Opera Buffa Napoli 1797 - 1750
  
  
 Li zite ngalera, Napoli, Ricciardo, 1722
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO II
 
 SCENA PRIMMA
 
 TITTA, e CIOMMETELLA.
 
 CIOMMA
 Te ll’aggio ditto, che mme staje darasso
 Comme lo buo’ sentì, ca parle sparo!
 TITTA
 E mme vuo’ fa magnà propejo lo grasso!
 Ajemmè, ca si’ cchiù tosta de l’acciaro.
 
 SCENA II
 
 CARLO, e li stisse.
 
 CARLO
515Chesta è la quarta vota
 Ch’oje torno cca! ma vecco Titta, e Ciomma
 Mo’ parlarrà pe mme!
 CIOMMA
                                           Via parla?
 TITTA
                                                                Nzomma
 Vuo’ vedè desperato
 Chi pe tte n’arrecetta.
 CARLO
520(Oh! che amico nnorato!)
 CIOMMA
 Non c’è auto de chesto?
 TITTA
                                             Aspetta, aspetta.
 CIOMMA
 Aspettammo, di’ appriesso.
 CARLO
 (Nigro Titta, fa chello, che pò fare:
 Ll’aggio obbreco.)
 CIOMMA
                                    Me pare
525Che tu si’ assaje cchiù peo de lo si Carlo.
 TITTA
 Che nne vuo’ fare de sso milordiello!
 Io schitto pe mme parlo.
 CARLO
 (Oh! mmalora isso amma Ciommetella!
 Che grancio avea pegliato! che briccone!
530Va te fida a l’ammice!
 No lo pozzo zoffrì!) che bell’azzejone
 Non te turbare: saccio, ca te guaste
 Lo fatto tujo, non te ì mbroglianno.
 CIOMMA
 Io voglio sta a sentire sto contrasto.
 TITTA
535Io mo’ propejo pe te le stea parlanno
 Comm’è benuto a tiempo?
 Non me dare sto sfriso.
 CARLO
 Busciardo, io co ste rrecchie t’aggio ntiso.
 
    Vi’ che teranna! che ingannatore!
540Vieneme scanna! scippa sto core!
 Via c’aspettate, non pozzo chiù.
    So’ tutto chino; d’odio, e benino,
 E a sto tromiento, che all’arma sento,
 Tu mme nce curpe; nce curpe tu.
 
 CIOMMA
545Addonca tu me faje lo rroffejano
 A sto segnore; e addove lo canusce.
 TITTA
 Uh! t’avarria da di’ pe nzi’ a dimano.
 Ma dammo a nuje.
 CIOMMA
                                      Oh! Titta
 Commo si’ mpertenente
550Io maje non te pozz’essere
 Mogliere.
 TITTA
                     E pecché no?
 CIOMMA
                                               Simmo pariente.
 TITTA
 Sì ma la parentela è larga assaje.
 CIOMMA
 Io no mme voglio mettere a ssi guaje.
 TITTA
 Vorria, che tu non fusse tanto tosta,
555Ca chesto l’aghiustammo da dimano.
 
 SCENA III
 
 RAPISTO, e li stisse.
 
 RAPISTO
 Sia Ciommete’? si Titta
 La vecchia fa fracasse,
 Ca vuje da n’ora, che ve state lloco.
 CIOMMA
 Uh! negramene!
 TITTA
                                 Aspetta
560Sempe tu haje da sconcecà lo juoco!
 
 SCENA IV
 
 CICCARIELLO e Masto COL’AGNELO, che lo tira pe la recchia, ca lo vo’ vattere.
 
 CICCARIELLO
 Mo’ ve dico lo mbruoglio comm’è ghiuto.
 COL’AGNOLO
 Mulo canzirro.
 CICCARIELLO
                              Ajuto.
 RAPISTO
 Dalle: ca m’ha tagliato meza facce.
 CICCARIELLO
 Rapisto mio non ll’aggio fatto apposta.
565Ajutame.
 RAPISTO
                     Ch’a fatto ne Col’A’?
 COL’AGNOLO
                                                            Non sa, la joja
 De lo strellare; è stata mbroglia soja.
 RAPISTO
 Ne! tanto saje, e ancora non si’ nato?
 COL’AGNOLO
 Te voglio scortecare.
 CICCARIELLO
 Rapisto, sto mmalato
570Te guardate ll’arma non me fa attaccare.
 RAPISTO
 Via pe sta vota su
 Perdonalo si masto.
 CICCARIELLO
 No lo boglio fa cchiù.
 COL’AGNOLO
                                         Via statt’appasto.
 CICCARIELLO
 
 Si masto mio
575No mme vattite;
 Te cca vedite
 Ch’aggio la freve!
 Sto friddo, o Dio!
 Comm’a la neve
580Ajemmè lo core
 (Comm’è pastore!)
 Mo’ moro te.
 
 RAPISTO
 Lassalo ì mmalora
 Vuo’ che te mora mmano?
 COL’AGNOLO
585Ca tu non saje ancora
 Che scorza de nocella ch’è sto mpiso.
 CICCARIELLO
 (Si quanno songo asciuto
 Non te nne faccio n’auta peo, sia acciso.)
 
 Che v’aggio fatto,
590Che m’accedite
 De sta manera?
 Io crepo e schiatto,
 Matina, e sera
 E buje me date
595Sempe mazzate
 Pecché pecché?
 
 RAPISTO
 Via sciuoglielo ch’a ditto,
 Ca no lo bo’ fa cchiù.
 COL’AGNOLO
                                        Siente guitto
 T’aje sparagnato mo’ d’avè na ’ntosa,
600Ma nnante che sia notte
 Te voglio fa sta frisco comm’a rosa.
 CICCARIELLO
 
 Si masto mio &c.
 
 RAPISTO
 Mmalora sto pecciottolo
 Mme fa scì da li panne
605Sa cchiù isso, che n’ommo de trent’anne.
 COL’AGNOLO
 Uh! quant’è fatto tristo!
 RAPISTO
 Che nce vuo’ fa?
 COL’AGNOLO
                                 Covernate Rapisto.
 
 SCENA V
 
 RAPISTO, e MENECA.
 
 RAPISTO
 Dico la veretà; sti peccerille
 Mme fanno pazzejare.
 MENECA
610Oje piezzo d’aseno?
 RAPISTO
 Che d’è! nn’avimmo nomme! piezzo d’aseno!
 MENECA
 Vuo’, che te rompa buono buono l’ossa!
 Comme si’ brutto le’! mme faje sorrejere.
 RAPISTO
 (E tu haje fatto la torta a lo diavolo.)
 MENECA
615Ammarcia dinto, ca te vole Ciomma.
 RAPISTO
 Meglio la mmaretasse a sta verruta.
 MENECA
 Che mmaretà! non è de chesse, chessa
 Non vo’ manco sentire
 Nnommenà lo marito.
 RAPISTO
620Ne! poverella! mozzeca sti dito.
 
    Quanno siente a na femmena dire
 Lo marito! non voglio ste ccose!
 Tanto meglio dell’aute lo vo’.
    Quanno fanno le bocche sgregnose
625Tanto propejo le bide sperire
 Ca lo vonno, negà non se pò.
 
 SCENA VI
 
 CICCARIELLO, e MENECA.
 
 CICCARIELLO
 (Oh! vecco la sia Meneca!
 Mo’ nce la voglio fa tonna a lo masto!)
 MENECA
 Oh! Ciccariello.
 CICCARIELLO
                               Schiavo a lor segnure.
 MENECA
630Avisse visto lo si Peppariello?
 CICCARIELLO
 Sa addove ll’asciarraje, cierto, e securo
 Dinto a lo core tujo.
 MENECA
                                       Ah! frabbuttone
 Nc’aie dato mmiezo.
 CICCARIELLO
                                        (Vi’ che Calascione.)
 Lo masto mio te pò fa scì da guaje.
 MENECA
635E commo.
 CICCARIELLO
                      Lo sio Peppo
 Fa chello, che bo’ isso;
 E si volisse fa lo matremmonejo
 De te; co Peppariello
 Abbasta, che le muolle st’anelluccio,
640Che mo’ tiene a lo dito
 Ca cierto Peppo te sarrà marito.
 MENECA
 Uh! Ciccariello mio
 Le voglio dà tutte le rrobbe meje.
 CICCARIELLO
 (È lo vero retratto de la pesta.)
 MENECA
645Ch’aje ditto.
 CICCARIELLO
                          Ca si’ lesta.
 MENECA
                                                 Comm’aje ditto!
 CICCARIELLO
 (Bonora abbiannella)
 Schiavo ch’aggio da fare.
 
 SCENA VII
 
 MENECA sola.
 
 MENECA
 A che mme jova avè sta facce bella?
 Si aggio da pagare
650P’avè no guitto, che mme voglia bene;
 Femmene poverelle
 Vide a che nc’hanno st’uommene arreddutte
 Si fanno chesto a nuje, che simmo belle
 Considera mo’ a chelle, che so’ brutte!
 
655   Negre chelle, che stanno soggette
 A milorde studiente, e Pagliette,
 Vuo’ corrive, vuo’ nganne a deritto!
 Chesto schitto
 Nne ponno sperà.
660   Chi pretenne passà pe segnore:
 Chi pe bello, chi smanecatore,
 E nfra tanto la negra a lo scuro,
 Muro muro
 Se vace a corcà.
 
 SCENA VIII
 
 COL’AGNELO, e CICCARIELLO.
 
 COL’AGNOLO
665Io non pozzo avè peo
 De ire a fa la varva a cierte tale
 No nce le truovo maje.
 CICCARIELLO
                                            Oh! manco male!
 (Mo’ voglio comprì ll’opera.) si Masto,
 La sia Meneca è stata cca mo’ propeio,
670E mm’ave confedato
 Ca spanteca pe buje,
 Ca ve vo’ regalà no bello aniello
 Quann’esso s’assecura
 Ca le volite bene.
 COL’AGNOLO
675A mme?
 CICCARIELLO
                   Gnorsì, volite che nce jura?
 COL’AGNOLO
 Siente buono forfante
 Vi’ che chessa non fosse
 Qua cosa comm’a chella de mo’ nnante?
 CICCARIELLO
 Gnornò si masto, eccome cca, mpenniteme.
 COL’AGNOLO
680Vi’ che facce de mpiso sedeticcio?
 CICCARIELLO
 (Bene mio comm’è locco!)
 COL’AGNOLO
 Porta lo farrajuolo
 Llà dinto, e cacciame lo Tasso.
 CICCARIELLO
                                                         È lesto.
 COL’AGNOLO
 Che gusto c’aggio a lejere sto livro;
685Tutto ca nquanno nquanno
 Leggo quarche parola competanno.
 CICCARIELLO
 Eccolo cca si masto
 Me ne pozzo trasire?
 COL’AGNOLO
 Canto settemo a chisto nc’aggio senzo
690Gnorsì trasitevenne.
 
 SCENA IX
 
 BELLUCCIA, COL’AGNELO, e po RAPISTO.
 
 BELLUCCIA
 Bravo masto Col’Agnelo,
 Co lo Tasso.
 COL’AGNOLO
                         Che nce vuo’ fa? me spasso.
 BELLUCCIA
 E ment’è chesto
 Me ntrattengo nfratanto
695Ca mme spasso li frate.
 COL’AGNOLO
 Comme vuo’. Canto settemo: sto Canto.
 BELLUCCIA
 È bello!
 COL’AGNOLO
                  È bello frate.
 RAPISTO
 Oh! Di’ ve guarde nzemmora si Peppo.
 BELLUCCIA
 Schiavo, Schiavo Rapisto.
 RAPISTO
700Che bello livro è chisto!
 COL’AGNOLO
 Niente è na certa storia!
 RAPISTO
 Ne, ne? fosse la storeja
 De lo varviero nnammorato.
 BELLUCCIA
                                                      Ah, ah, bravo!
 COL’AGNOLO
 Gnornò! chesta è la storeja
705De la mmala pasca che te vatta.
 BELLUCCIA
                                                           Ah, ah, ah via,
 Ca non è niente; masto va leggenno
 Assettammonce cca.
 COL’AGNOLO
                                        Te sto servenno
 Tu da cca, che nne vuoje?
 RAPISTO
 Vorria sapè, si pe stasera è lesta
710La maschera, e la vesta.
 COL’AGNOLO
 Gnorsì.
 BELLUCCIA
                 Bonora, e lo vestito mio?
 COL’AGNOLO
 Ogne cosa sta ncoppa.
 BELLUCCIA
 (Voglio vedere si accossì bestuta
 Mme recanosciarrà chell’arma sgrata.)
715Via va decenno.
 RAPISTO
                                (Pararrà na fata.)
 
  Intanto Erminia in fra l’ombrose piante
 D’antica selva dal cavallo è scorta
 Non più governa il fren la man tremante,
 E mezza quasi par tra viva, e morta.
720   Per tante strade si raggira; e tante
 Il coridor che in sua balia la porta
 Ch’alfin dagl’occhi altrui pur si dilegua
 Ed è soverchio o mai ch’altri la segua.
 
 COL’AGNOLO (legge.)
 Intanto Armenia in fra l’erbosi guanti
725D’ardica l’erva de cavallo è scotta,
 Non più taverna alfier l’arme tremante
 È messo gioco qui su via a la morra.
 BELLUCCIA
 Ah, ah, ah, li scianche benemio.
 RAPISTO
 Non siente, la Sia Armenia
730Ca se spassava essa porzì a la mmorra.
 BELLUCCIA
 Ah. ah ah. chesta è meglio assaje.
 COL’AGNOLO
 Dai tante sarde tu Reggina, e tante
 Al carro d’or che in tua b.a.l.i.a.
 Balia, balia, azzoè mo’ la nutricce!
735Al carro d’or, che in tua balia la sporta.
 RAPISTO
 E lo sportone puro, oh la Sia Armenia
 Se cresceva li figlie all’uso nuosto
 Co lo sportone.
 BELLUCCIA
                              Ah, ah, ah, è troppo benemio.
 RAPISTO
 Si Peppo a chille tiempe
740Non s’ausavano connole cred’io.
 COL’AGNOLO
 Che l’alfier dà finocchi a tutti quanti
 Cca, che mmalora dice?
 RAPISTO
 N’è niente, è quarche bierzo a la nterlice.
 COL’AGNOLO
 Nce so’ piede sopierchie.
 RAPISTO
745Ch’è quarche Scarrafone.
 COL’AGNOLO
 Tu saje, che so’ li piede.
 RAPISTO
 Securo, eccole cca, chiste so’ isse.
 COL’AGNOLO
 Vi’ che freoma nce vole.
 Che l’Alfier dà finucchie a tutte quante,
750E caso vecchio assaje
 BELLUCCIA
 Zitto no cchiù ah. ah. ah.
 RAPISTO
 Credo, ca pane; e bino nce ne steva.
 COL’AGNOLO
 Mo’ m’aje rutto seje corde.
 BELLUCCIA
 Ah. ah. ah. fornisce gioja mia.
 COL’AGNOLO
755Che mmalor’à ussoria?
 Vi’ ca so’ le parole corejose.
 BELLUCCIA
 Sine sine è lo vero.
 COL’AGNOLO
 Non è da tutte a lejere ste cose;
 E massem’a lo tiempo, che simm’oje,
760Lieje tu mo’ chest’auta.
 BELLUCCIA
 Comme vuoje.
 
    Qual doppo lunga, e faticosa caccia
 Tornansi mesti, ed anelanti i cani
 Che la fiera perduta abbian di traccia
765Nascosta in selva da gli aperti piani.
    Tal pieni d’ira, e di vergogna in faccia
 Riedono stanchi i Cavalier cristiani.
 Ella pur fugge, e timida è smarrita
 Non si volge a mirar s’anco è seguita.
 
 COL’AGNOLO
770Vi’ si è comme dich’io, ca n’è da tutte
 A lejere ste cose veramente.
 BELLUCCIA
 Pecché?
 COL’AGNOLO
                  Ca tu ll’aje letto
 De no muodo, che nn’aggio ntiso niente.
 BELLUCCIA
 Non vo’ dire ch’è isso, che no ntenne!
775Liegge tu st’auta appriesso.
 COL’AGNOLO
                                                    È lesto, attienne.
 Fuggì tutta la notte, e tutt’il giorno
 Funge tutta la notte, e tutt’il giorno!
 BELLUCCIA
 Ah, ah, mo’ moro.
 COL’AGNOLO
                                    Vide, che taluorno!
 Che d’è non ghiesse buono.
 BELLUCCIA
780Funge tutta la notte?
 COL’AGNOLO
                                         Funge, funge.
 BELLUCCIA
 Ah, ah, ah.
 COL’AGNOLO
                       Siente ll’espreca anemale.
 BELLUCCIA
 Oh lloco so’ le botte.
 COL’AGNOLO
 Chist’era Genovese,
 S’abbottava de funge juorno, e notte.
 BELLUCCIA
                                                                     Ah, ah, ah.
 COL’AGNOLO
785Addo’ vuo’ ire, aspetta, siente Peppo.
 
 SCENA X
 
 TITTA, RAPISTO addormuto; e CICCARIELLO.
 
 TITTA
 
    Oh Dio pecché, pecché?
 Ammore si’ pe mme
 Sempe cchiù ammaro?
    Pracate mo’ ched’è?
790Propejo me vuo’ vedè
 Jettato a maro.
 
 RAPISTO
 Chesta non è cchiù mosca, ch’è mmalora;
 Ora mo’ è frusciamiento! a core mio
 Na vota vasta, e ncuocce, e puro tuorne.
 CICCARIELLO
795(Co chillo se la piglia? o bravo, o bravo.)
 RAPISTO
 Tu mme vuo’ fa votà propejo li cuorne.
 CICCARIELLO
 (Mme so’ pegliato gusto, ve so’ schiavo.)
 TITTA
 Io non saccio, che dice, staje mpazzuto.
 Non t’ave ditto niente lo Sio Peppo
800De la Commediella
 Che ncoppa a sto Palazzo
 S’ave da fa sta sera?
 RAPISTO
 Sì saccio tutto.
 TITTA
                              Tu che parte faje?
 RAPISTO
 Faccio Polecenella,
805E le femmene so’ de bona cera?
 TITTA
 Pe lo Si Peppariello già lo saje.
 Ll’auto no lo canosco; e lo Sio Carlo
 Farrà da nnammorato.
 RAPISTO
 Ma chi ll’ave mpegnate?
 TITTA
810Sto galantuomo, che sta cca becino,
 Che te pare so’ caude?
 RAPISTO
                                            So’ sbarvate,
 E po hanno na mutria de ciardino.
 TITTA
 Orsù jammo a bedè pe ssi vestite.
 Co tutto ca non receto,
815Co gran gusto me piglio sto fastidio
 De penzà a tutto, ch’aggio sfazejone
 A ste cose redicole.
 RAPISTO
 Cheste de Carnevale songo bone.
 
 SCENA XI
 
 COL’AGNELO, e po CIOMMA.
 
 COL’AGNOLO
 Arresedeja ssi stiglie peccerillo.
820O vecco la Sia Ciomma!
 CIOMMA
 Sempe chisto mme vene pe da nante.
 Trasimmoncenne.
 COL’AGNOLO
                                    Aspetta no tantillo,
 Ca mo’ mo’ te nne vaje.
 CIOMMA
 E che buo’?
 COL’AGNOLO
                         No lo ssaje?
825Voglio na cosa, che mme la può dare.
 CIOMMA
 (Uh, e che lotano!)
 COL’AGNOLO
                                     Siente
 Ssa facce m’addecreja!
 Sso
 CIOMMA
          Siente lo marvizzo ca zeccheja?
 COL’AGNOLO
 Sì ll’aggio ntiso; a nuje.
830Ah! Ciomma bella mia, tu schitto puoje
 Levareme
 CIOMMA
                      Che friddo, che fa oje!
 COL’AGNOLO
 N’è niente, po te scarfe.
 Tienemente schitto
 Co ss’uocchie a zennariello,
835E dapo’
 CIOMMA
                  Saje si è sciuto Peppariello?
 COL’AGNOLO
 Non saccio. Oh Dio famme na bona cera.
 Musso d’oro
 CIOMMA
                          Sapisse
 Si se fa la Commeddia cca sta sera?
 COL’AGNOLO
 (Oh mmalora!) Gnorsì. Vide ca squaglio!
840Ca sto
 CIOMMA
               Non vide Titta,
 Ca se spassa a lo maglio?
 COL’AGNOLO
 Oh! oh! che malannaggia
 Lo marvizzo, lo friddo, Peppariello,
 La commeddeja, lo maglio, Titta, e io,
845Che mme vuo’ fa crepà na vena mpietto.
 Vuo’ che mora de subbeto bonora?
 CIOMMA
 (Ah, ah, ah, me nce spasso a lo mmacaro.)
 Che t’aje pegliato collera?
 COL’AGNOLO
 Ma si mme schiatte ncuorpo,
850All’utemo, che d’è? siente na chiacchiara.
 CIOMMA
 Via di’ chello, che buoje, ca mo’ te sento.
 COL’AGNOLO
 Tu già saje, ca pe tte non aggio abbiento.
 
    Nenna mia non saje, ca ll’ommo
 Quanno arriva a st’ajetà mia
855Arreventa peccerillo?
 Donca comm’a fegliulillo
 Pur’io voglio pazzejà.
    Sa che diceno l’antiche,
 Ch’a no Viecchio se concede,
860Pe dà premio a le fatiche
 Lo poterese spassà.
 
 SCENA XII
 
 CIOMMA sola.
 
 CIOMMA
 Non sulo Peppariello
 Mme fuje, e me desprezza,
 Chisto porzì, mme fa magnà la rezza.
865Povera Ciomma, haje da morì securo.
 Desperata te vide,
 Ntra lo caucio, e lo muro.
 Peppo morta mme vo’, chisto m’accide.
 
    Negramene so’ ncappata
870Nfra lo lupo, e lo derrupo.
 Già mme vedo desperata
 Io non saccio addo’ foj.
    Cca lo sdigno, e cca l’ammore
 Mme sdellanzano lo core,
875E mme fanno nghiettechì.
 
 SCENA XIII
 
 BELLUCCIA, e CARLO.
 
 BELLUCCIA
 Io non sapeva ca tu puro riecete,
 A sta burletta, che se fa stasera.
 CARLO
 Songo stato mpegnato.
 BELLUCCIA
 (Voglio vedè, co li vestite mieje
880De mme scoprì a lo sgrato.)
 CARLO
 Orsù, che mm’aje da dicere?
 BELLUCCIA
 Na cosa schitto pe lo bene tujo.
 CARLO
 (Ed eje.)
 BELLUCCIA
                    Pocca Ciomma t’avè nn’odio
 Lassala ì a malanno.
 CARLO
885(Che Dottore d’aguanno.)
 Obbrecato a ussoria de la conzurta.
 BELLUCCIA
 Vi’ ca ll’aspro consiglio
 È meglio assaje de no doce nganno.
 A quanta vuo’ donà sto core tujo.
 CARLO
890A quanta mme piace?
 BELLUCCIA
 Vi’ ca chi troppo abbraccia, poco stregne!
 CARLO
 Non me sta a nzallanì bellezza mia.
 BELLUCCIA
 A me bellezza mia?
 Pecché non me canusce, accossì dice.
 CARLO
895Levammo rimme a sto parlare scuro.
 Vorria sapere, tu ch’aje fatto a Ciomma,
 Che pe tte, è tutt’affetto
 Pe mme tutta despietto.
 Io da dece anne, che le vao appriesso.
900E sempe la canosco cchiù arraggiata.
 Potta de chi non crede;
 E tu appena ll’aje vista, e ll’aje ncappata.
 BELLUCCIA
 Chesto mo’ te, dich’io comme succede.
 
    Ncoccia lo Cacciatore,
905Appriesso a na zenzella,
 Menà vo’ propejo a chella;
 Ma quanno vo’ sparare;
 N’auto da chella via
 Mena, la fa cadè.
910   Povero Carlo mio
 Tu si’ lo Cacciatore,
 L’ammico po songh’io,
 Che ll’aggio fatt’arriesto.
 Ma tu non saje pecché.
 
 SCENA XIV
 
 TITTA, e po CARLO.
 
 TITTA
915Veccote Carlo, e sta marfuso!
 CARLO
                                                       Oh Dio.
 TITTA
 Ched’è si Carlo mio?
 CARLO
 Levamette da nanze tradetore.
 TITTA
 Tu me strapazze a tuorto.
 CARLO
 Non te voglio sentì, pe tte so’ muorto.
 TITTA
920Pe mme?
 CARLO
                     Sì ca da te sperava ajuto.
 TITTA
 E mo’ ched’è, ch’è stato?
 CARLO
                                               Mm’aje traduto
 Vattenne, ajemmè non me te fa vedere;
 Vattenne Titta, famme sto piacere.
 TITTA
 Ma io
 CARLO
              Titta m’accide.
 TITTA
925Mo’ me nne vao, non è comme cride.
 
 SCENA XV
 
 CARLO, e BELLUCCIA.
 
 BELLUCCIA
 Fremmate Carlo aspetta
 E che carrera è chesta, ch’aje pigliata.
 CARLO
 Oh Dio tu co sta spata
 Mme farrisse passà da parte a parte,
930Da me che buo’ lassame ire Peppo.
 BELLUCCIA
 Vuo’ che te lassa ire?
 CARLO
                                         Sì.
 BELLUCCIA
                                                 Va chiano.
 CARLO
 Tu mme vuo’ schiattà ncuorpo leva mano
 A sto parlare equivoco.
 BELLUCCIA
 Si nnanze te venesse chella scura
935Che tu a la patria toja abbannonaste.
 CARLO
 (Ora vide che lotano.)
 BELLUCCIA
                                           E te decesse assettate.
 CARLO
 Non serve
 BELLUCCIA
                      Oh! Dio
 CARLO
                                       E tu vuo’ sta a l’allerta?
 BELLUCCIA
 Mo’ me nne piglio n’auta.
 CARLO
 (Chisto n’ha cchiù de tanto a lo sottile,
940Da corzaro a corzaro
 Se nce perdono schitto li varrile.)
 BELLUCCIA
 No statte, ca staje buono; orsù.
 CARLO
                                                          Spapura.
 BELLUCCIA
 Si nnanze te venesse chella scura,
 Che tu
 CARLO
                A la Patria mia abbannonaje
945Appriesso.
 BELLUCCIA
                       E te decesse
 CARLO
 Piglia.
 BELLUCCIA
               Obbrecatissemo.
 CARLO
 E accossì.
 BELLUCCIA
                     Te decesse, Ah Carlo mio
 Io songo, io songo, chella sfortunata
 Che dudece anne arreto haje tanto ammata:
950Che le responnarrisse?
 CARLO
 E tu che nne vuo’ fare de ssi guaje?
 BELLUCCIA
 E chisto è lo piacere
 Che m’avisse da fa.
 CARLO
                                      (Statte a bedere
 Ca non fornesce cca.)
 BELLUCCIA
955(Già s’è mbrogliato! Ammore, tu m’ajuta.)
 CARLO
 Io le responnarria
 Va torna tenne, pe do’ si’ benuta?
 BELLUCCIA
 Va tornatenne pe do’ si’ benuta.
 CARLO
 E mbe’, che buo’?
 BELLUCCIA
                                    Bella resposta! sgrato!
960Da po che ll’aje levato,
 E la famma, e l’annore
 Accossì le respunne? ah! ngannatore.
 CARLO
 Ma chesto
 BELLUCCIA
                      Deciarria, chella scontenta
 Si nnanze te venesse.
 CARLO
965(Chisto da me che bole.)
 BELLUCCIA
 Addo’ so’ le mprommesse?
 Addo’ la fede? addo’ li juramiente?
 Ommo senza parola, ommo de niente.
 CARLO
 Chesto è sopierchio
 BELLUCCIA
                                       Aspetta.
 CARLO
970Lasciamm’ire ste cose.
 BELLUCCIA
                                            No statte a pasto.
 CARLO
 Oh! Dio tu mme confunne!
 BELLUCCIA
 No; ll’aje mprommisso; assettate, e respunne.
 CARLO
 (Mo’ te chiaresco io.)
 Io le derria; Pecché non te si’ stata
975A lo Pajese tujo ad aspettare
 Ch’attennere io venesse la parola,
 Che t’aveva jurata?
 Una, che bace sperta sola sola,
 Maje se pò di’ ch’è femmena norata.
 BELLUCCIA
980Chesto de cchiù? serra sta vocca nfammo!
 E qua signe d’ammore
 Te potea dà, cchiù forte, chella scura
 Che benirete appriesso?
 CARLO
 Nne potea fa de manco.
 BELLUCCIA
985Abbannonà la patria, e li pariente?
 CARLO
 Chi nce ll’à commannato?
 BELLUCCIA
 A riseco de perdere la vita?
 CARLO
 Non se fosse partuta da la casa.
 BELLUCCIA
 Una, che t’amma tanto, e che t’adora.
 CARLO
990Aggio avuto pe la capo.
 BELLUCCIA
 La vuo’ fa desperà?
 CARLO
                                      N’è morta ancora!
 BELLUCCIA
 N’è morta ancora!
 CARLO
                                    Sì, n’è morta ancora?
 Già me ne so’ scordato.
 Io no la voglio cchiù. Te si’ quietato?
995Non parle cchiù: ched’è? già te sconfide?
 A sta proposezejone,
 Che resposta, mme daje?
 BELLUCCIA
 Chesta che bide.
 CARLO
                                 Si’ pazzo, co chi ll’aje?
 BELLUCCIA
 Miette mano te dico, o te sbodello.
 CARLO
1000Tu vaje cercanno propejo de morire.
 BELLUCCIA
 No mporta.
 CARLO
                        Te nne voglio fa pentire.
 BELLUCCIA
 Si’ feruto.
 CARLO
                      N’è niente.
 BELLUCCIA
                                             (Ah! negramene!)
 Vasta.
 CARLO
               Che buo’ abbastà; mo’ te serv’io.
 BELLUCCIA
 (Non saccio, che mme fa? so’ morta.)
 CARLO
                                                                     A nnuje.
 
 SCENA XVI
 
 CIOMMA, e li stisse.
 
 CIOMMA
1005Ajemmè, che bedo. Ah! Carlo; ah Peppo mio
 Pe quanto amme Ciomma,
 Pe quanto mme vuo’ bene.
 Fornitela fremmate,
 Nfoderate ste spate.
1010Famme sta grazeja: famme sto piacere.
 Si’ feruto?
 CARLO
                       N’è niente
 Ca chi ha fatto lo callo a lo patire
 Non sente cchiù dolore.
 CIOMMA
 Ah! poveriello scuro,
1015Nce voglio arravoglià sto moccaturo.
 CARLO
 Oh! Dio, ca tu haje piatate
 De sto po’ de feruta de la mano,
 E de chella che sta dint’a sto core,
 Po non haje compassione?
 BELLUCCIA
                                                   (Ah! Tradetore!)
 CIOMMA
1020Manco se vo’ quietà.
 BELLUCCIA
                                        Va dalle gusto
 Va lo conzola va, va lo contenta;
 Va parlale d’Ammore,
 Mmedecale la chiaja
 Falle carizze abbraccialo
 CIOMMA
1025E bia zitto.
 BELLUCCIA
                       Lassateme ch’io schitto
 Mora da desperata
 Dico da desperato
 Che mm’affria, che mme scanna, che mme sbena.
 CARLO
 Chesto che d’è?
 CIOMMA
                                Che sfrenesia!
 BELLUCCIA
                                                             Che pena!
 
1030Fortura, cana, o Dio!
 Dimme che te facc’io?
 
 CARLO
 
 Ammore tradetore
 Che buo’ da chisto core?
 
 CIOMMA
 
 Destino mio Teranno
1035Levame da st’affanno.
 
 A TRE
 
 Quanno la vuo’ scompì.
 
 CARLO
 
 Bellezza de sto core.
 
 BELLUCCIA
 
 Facce de tradetore.
 
 CIOMMA
 
 Tu si’ la morte mia.
 
 CARLO
 
1040Che t’aggio fatto?
 
 CIOMMA
 
                                   Abbia
 Carlo non te partì.
 
 BELLUCCIA
 
                                    E lassannillo ì.
 
 CARLO
 
 Tu mme vuo’ fa mpazzì. Fortuna &c.
 
 SCENA XVII
 
 COL’AGNELO, CICCARIELLO MENECA.
 
 COL’AGNOLO
 Vi’ che può fare co ssa vecchia sbrigate.
 Mme pare, ca mo’ esce.
 MENECA
1045Oh bene mio, ca songo nnammorata!
 Me l’ha fatta sto guitto,
 M’è ghiuto postejanno, e m’ha ncappata.
 CICCARIELLO
 (Si Ma’ che t’aggio ditto!)
 COL’AGNOLO
 (È lo vero, haje raggione.)
 CICCARIELLO
1050(Miettete a sto pontone,
 E siente appriesso.) Schiavo sia Maesta?
 MENECA
 Oh! Ciccariello addio.
 COL’AGNOLO
 (Stammo a sentì.)
 CICCARIELLO
                                    (Che sfazejone è chesta!)
 MENECA
 Che fa lo bello fato!
1055Chella facce de rose!
 Chillo mussillo, chella gioja mia?
 COL’AGNOLO
 A mme?
 CICCARIELLO
                   Sì a tte. Pe isso addonca squaglie?
 MENECA
 Moro pe sto giojello.
 CICCARIELLO
 Vide commo abbampa?
 COL’AGNOLO
1060Che me molla l’aniello,
 (E po ben’aggia ll’ora, che nce campa.)
 MENECA
 Oh! si masto Col’Agnolo
 Te sia racommannato,
 Ca tu mme può levare da ste pene.
 COL’AGNOLO
1065Segnora mia non saccio, che ve dire,
 Io mme voglio sforzà pe ve servire.
 (Mmalora è troppo ponteca!)
 Non voglio cchiù l’aniello, abbiannella.
 MENECA
 Lo saccio ca non songo tanto bella:
1070Ma dice lo proverbio,
 Ch’a casa chiena maje nce manca cena.
 COL’AGNOLO
 Ma io n’aggio appetito core mio.
 MENECA
 Via, ca si vuo’, mbe’ lo può fare.
 CICCARIELLO
                                                            Eh bia.
 COL’AGNOLO
 Va tu a peglià lo vino Ciccariello.
 CICCARIELLO
1075Mo’.
 COL’AGNOLO
            Mollame s’aniello.
 MENECA
                                               Eccolo ccane.
 COL’AGNOLO
 Via ch’avimmo da fare?
 MENECA
 Mo’ te lo dico bello pane pane
 Tu mm’haje da fa no bello roffejano.
 COL’AGNOLO
 Io roffejano?
 MENECA
                           Non te piglià collera.
 COL’AGNOLO
1080Ciccariello? uscia parla a lo sproposeto.
 Via levammo ste baje.
 Vuo’, che te voglia bene? Io te nne voglio,
 Sì te nne voglio,
 Non t’affrijere cchiune.
 MENECA
                                             E voglio, e voglio.
 COL’AGNOLO
1085Tu che mmalora vuo’ da fatte mieje?
 MENECA
 Oje ntacca musse, arrappa portarrobbe,
 Taglia chiattille, sacco de cravune,
 Io mo’ co ttico: Io!
 COL’AGNOLO
                                    Chesta, che bo’?
 MENECA
 Via vommeca l’aniello,
1090Dà cca.
 COL’AGNOLO
                 Non mozzecare.
 MENECA
 E lassa malenato,
 Oh! puozz’essere acciso.
 COL’AGNOLO
 Vide che becchia vezejosa è chesta.
 
 SCENA XVIII
 
 COL’AGNELO, po RAPISTO; MENECA, e CICCARIELLO.
 
 COL’AGNOLO
 Mme vorria vennecare de sto tratto.
1095Oh! mo’ mme vene fatto
 Pa la fa desperare
 Io le voglio arrobbare
 Chella carrafa de lo cuoncio. Oh! bravo.
 Vecco cca la scalella,
1100Da cca non c’è nesciuno;
 Pocca chesta è na strata soletaria:
 Mo’ nne la zeppoleio priesto pe ll’aria,
 Oh! bonora la scala? Cielo ajutame,
 Ciccariello diaschence, ch’è asciuto?
1105Si strillo, e chiammo ajuto faccio peo.
 Oh povero Col’Agnelo.
 RAPISTO
 Ah, ah, ah Oh mmalora,
 Che faje lloco? carosa connannate?
 COL’AGNOLO
 Zitto; ajutame frate,
1110Rapisto mio, te voglio pe compare.
 RAPISTO
 Che compare! te voglio fa sta frisco.
 Cca se tratta de ratto Virginabus?
 COL’AGNOLO
 Oh ll’aggio fatta negra? uh? che rovina?
 RAPISTO
 Non t’aje pegliato gusto stammatina
1115A farme fa sta facce felle felle,
 Te mo’.
 COL’AGNOLO
                 Chiano Rapisto si’ mpazzuto.
 RAPISTO
 A mo’ mme vene fatta.
 COL’AGNOLO
 Vi’ ca m’annieghe.
 RAPISTO
                                     Schiatta.
 COL’AGNOLO
 Te voglio fa n’anno de varve auffo.
 RAPISTO
1120A chine? eh! non vuo’ ire a schorzà chiuppe.
 COL’AGNOLO
 Oh bonora!... cionchia.
 MENECA
 Ched’è? tu sempe staje co la pazzia.
 Uh! negrame? che faje tu lloco?
 RAPISTO
 Aje visto?
 MENECA
                      Repotazione mia.
 RAPISTO
1125Lupus in fraveca.
 Pro scaliazione; Sia Mae’, mpisetur.
 MENECA
 Uh tezzone de nfierno; te sia rutto
 Accossì a tte lo cuollo
 Testemmoneja vosta.
1130Ca chisto m’è benuto
 A levare l’annore.
 COL’AGNOLO
                                   (Manco la toccarria
 Co no spito nfocato.)
 MENECA
 Ma no nne magne affé de sto pegnato.
 COL’AGNOLO
 E zezzella mia zezzella.
1135Facce de zuccaro, e de cannella,
 Si t’aggio mma’
 MENECA
                                Puozze morì de subbeto.
 CICCARIELLO
 Oh! si masto!
 COL’AGNOLO
                            Non vi’, ca sto a la corda?
 Auzame sta scalella.
 RAPISTO
                                       Cicco non t’accostare!
 MENECA
 Lela le’, ca lo voglio stravesare.
 COL’AGNOLO
1140Fa priesto co sta scala,
 Ciccarie’ mo’ se vede.
 MENECA
 Chesto a la casa mia facce de mpiso.
 CICCARIELLO
 Via mo’ miette lo pede.
 COL’AGNOLO
 Tiene; che fuss’acciso.
 MENECA
1145Te, già che non pozz’auto.
 CICCARIELLO
 Non vuo’ scompire co sto sghizzariello.
 RAPISTO
 Schiatta.
 MENECA
                    Crepa.
 CICCARIELLO
                                   Aie da fa co Ciccariello.
 MENECA
 
 Vi’ che masto! che guarzone?
 Che barviero arroinato?
 
 COL’AGNOLO
 
1150Vecchia, vecchia.
 
 CICCARIELLO
 
                                  Mascarone.
 
 RAPISTO
 
 Chiano, chia’, ca mm’aie sciaccato.
 
 CICCARIELLO
 
 Mena mena sia maiesta.
 
 COL’AGNOLO
 
 Mena Cicco.
 
 CICCARIELLO
 
                          Pesta, pesta.
 
 RAPISTO - MENECA
 
 Mo’ te voglio fa vedè.
 
 COL’AGNOLO - CICCARIELLO
 
1155Che buo’ fare te, te, te.
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional