Opera Buffa Napoli 1797 - 1750
  
  
 Li zite ngalera, Napoli, Ricciardo, 1722
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO III
 
 SCENA PRIMMA
 
 BELLUCCIA, e COL’AGNELO.
 
 BELLUCCIA
 Vi’ ca po se fa tardo, e n’aggio tiempo
 De mme vestire femmena.
 COL’AGNOLO
 Uh! che tanto nce vole? doje partite
 Schitto facimmo, e po nce n’abbiammo.
 BELLUCCIA
1160Sbricammonce.
 COL’AGNOLO
                                So’ lesto
 Ecco le carte, co la tavolella.
 BELLUCCIA
 Orsù quanto vuo’ fa?
 COL’AGNOLO
                                         Ma decinchella.
 BELLUCCIA
 E marcio.
 COL’AGNOLO
                     E marcio via.
 BELLUCCIA
                                                Col’A’ mme vince.
 COL’AGNOLO
 Ah! Carta venga, e giocator s’avanta.
 BELLUCCIA
1165Sì ma tu juoche fino.
 COL’AGNOLO
 Oh! ca tu si’ no bello marranchino.
 Auza.
 BELLUCCIA
              N’asso.
 COL’AGNOLO
                              No tre voglio la mano.
 BELLUCCIA
 E puro sta vantaggio?
 
 SCENA II
 
 CIOMMA, CARLO, e li stisse.
 
 CIOMMA
 E quanno scomparraggio
1170De sentì cchiù contraste. Uh Peppo e joca?
 E manco mo’ le pozzo di’ na chiacchiara:
 Aspettammo no poco.
 CARLO
 Oje mme voglio dà fuoco.
 Oh! vecco Ciomma attiempo
1175Mo’ nne voglio vedè chello, che n’eje
 Chi sa quant’avarraggio d’aspettare.
 BELLUCCIA
 Che carte!
 COL’AGNOLO
                      Ah! ca le mmeje!
 BELLUCCIA
 Le bolimmo cagnare?
 COL’AGNOLO
                                          E ba joquanno.
 CIOMMA
 Oh! benmenuto!
 CARLO
                                  Siente.
 CIOMMA
                                                  E ba a mmalanno.
 CARLO
1180Oh! Dio, che t’aggio fatto?
 
 SCENA III
 
 TITTA da parte, e li stisse.
 
 TITTA
 Oh! bella cocchia te?
 COL’AGNOLO
                                        Tre Rri.
 BELLUCCIA
                                                         Tre quatto.
 CIOMMA
 Levatella da capo ssa chimera
 Ca tu non si’ pe mme.
 TITTA
 (Nce tratta a tutte duje de na manera.)
 CARLO
1185Che te nne pare?
 COL’AGNOLO
                                  Rre de spata.
 BELLUCCIA
                                                            Tre, tre.
 COL’AGNOLO
 Nn’aje quatto, e uno.
 TITTA
 Oh! vecco Peppo chisto nc’ha fortuna.
 
 SCENA IV
 
 MENECA da la loggia, e li stisse.
 
 MENECA
 Uh ll’arma mia se spassa, e amme non penza
 Negre nuje poverelle
1190Co chiste non ce jova essere belle.
 
    Hoje co sti sbarvate
 Non c’è da fa cchiù bene
 Se so’ ammalezejate
 Li Marvizze.
1195   Che raggia, che me vene;
 Nullo me vole ammare;
 So’ cose da sprezzare
 Ste bellizze?
 
 CIOMMA
 Vattenne mo’.
 CARLO
                             Potta de chi non crede:
1200E che songo mpestato
 Che mme caccie accossì?
 TITTA
                                                Che cana perra!
 COL’AGNOLO
 E che freoma, che aje.
 BELLUCCIA
 Te, Cavallo de spata.
 COL’AGNOLO
                                        Mme la faje?
 CARLO
 Donca non aje de me propejo piatate?
 MENECA
1205Vi’ si se nne vo’ ire.
 CARLO
 Ora mo’ non te pozzo cchiù zoffrire.
 CIOMMA
 Schiatta.
 CARLO
                    Dà cca sta mano.
 CIOMMA
 Ah briccone!
 MENECA
                           Ah! forfante.
 TITTA
 Ajemmè va chiano.
 CARLO
                                      Sì accideme.
 COL’AGNOLO
1210Oh! bonora!
 BELLUCCIA
                          Ah! Carlo mio
 Ch’è stato! che d’è chesto?
 CARLO
 Via dà gusto a sta sgrata
 Vienem’accide tu.
 BELLUCCIA
                                    Lassa sta spata
 Piglia Carlo. Che d’è so’ fatte pulece
1215Le gente; che accossì tu le buo’ accidere.
 CIOMMA
 Comme! tu vaje nfavore
 A no nemmico tujo.
 BELLUCCIA
 Sto nnemmico me sta dinto a lo core.
 MENECA
 Levate, ca nne voglio fa mesesca.
 TITTA
1220Fremma Mamma, che faje?
 MENECA
                                                     Lassa tu n’auto
 Ah! canaglia assassine.
 BELLUCCIA
 Te vorria caccià ll’arma da lo pietto.
 TITTA
 Mamma vi’ ca te perdo lo respetto.
 CIOMMA
 Tu contr’a Ciomma toja.
 MENECA
                                               Tu contr’a mammeta!
 BELLUCCIA
1225Accossì bo’ la sciorte.
 TITTA
 Chisto m’ha liberato da la morte.
 MENECA
 E che pe chesto? l’è
 TITTA
                                      Trasitevenne.
 BELLUCCIA
 No nne la vuo’ portare?
 TITTA
                                             Eh! jammoncenne.
 MENECA
 Trase cca tu fegliola.
 CIOMMA
1230Che briccone; m’avive asciata sola!
 
 SCENA V
 
 BELLUCCIA, e CARLO.
 
 BELLUCCIA
 Che d’è Carlo? non parle, staie confuso!
 Vi’ pe tte quanto faccio!
 Mm’aie obbreco? respunne a mme!
 CARLO
 Che saccio! ah!
 BELLUCCIA
                               Ssi sospire de fuoco
1235N’abbastano a scarfare
 Chillo core de jaccio,
 E puro appriesso le vuo’ ì.
 CARLO
                                                  Che saccio!
 BELLUCCIA
 Che resposte so’ cheste?
 No sta cchiù nzallanuto.
 CARLO
1240Oh! Dio lassame ì, songo abbeluto!
 BELLUCCIA
 Non t’abbelire spera Carlo, spera
 Ca sarraje conzolato.
 E no nne passarà fuorze stasera?
 CARLO
 
 Che buo’ che spera?
 
 BELLUCCIA
 
1245Spera ch’Ammore
 Mo’ da st’affanne
 Te levarrà.
 
 CARLO
 
 Ah! ca te nganne
 Pocca lo core
1250Maje da st’affanne
 Se levarrà.
 
 A DUE
 
 Nsi’ a mo’ sì so’ stato
 Da desperato.
 
 BELLUCCIA
 
 Ma mo’ te juro,
1255Ca sta desditta
 Se scomparrà.
 
 CARLO
 
 Io t’assecuro
 Ca sta desditta
 Maje scomparrà.
 
 SCENA VI
 
 S’accosta na Galera de la quale scennarranno duje Schiave, che attaccarranno lo capo nterra po, co lo sparo de lo Cannone, e suono de tammurro sbarcarrà lo Capetaneje, co na gran quantetà de Schiave, e schiavi pigliate ncoppa na Corzara torchesca.
 
 FEDERICO
 
1260   Or più non mi fa guerra
 Il tempestoso mar.
    Già siam compagni in terra
 E ’l Ciel sereno appar.
 
 SCENA VII
 
 MENECA da la loggia, COL’AGNOLO, da la soja pur accossì, CIOMMA, e po ASSAN.
 
 MENECA
 Masto Col’A’, ch’è stato, chi so’ chiste.
 COL’AGNOLO
1265No le bi’, ca so’ Turche.
 MENECA
                                             Uh! negramene
 Ca jarranno trovanno belle femmene
 Pe le portare a lo serraglio; E io
 Cierto ca so’ la primma.
 COL’AGNOLO
 Tu? nn’aie paura no.
 MENECA
                                         Pecché?
 COL’AGNOLO
                                                          Si’ grimma.
 MENECA
1270Io mo’ t’abbiarria
 Sta testolella nfacce.
 COL’AGNOLO
 A te vonno portà chiste nturchia
 Che buo’ fa storzellà lo Gransegnore?
 CIOMMA
 Se pò sapè, che d’eje sso remmore.
 MENECA
1275So’ Turche figlia mia.
 ASSAN
 Eh compar dove star qui alloggiamenta
 Volir sapira Capitania mia.
 COL’AGNOLO
 (Mo’ lo manno a la casa de la vecchia.)
 ASSAN
 Respondir, o mo’ far fora pellecchia.
 COL’AGNOLO
1280Fora pellecchia! mo’ calar a bascio.
 MENECA
 Bell’ommo, no ve sia pe commanno,
 Decitence, chi site.
 Ca posta vuje ne avite gran paura.
 ASSAN
 No, non temir. Non dubitar seniura.
 CIOMMA
1285Commo so’ aggrazejate chiste schiave.
 MENECA
 Dice, ca l’ha pegliate
 Da coppa a na corzara varvaresca
 E tanta belle cose sanno fare
 E nfra ll’aute porzì sann’abballare.
 CIOMMA
1290Che gusto sa? oje bello schiavo mio
 Famme vedè abballare a la Turchesca.
 ASSAN
 Seniurasì.
 COL’AGNOLO
                      Dà gusto a ssa segnora.
 ASSAN
 Seniura mo’ vedir far Crapejola.
 CIOMMA
 E biva veramente.
 TUTTI
                                     E viva, e viva.
 
 SCENA VIII
 
 CICCARIELLO sulo da femmena.
 
 CICCARIELLO
1295Pare ca no sto male
 Accossì travestito
 Paro na peccerella naturale
 Stasera propejo, me farraggio annore
 A fa la parte mia,
1300Ca sto de buon’umore
 Mo’ vogl’ire a trovare la sia Ciomma
 Pe m’aghiustà no poco li capille
 S’io mo’ fosse femmena
 Co chisto speretillo
1305Vorria tenè a la corda miezo Napole
 Pe fa cadè quarc’uno
 Propejo de facce nterra
 Co na tenutamente.
 Farria justo accossì,
1310Ah! gioia mia
 Chelle, che sanno fare
 Chiste licche salemme
 Ncappano miezo munno
 E no ste facce lisce ngnemme ngemme.
 
1315   Na femmena ch’è bella
 Quann’è freccecarella
 Comme so’ io mo’. Vi’!
 E che te fa accossì!
 Te move l’appetito
1320Pe forza l’aje d’ammà.
    Ma quann’è sgrazejata
 È comm’a na nzalata
 Senz’uoglio, e senz’acito
 Chi se le vo’ magnà.
 
 SCENA IX
 
 CIOMMA, RAPISTO, e lo stisso.
 
 CIOMMA
1325Oh! bravo Ciccariello; tu mme pare
 Na cosella de spanto!
 CICCARIELLO
 M’aggio fatto vestì da la commare.
 RAPISTO
 Oje sia Ciomma, è n’incanto.
 CICCARIELLO
 Orsù, via jammo mo’.
 CIOMMA
                                           Chiano no poco
1330Viene cca saglie ncoppa.
 CICCARIELLO
                                               E bia saglimmo.
 CIOMMA
 No no facite primmo
 Mziemo na scenolella.
 CICCARIELLO
 Chello che bole la sia Ciommetella.
 RAPISTO
 Via priesto anemo e core.
 CICCARIELLO
1335Doje parole d’ammore
 Via miettete la maschera.
 RAPISTO
 E lassa ì, n’è necessario chesso.
 CICCARIELLO
 Rape’ si mme vuo’ bene.
 RAPISTO
 Via, va decenno ca te vengo appriesso.
 CICCARIELLO
 
1340Core mio carillo carillo,
 Sso bello nasillo
 Me fa pazzejà.
 
 RAPISTO
 
 Gioja mia carella carella
 Ssa bella faccella
1345Me fa pazzejà.
 
 Oh! mmalora no cchiù, Cicco fornimmo.
 Ca tu mme faje venì qua leva rimmo.
 CIOMMA
 Ah! ah, ah. E biva tutte duje.
 Di’ quarcosa de sdigno
 CICCARIELLO
                                            Annuje.
 RAPISTO
                                                             Annuje.
 CICCARIELLO
 
1350Lazzarone; briccone pezzente
 Straccione fetente
 Vattenne da cca.
 
 RAPISTO
 
 Musso d’oro bell’uocchie luciente
 Sta vocca, sti diente
1355So’ troppo pietà.
 
 SCENA X
 
 COL’AGNOLO, CIOMMA, e po TITTA.
 
 COL’AGNOLO
 Addove sarrà ghiuto e pisse, pisse
 Fosse venuto lloco Ciccariello.
 CIOMMA
 Si sta cca ncoppa. Uh comme pare bello.
 COL’AGNOLO
 Te pararrà, comme tu pare a mene.
 CIOMMA
1360(Oh! Chisto mo’ accommenza.)
 Zitto si masto, ca te voglio bene.
 (Accossì me lo levo da vecino.)
 TITTA
 Vi’ ca t’arrivo mo’ pe lo giardino.
 (Oh! Col’Agnelo, e Ciomma!)
 CIOMMA
                                                        (Vecco Titta
1365Le voglio dà no po’ de gelosia.)
 COL’AGNOLO
 Donca de st’arma affritta
 CIOMMA
 Cojetate, ca tu si’ ll’arma mia.
 TITTA
 Potta de la fortura.
 A chisto addonca vole bene? oh! femmene!
 CIOMMA
1370Vattenne core mio
 Che non venesse Titta a sconcecarece.
 COL’AGNOLO
 Io non ce capo dinto a la cammisa:
 Dice addavero.
 CIOMMA
                               E comme (ah, ah, che risa.)
 COL’AGNOLO
 Addonca mo’
 CIOMMA
                           Tu mme sarraje marito.
1375Pe tte renunzio Titta, e lasso Peppo.
 COL’AGNOLO
 Benemio, ca sto dinto a no galeppo.
 CIOMMA
 (Staje frisco. E Titta llà piglia li butte.
 Io voglio tenè tutte, e contiente, e gabbate.)
 TITTA
 Oh! mme rallegro assaje.
 CIOMMA
1380De che?
 TITTA
                  Ca no varviero
 Te fa renunzià Titta, e lassà Peppo.
 CIOMMA
 Ah, ah, mme faje ridere addavero
 Me ll’aggio pasteggiato no tantillo.
 TITTA
 Ne! volea dire.
 
 SCENA XI
 
 CARLO, e li stisse.
 
 CARLO
                              O bravo
1385Che bella compagnia!
 TITTA
 Addonca Ciomma chi sarrà maje chillo
 Che godarrà sta ditta
 De t’essere marito.
 CIOMMA
                                      Sarrà Titta.
 TITTA
 A mme porzì vuo’ pasteggiare Ciomma?
 CARLO
1390(Ahù, che robba te!)
 CIOMMA
                                        (Veccote Carlo
 Le voglio dà martiello
 Pe mme spassà) Carlo, e Peppariello
 Io le mmantengo nfrisco
 Pecché tu si’ lo Oh! Dio ntienneme a sisco.
 TITTA
1395Che sciorta!
 CIOMMA
                         (Comm’è locco.)
 CARLO
 (Femmene veramente
 Vide: co chi è ncappata, co no smocco.)
 CIOMMA
 Orzù, vattenne ncoppa
 Ma non di’ niente a nullo
1400Tu mo’ saje, che te fa.
 TITTA
                                          Chesto va ngroppa.
 CIOMMA
 (Spassammoce no poco, co chist’auto.)
 CARLO
 (Po decite, ca ll’uommene
 So’ mperteniente.)
 CIOMMA
                                      Oh Carlo.
 CARLO
                                                          E ba co nnio.
 CIOMMA
 T’aggio da di’.
 CARLO
                             Non moglio sapè niente.
 CIOMMA
1405Cosa de gusto tujo.
 CARLO
 Vide comm’è deritta
 Saccio.
 CIOMMA
                E d’è.
 CARLO
                             Ca sarraje mogliere a Titta.
 CIOMMA
 Ah, ah, ah, lo coffejo
 Pe no lo sentì cchiù.
 CARLO
                                       Comme si’ nzemprice!
1410Co chesto mo’ te cride
 CIOMMA
 Co chesto che te dico vedarraje
 Si abburlo, siente Carlo.
 CARLO
 Di’, di’, ca non so’ surdo.
 CIOMMA
 Nzi’ a mo’ pe Peppo t’aggio desprezzato,
1415Ma già, che chisto sgrato
 Non fa cunto de mene
 Voglio nn’odio cagnà tutto lo bene.
 CARLO
 Oh! bravo e biva, e biva veramente
 Addonca.
 CIOMMA
                     Si chiammava, mo’ desprezzo.
1420Ogne raggione vole
 Che, chi primmo sprezzaje, mo’ devo ammare.
 CARLO
 Oh! che belle parole ah, ah, ah.
 E tu pretienne de me nce fa stare?
 CIOMMA
 (Pare, che se lonzonna) siente Carlo.
1425È difficile assaje
 Canoscere lo core de na femmena
 E a lo spisso soccede
 Che, chi se vede avè manco favore
 Chillo meglio dell’aute nce sta ncore.
 CARLO
1430Tu mo’ pretienne, ch’io
 CIOMMA
 Carlo no cchiù, tu si’ lo core mio.
 
    Nuje femmene simmo
 Mparate accossì
 Servì nce facimmo
1435Da tutte; ma po
 Chi manco te cride
 Cca dinto nce sta.
    Co una de nuje
 Fortura nce vo’!
1440Ca uno de vuje
 S’accide.
 Che fa?
 
 SCENA XII
 
 CARLO, COL’AGNOLO; TITTA; RAPISTO; e CICCARIELLO.
 
 CARLO
 Addonca Ciomma sarrà mia? che sciorta!
 Che gusto nn’aspettato!
1445Che mutazejone è chesta; io mo’ so’ nato.
 COL’AGNOLO
 (Chist’ancora attorneja
 Non saparrà, ca la sia Ciomma è mia.)
 TITTA
 Malan che die te dia
 Abbijate, co Cicco.
 RAPISTO
                                     Vi’ che freoma.
 CARLO
1450(Titta non sape niente de l’agguajeto
 Jo mo’ lo voglio fa morì de subbeto.)
 Titta t’aggio da dire.
 TITTA
 Ed io porzì, na cosa da stordire
 (Isso non sape, che le sta stepato.)
 COL’AGNOLO
1455Ne quanno ve nne jate.
 CICCARIELLO
 Si Ma’ Rapisto mm’ave trattenuto.
 CARLO
 Ne Ciccariello, già te si’ bestuto?
 Oh sto pecciotto è troppo speretuso.
 COL’AGNOLO
 Io pe chesto lo tengo.
 CARLO
1460Aspetta.
 COL’AGNOLO
                   Jate vuje, ca mo’ mmo’ vengo.
 CARLO
 Ah, ah a la fine Ciomma s’è arrennuta.
 TITTA
 (Comme lo dice alliegro.)
 E a buje, che ve l’ha ditto?
 CARLO
 Comme, chi me l’ha ditto! essa mo’ propejo
1465Che gusto c’aggio avuto.
 TITTA
 Obbrecato a ussoria.
 CARLO
 Obbrecato a ussoria?
 (Isso s’allegra de la sciorte mia.)
 Parente mme sarraje.
 TITTA
                                           Comme parente?
 COL’AGNOLO
1470(Oh chesta è bella! io songo
 Lo Sposo, e loro fanno compremiente.)
 TITTA
 Io no ve ntenno.
 CARLO
 Ciomma non t’è Parente?
 TITTA
                                                 Sì segnore.
 CARLO
 Addonca mo’ chess’è mogliere a mene
1475Se stregne nfra de nuje la parentezza.
 COL’AGNOLO
 Ah, ah, ah, poveriello.
 TITTA
                                          Mogliere a buje?
 CARLO
 Nfi’ a mo’, che t’aggio ditto.
 TITTA
 Si Carlo me faje ridere
 Pocca è mogliere a mmene.
 COL’AGNOLO
                                                    (Oh! chesta è meglio.)
 CARLO
1480Ah, ah, staje n’arrore
 Ch’è mia, mo’ me nne songo assecurato.
 COL’AGNOLO
 (Che papurchie, non sanno
 Ch’aggio fatt’io la botta ah, ah so’ crepato.
 CARLO
 Vi’ che risa se fa masto Colagnelo!
 TITTA
1485Aje visto! Co chi ll’aje?
 COL’AGNOLO
                                            Oh bene mio
 Deciteme na cosa; Tu sarraje
 Marito a Ciomma?
 TITTA
 Io songo
 CARLO
                   Signornò, chisso songh’io.
 TITTA
 Abburla lo Sio Carlo.
 CARLO
                                         Abburla, Titta.
 COL’AGNOLO
1490O pe ll’uno; o pe ll’auto
 Vuie credite che Ciomma stia pe buje.
 CARLO
 Sta pe mme.
 TITTA
                           Sta pe mmene.
 COL’AGNOLO
 (Co lo figlio de nufrio); ora sacciate
 Ca Ciomma ve coffeja a tutte duje.
 CARLO
1495E pecché?
 COL’AGNOLO
                      Ch’a mprommisso
 D’esse mogliere a mme.
 TITTA - CARLO
                                               Ah, ah, ah chest’è bella!
 TITTA
 Ogne cosa pò essere.
 COL’AGNOLO
 Ched’è pecché redite?
 TITTA
 Reveresco si sposo.
 CARLO
                                      Ora volite
1500Sapè na cosa!
 COL’AGNOLO
                            Ed è?
 CARLO
 Chesta nc’ha coffejato a tutte tre.
 COL’AGNOLO
 È cchiù facele cheste
 Ch’on’autra cosa; cierto accossì è.
 
    Comme quanno è notte scura
1505E te truove pe sse strate,
 Che no lampo nzanetate
 Te fa luce, e t’appaura
 Accossì socciesso a mme.
    A le stelle sta sberressa
1510Mm’à mannato nnitto nfatto,
 Me n’hà fatto
 Già cadè.
 
 SCENA XIII
 
 CARLO, e TITTA.
 
 CARLO
 O femmene, o scaienze
 Nate schitto pe darece tromiente
1515Quanno manco te pienze
 Te fanno trajenielle da stordire,
 Che servizejo sarria lassarell’jre
 È bero Titta?
 TITTA
                           Cierto è beretà.
 Ma a farelo consiste
1520Si Carlo mio la deffecoltà.
 CARLO
 
    Lo saccio ch’è pazzia
 Volere bene a femmene,
 Ogn’uno l’avarria
 Da lassà ire: ma
1525Lloco te voglio.
    So’ peo de lo dejaschence
 Te danno l’accasione
 Pe farete ncappà;
 Po comm’a no briccone
1530Te vottano, te chiantano.
 O te fanno trovà
 Dinto a qua mbruoglio.
 
 SCENA XIV
 
 BELLUCCIA da femmena, TITTA, e po CIOMMA.
 
 BELLUCCIA
 Ammore caro, caro
 Ecco Belluccia, ca no cchiù se cela
1535Vestut’ommo, haggio puosto lo telaro
 Tu ajutamell’a ordì sta bella tela.
 TITTA
 Oh! Si Peppo, mo’ pare
 Cchiù femmena, che ommo.
 BELLUCCIA
 Eh! fatte cunto
 TITTA
                              Che.
 BELLUCCIA
                                         Ca quase quase.
 TITTA
1540Che cosa?
 BELLUCCIA
                      Poco manco
 CIOMMA
                                              Oh! bravo Peppo
 Primmo de me Titta si’ arrevato?
 BELLUCCIA
                                                               Cierto.
 TITTA
 Ciommetella sta ntuono
 Famme trovà quarcosa quanno torno.
 CIOMMA
 Oh pe sta notte ntanto
1545Duorme co quarche ammico.
 No nce venì a scetare.
 TITTA
 Vago a dormì co lo Si Peppariello.
 BELLUCCIA
 Comme, co mmico?
 TITTA
                                       Sì.
 BELLUCCIA
                                               Schiavo ussoria
 (Vide, che guaje che le venarria.)
 TITTA
1550Che d’è, che fusse femmena?
 BELLUCCIA
 Ora non saccio niente
 (Le boglio pasteggiare no tantillo)
 Accossì comme songo.
 Vorria sapere, chi cchiù, sfazeione
1555Havarria de dormire
 Co mmico mo’ de vuje.
 TITTA
 Io poco, e niente.
 CIOMMA
                                  Io assaje.
 BELLUCCIA
 E ba ca state belle tutte duie.
 
    Si canoscissevo
1560La quaglia all’uosemo;
 Non deciarrissevo
 Cierto accossì.
    Tu pe mme spanteche?
 E tu nn’aie mmideia?
1565Mme vene a ridere
 Lassammo ì.
 
 SCENA XV
 
 CAPITANO ASSAN. CIOMMA, MENECA e Masto COL’AGNOLO.
 
 FEDERICO
 Assan, Assan, Assan.
 ASSAN
                                        Seniur, star lesta.
 FEDERICO
 Il tempo è già sereno
 Fa che il tutto sia pronto alla partenza.
 CIOMMA
1570Uh! n’auta vota chisto!
 COL’AGNOLO
 Troppo sti Turche vanno ronneianno.
 MENECA
 Chi è chillo segnore.
 CIOMMA
                                        Che nne saccio.
 ASSAN
 Veder quaglia. Veder?
 FEDERICO
                                            Già l’osservai.
 ASSAN
 Por mia fe, che star bella.
 COL’AGNOLO
1575Ann’allommato Ciomma, nce so’ guaie.
 ASSAN
 
 Seniura mia
 Venir con nuia
 Veder Turchia
 Che gran Seniura
1580Dintr’a Serraglia
 Non avir quaglia,
 Accossì grassa
 Comme tu star.
 
 COL’AGNOLO
 
 Uscia s’arrassa.
 
 ASSAN
 
1585Non frusciar capa
 Sacca cravuna
 Parlar volira.
 
 COL’AGNOLO
 
 Star mia Padruna.
 
 ASSAN
 
 Si non tacira
1590Testa tagliar.
 
 COL’AGNOLO
 
 Non far non far.
 
 SCENA XVI
 
 TITTA, e li stisse.
 
 TITTA
 Uh quanta gente, mamma, che d’è chesto.
 MENECA
 N’è niente. È la commeddeia.
 TITTA
 Che buo’ commeddeià, non se fa cchiune.
 CIOMMA
1595E pecché? ch’è socciesso?
 TITTA
 Ca lo Si Peppo s’è scopierto femmena.
 MENECA
 Femmena!
 COL’AGNOLO
                        Sì addavero.
 TITTA
                                                 Cierto cierto
 È de Sorriento, e dice
 Ca dudece anne arreto, lo Sio Carlo
1600Fede de matremmonio l’avea dato.
 COL’AGNOLO
 Me nne fosse addonato
 Vi’ che festino nce voleva essere.
 MENECA
 Che mme dice!
 CIOMMA
                               A pe chesso se nfadava
 Ogne ghiuorno; co Carlo
1605Mo’ lo voleva muorto, e mo’ l’ammava.
 Ahu! speranze meie iute a zeffunno.
 TITTA
 Vi’ comme so’ le cose de lo munno.
 CIOMMA
 Ma già che la commeddeia
 Non se fa cchiù, va chiammale.
 TITTA
1610Vedite, ca mo’ è tiempo
 De me levà de guaje, già Carlo, e Peppo
 Se so’ quietate, e io
 Aggio mo’ da restare sconzolato?
 MENECA
 Che dice?
 CIOMMA
                      Che nne saccio.
 TITTA
1615Ciomma non me fa sta cchiù desperato.
 
    Mo’ è tiempo Ciomma mia
 Che me può fa gaudè.
    Leva sta tirannia
 Agge piatà de me.
 
 SCENA XVII
 
 La SCHIAVETTA, e li stisse.
 
 SCHIAVETTA
1620Signor Mori non siam di nobil padre,
 Figli bensì infelici; in man di mori
 Un anno avrà, che il rio destin ne trasse,
 Onde or, che tua mercede
 Liberi siam; chiediamo
1625Che da lacci non sia più cinto il piede.
 FEDERICO
 Egli è giusto, si sciolgan da catene.
 Tu abbi di costoro, e cura, e guida.
 SCHIAVETTA
 Signore il Ciel sempre a tuoi voti arrida.
 
    Che piacer che sente l’alma
1630Quando gode libertà.
    Già il mio cor si trova in calma,
 E timor più in sen non ha.
 
 SCENA URDEMA
 
 BELLUCCIA, TITTA, po CARLO, e li stisse.
 
 TITTA
 Ecco cca, ll’aggio asciate pe la via.
 BELLUCCIA
 Uh quanta gente? scosta co sta torcia,
1635Lassa vedè?
 FEDERICO
                         (Che vedo!
 Quest’è mia figlia!) indegna!
 Mia vergogna, e rossor, tu in queste arene,
 Sott’abito viril.
 BELLUCCIA
                               (So’ morta, oh Dio.)
 FEDERICO
 Olà l’empia s’uccida.
 ASSAN
1640Seniur pietà: Sabella
 Avir cresciuta io; ed avir fatta
 Sopre braccia quand’era pescengrilla
 Più frittata, che pila n’avir barba.
 FEDERICO
 Taci; s’esegua il mio voler.
 BELLUCCIA
                                                   Segnore!
1645Oh! Dio piatà
 CARLO
                            Ch’è stato?
 Ah! canaglia; assassine; ah! renegate!
 Primma, pe chisto pietto
 Passaranno ste ajemmè? Patreto?
 FEDERICO
 Ah! traditor! Tu ancora
1650Pagar dovrai de tuoi misfatti il fio.
 CARLO
 Sì so’ contento de morì; ma chesta
 Non corpa a niente; essa pe mme è fojuta,
 Da la Patreia: Io la morte
 Mmereto; pecché ll’aggio, ajemmè traduta.
 FEDERICO
1655L’indegno s’incateni
 Su la Galea si guidi,
 E quivi poscia il traditor si sveni!
 CIOMMA
 Signore, pe piatà!
 CARLO
                                    Lassalo ire.
 
    Sì datemi la morte,
1660Bella no la mpedì,
 Barbaro starma forte;
 La potarrà soffrì.
    Cara vao a morì,
 Te lasso addio.
 
 BELLUCCIA
1665Ah Carlo fremma.
 COL’AGNOLO
                                    Oh! Dio segno’ perdonalo,
 Ca so’ spuse novielle.
 FEDERICO
 Come sposi?
 MENECA
                           Gnorsì sto Gentelommo
 Che facea la Commeddeia ll’à sposate.
 FEDERICO
 Dunque non è com’io credea.
 BELLUCCIA
                                                        Segnore.
1670Io venne appriesso a Carlo
 Pe mme potè recuperà l’onore:
 Mo’ già simmo sposate, si ve preme;
 Che mora Carlo mio
 Ah! pe piatà fa che morimmo nzieme.
 ASSAN
1675Seniur pietà, non far sciancir Sabella.
 FEDERICO
 Mi sento intenerir.
 COL’AGNOLO
 Via mo’ si Capetaneio.
 Fallo da bonus vir.
 FEDERICO
                                     Alzati o figlia.
 MENECA
 È tiempo d’allerezza,
1680Perdonale Segno’ puozze sta buono.
 FEDERICO
 Sciolto sia da catene; io vi perdono.
 CIOMMA
 Puozze campà mill’anne.
 MENECA
                                                Beneditto.
 Ciomma nfra st’allerezze
 Povero Titta ha da restare affritto?
1685Pigliatillo.
 TITTA
                      Che dice?
 CIOMMA
                                           Auh fortura,
 Pocca accossì bolite, io mme contento.
 COL’AGNOLO
 Belle fatiche meie sparze a lo viento.
 ASSAN
 Seniur Galera già star pronta.
 FEDERICO
                                                         Andiamo
 Figli alla Patria a celebrar le nozze.
 BELLUCCIA
1690Ciomma mia te so’ schiavo.
 CARLO
 A revederce Titta.
 MENECA
 Accossì nnitto nfatto
 Nce volite lassare.
 COL’AGNOLO
 Ora vide, che storia.
 BELLUCCIA
1695Cierto è, de che manera.
 COL’AGNOLO
 Nce restarrà cca sempe la memoria,
 De li ZITE NGALERA.
 CIOMMA
 Io non saccio che è stato,
 Si mme nzonno?
 CARLO
                                  Venitece a trovare.
 CIOMMA
1700Recordate de Ciomma.
 TITTA
 E de Titta Castagna.
 BELLUCCIA
                                        Ciccariello.
 CARLO
 Colagnolo.
 COL’AGNOLO - CICCARIELLO
                      Covernate,
 Iate connio.
 CIOMMA - TITTA - MENECA
                         Lo Cielo v’accompagna.
 CARLO - BELLUCCIA
 
 Dapo’ tanta, e tanta pene
1705V(†) Bello mio
                               jammo a gaudè.
 V(-) Gioia mia
 
 TITTA - CIOMMA
 
 Dapo’ tanta, e tanta pene
 V(†) Bello mio
                               Jammo a gaudè.
 V(-) Gioia mia
 
 COL’AGNOLO - CICCARIELLO
 
1710Dapo’ tanta, e tanta pene
 È cchiù doce lo gaudè.
 
 
 
 
 
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional