Li zite ngalera

Li zite ngalera, Napoli, Ricciardo, 1722

a cura di Paologiovanni Maione

paratesto ATTO PRIMO ATTO SECONDO ATTO TERZO Apparato

LI ZITE NGALERA

Commeddeja de lo Segnore Bernardo Saddumene. Da recetarese a lo Triato de li Shiorentine nchisto Carnevale dell’Anno che corre 1722. Addedecata a l’Azzellentissema Segnora Maria Livia Spinola Prencepessa de Sulmona, e de Rossano, e Veceregina de sto Regno de Napole.

Napole 1722. Co Lecienzia de li Superiure. E se realano a la Lebraria de Ricciardo addove se stampano, e se venneno l’Avise prubbeche.

Azzellentissema Segnora.

Io spero; ca sta Commeddeja, ch’è ll’utema de chist’anno, aggia da dare qua’ poco de sfazejone a V.E. comm’a li joquature de bassetta, che dapo’ avè cagnate deverze para de carte, co ll’utemo se nce spassano no piezzo: Io ve la presento Segno’, e ve prego a benirel’a bedè recetare a lo Triatruozzolo de li Sciorentine cchiù de na vota, ca no ve despiaciarrà sentirela; ca cierte bote è meglio a sentì quatto chiacchiere de n’aggrazejato pecciottolo, che cientemila sentenzeje de no gruosso letterummeco: perdona teme la chella, che mme piglio, e dateme lecienzia, che ve pozza vasare li piede, e dechiarareme co tutto lo respetto

De V. Ecc.

Umeliss. Devotiss., e Obbrecatiss., Servetore

Giacchino Fulci

A chi vo’ lejere.

Core mio bello. Io t’avarria da dicere cientomilia filastoccole, ma pe no nte nzallanire, te voglio fa schitto sapere chello ch’è necessario primma de lejere la Commeddeja; azzoè mo’, ca lo Sio Carlo Celmino Gentelommo de la Cetà de Sorriento dapo’ ch’appe avuto confedenzia co Belluccia, Figlia de Federico Mariano Capetanio de na Galera de Cecilia; pe paura, che chisto no le facesse chello, che se mmeretava, se nne venne a Napole; addove arrevata che fuje sarvaje la vita a Titta Castagna, lo quale avenno feruto uno, li pariente de chisto lo volevano assassenà; e isso lo mettette nsarvo. Se resorvette lo Sio Carlo de ghiresenne nCalavria ncasa de cierte pariente suoje; ma arrevato, che fuje a Bietri; nnammoratose de Ciommetella, parente de Meneca Vernillo, non passaje cchiù nnanze: chesta no le voze maje corresponnere, e isso se nne hiette pe desperato cammenanno lo Munno: Lo Capetanio a capo de diece anne dapo’ la desgrazeja de Belluccia, s’appe da partire pe ghì ncurzo, co le Galere, e Belluccia co chesta accasione se nne fojette vestuta ommo; e benuta a Napole; essennose nformata ca Carlo ciert’anne arreto se la faceva a Bietri; va llà, addove pegliaje amecizeja co no cierto Varviero, ncasa de lo quale se ntrattenette, e Ciommetella se nnammoraje d’essa credennolo mascolo: Torna Carlo a Napole, e mannannose a nformare a Sorriento, che nova nc’era de Belluccia, li pariente decettero, ca credevano, che se fosse jettata dinto a quarche puzzo pe desperata, perché non se trovava cchiù né morta, né biva; pe la quale cosa tornaje a Bietri a tentà Ciommetella n’auta vota; e la trova nnammorata de Belluccia credennolo Peppariello. Belluccia canoscette subeto Carlo, ma chisto no a essa, accossì pecché erano passate dudece anne, commo pecché steva vestuto mascolo, e aveva saputo, ch’era morta. Trova porzì llà Titta, ch’è figlio de Meneca, lo quale dapo’ agghiustatose co la Corte, tornato ncasa, nce trovaje Ciommetella, e se nne nnammoraje. Belluccia nfra tanto non se scopre a Carlo, pecché vedennolo tanto crapecciato de Ciomma, dubeta, che Carlo dall’ammore de chesta pe levaresella da tuorno, no le faccia qua brutto schiuoppo; ma dapo’, che commo sentarraje se so’ scopierte, soccede, che mente la Squatra de Cecileja veneva a Napole, avenno avuto no poco de borrasca dinto a lo Guorfo de Salierno la Galera de lo Sio Federico Mariano jette nterra a Bietri, addove casoalmente lo Capetanio trova la Figlia Belluccia, e se la porta nsieme co Carlo a Sorriento. Chesto è quanto t’aveva da fa sapere. Lieje mo’, e stammete buono.

Chille che chiacchiarejano songo

CARLO CELMINO Gentelommo de Sorriento nnammorato de Ciommetella Palummo.

La Sia Giacomina Ferrara.

BELLUCCIA MARIANO sotta nomme de Peppariello Figlia de lo Sio Federico Mariano; nnammorata de Carlo.

La Segnora Poleta Costi.

CIOMMA PALUMMO parente de Meneca Vernillo; nnammorata de Peppariello.

La Segnora Rosa Cerillo.

FEDERICO MARIANO Capetanio de Galera. Patre de Belluccia.

MENECA VERNILLO Vecchia, Vedela de no Patrone de Tartana; nnammorata de Peppariello.

Lo Seg. Semmuono de Farco.

TITTA CASTAGNA Figlio sujo; nnammorato de Ciommetella.

Lo Segnore Filippo Calantro.

COL’AGNOLO Varviero nnammorato de Ciommetella.

CICCARIELLO Guarzone sujo.

RAPISTO Guarzone de Meneca.

Lo Seg. Giovanne Romaniello.

ASSAN Schiavo de Federico Mariano.

Na SCHIAVOTTELLA.

La Segnora Lavora Monti.

La chelleta se fegne a Vietri.