa lucernella.

MOSCARDINO

Lella mia. (afferra Mezacapo.)

TITTA

Rina bella. (afferra Mostaccio.)

MEZACAPO

(Cancaro! Chist’è n’autro.)

MOSCARDINO

(Gliannola cca nce traseto sta sera.)

TENZA

Maramè chi so’ chiste?

MOSCARDINO

1065

Ma tu non parle?

TITTA

No respunne Rina?

TENZA

(Rina! lo Cielo mme la manna bona

Ccà nce quacche sbrevuogno.)

MOSCARDINO

Viene cca gioja mia.

MEZACAPO

Ah, ah, ah.

TITTA

Damme ssa mano.

MOSCARDINO

Ah, ah, ah.

MOSCARDINO - MEZACAPO

1070

Oh lo bello arravuoglio.

TENZA

Or via scommigliammolo sso mbruoglio. (Tenza scommoglia la cannela, e se mette mmiezo a lloro.)

MOSCARDINO

Oh bonora!

TITTA

Oh deaschence!

MEZACAPO

Mostaccio.

MOSCARDINO

Mezacapo.

TITTA

Fuimmo ca si no so’ sbregognato.

TENZA

1075

Chesto, che d’è?

MOSCARDINO

Lella mme l’ha ficcato. (se nne vanno Moscardino e Titta.)

TENZA

E mbè che bernia è chesta,

Che baje facenno tu? (a Mostaccio.)

MEZACAPO

N’è niente, Tenza,

Ch’è stata na pazzia.

TENZA

Pe tte lo creo

Ma sto musso de crapa,

1080

Che bace appriesso a figliema,

Mme l’have da pagà.

MOSCARDINO

Vattenne a cancaro,

Faccia de secutorio;

Ca mo, che sto arraggiato,

Te le sono a deritto.

MEZACAPO

E bia, ch’è stato?

1085

Va trasetenne Tenza.

TENZA

Leva, leva.

Ca mme lo voglio magnà vivo.

MOSCARDINO

Ah brenzola.

Viene vie’ ca te voglio fa sta fresca.

MEZACAPO

Già sapeva, ch’a ghioja

Avea da reuscì ssa bella Tresca.

TENZA

1090

Pedocchiuso mbreacone.

MOSCARDINO

Lazzaressa scortecene.

TENZA

Fuss’acciso.

MOSCARDINO

E tu squartata.

TENZA

Fusse mpiso.

MOSCARDINO

E tu arrotata.

MEZACAPO

E bia mo no ghiastemmate

1095

Pozzat’essere scannate.

TENZA

Vedarraje, che saccio fà.

MOSCARDINO

Io te tengo proprio cca.

MEZACAPO

Jammoncenne, ah, ah, ah, ah.