Opera Buffa Napoli 1797 - 1750
  
  
 Li zite ngalera, Napoli, Ricciardo, 1722
 a cura di Paologiovanni Maione
 
 
 
paratesto ATTO PRIMO ATTO SECONDO ATTO TERZO Apparato
 
 ATTO PRIMMO
 
 SCENA PRIMMA
 
 Masto COL’AGNOLO affelanno Rasola nnanze a la Poteca soja, CICCARIELLO, che scopa, e canta, CIOMMA nnanze a la porta, che fa pezzille, CARLO da lontano, che passeja.
 
 CICCARIELLO
 
    Vorria reventare sorecillo
 Pe mettere paur’a la Sia Annella
 Le vorria dà no muorzo a lo pedillo,
 E straccià la podea de la gonnella.
5   E po, pecché so’ tanto peccerillo
 Mme vorria abbuscà na peccerella,
 Ca vedo nzorà chisto, e nzorà chillo,
 E pe mme no nce sta na moglierella.
 E ba’,
10E sse breccie, che puorte mpietto
 Tu le puorte pe mme sciaccà.
 
 CIOMMA
 Ah, ah, ah, ah.
 CARLO
                             Ah! tu ride, e io schiatto.
 CIOMMA
 Si passeja pe sso tuosto.
 CICCARIELLO
 Ched’è? ch’avimmo fatto?
 COL’AGNOLO
15Niente, niente: cantate a gusto vuosto.
 CICCARIELLO
 Nce fosse quarche assisa a lo cantare?
 COL’AGNOLO
 Te voglio dà l’assisa, e la pannetta:
 Mme vo’ stordire, e ancora non è ghiuorno.
 CICCARIELLO
 Voria sapè comm’aggio da servire?
20Si canto; quando scumpe sso taluorno.
 Si m’allamento; schiatta che te manca?
 Si rido; votta sciala, ch’aje raggione.
 Si magno; e ch’aje l’allanca!
 Si
 COL’AGNOLO
        Zitto fuss’acciso chiacchiarone
25Va piglia lo vacile,
 E portamillo addo’ commesechiamma.
 (Vi’ si va, n’ave tanto a lo sottile!)
 CARLO
 Te vorria dire schitto ca sta sciamma
 CIOMMA
 Ora saglimmoncenne, via, via.
 CARLO
30No, no, mo’ mme sto zitto.
 COL’AGNOLO
 Che d’è? non stace commeto ussoria.
 De ire addo’ aggio ditto?
 CICCARIELLO
 Sto si commesechiamma
 No lo sapimmo addove sta de casa.
 CARLO
                                                                 (Che cana!)
35Ma pocca spriezze ammore,
 Mo’ vedarraje, che sape fa lo sdigno.
 CICCARIELLO
 A? a lo si Sarvatore!
 COL’AGNOLO
 Gnorsì.
 CIOMMA
                 Va mme sequestra lo bennigno.
 Masto Cola’ non te partire; siente.
 COL’AGNOLO
40Che v’aggio da servire?
 CIOMMA
 Sto Peppariello è figlio a qua serpente,
 A quacc’Urzo, a qua Lupo? è cosa grossa!
 È de carne? è de pesce!
 COL’AGNOLO
 È n’ommo comm’a mme de carne, e d’ossa.
45Che? ancora stace tuosto comm’apprimmo?
 CIOMMA
 Accossì pare.
 COL’AGNOLO
                           Io te lo remollo.
 CICCARIELLO
 M’abbio Si Masto?
 COL’AGNOLO
                                     Sì, mo’ te so’ ncollo.
 E de me propejo Ciomma,
 No nne vuo’ avè piatà.
 CIOMMA
                                           Si mme vuo’ bene,
50Redducemillo tu.
 COL’AGNOLO
                                  (No mme lo nzonno,
 Ca sarraggio l’ammante roffejano.
 CIOMMA
 Dille ch’è no va chiano. Io me consolo.
 
    Va dille, ch’è no sgrato
 No, no le di’ accossì.
55Sa comme le vuo’ di’?
 Mm’hà ditto Ciommetella,
 Ca tu la faje morì.
    Dille ca mme martella,
 Di’, ch’è no bello fato,
60Che mme fa pazzejà;
 Dille ch’aggia piatà
 De me nfelice.
 Po chello, che te dice
 Tu vienemello a di’.
 
 SCENA II
 
 BELLUCCIA, e COL’AGNELO.
 
 BELLUCCIA
65Col’Agnolo?
 COL’AGNOLO
                         Oh! Sio Peppo a tiempo, a tiempo,
 Pocca t’aggio da di’ na parolella.
 BELLUCCIA
 Patrone: di’?
 COL’AGNOLO
                           Sacce ca Ciommetella
 Pe tte non ave abbiento.
 BELLUCCIA
 Leva rimme, ca priedeche a lo viento.
 COL’AGNOLO
70Ah ah; nce ll’aggio ditto; buono faje:
 Te mancano?
 BELLUCCIA
                            N’è chesto, Masto mio,
 È ca non pozzo.
 COL’AGNOLO
                               E commo?
 Io no nte ntenno!
 BELLUCCIA
                                   No? mme ntenno io.
 
    So’ sciore
75Senz’addore,
 Arvolo sicco, asciutto;
 E Ciomma vo’ no frutto,
 Ch’io no le pozzo dà.
    Servire la vorria
80Coll’arma, e co lo core;
 Ma non è corpa mia
 Si no lo pozzo fa.
 
 SCENA III
 
 COL’AGNELO, TITTA, e po CICCARIELLO.
 
 COL’AGNOLO
 Chisto mme fa votà le cellevrella.
 TITTA
 Si Masto bella cosa!
85Tu faje lo roffejano a Ciommetella:
 Ma sa che nce vorria? na bella ntosa.
 COL’AGNOLO
 A mme lo roffejano? siente Titta
 TITTA
 Che buo’ sentire: Chesta,
 Che sta a la casa mia non è qua guitta.
 COL’AGNOLO
90E io, che t’aggio cera de frabbutto.
 CICCARIELLO
 Jammoncenne, fenite sto contrasto.
 TITTA
 Attienne a fare varve, e sottrattive.
 CICCARIELLO
 Titta fornisce, jammoncenne Masto.
 COL’AGNOLO
 Oh mmalora ssi racchie
95Songo propio rechiammo de vernacchie.
 
 SCENA IV
 
 TITTA, e po CARLO.
 
 TITTA
 Vide che rrobba: ah Ciomma
 Pe tte quanto sopporto!
 E tu cchiù ncuoccie.
 CARLO
                                       Già se nn’è trasuta!
 Vide quanto mme dura la desditta!
 TITTA
100Desidero la morte
 Chisto n’è lo si Carlo.
 CARLO
 No è Titta.
 TITTA
                       Si Carlo.
 CARLO
 Titta mio.
 A DUE
                      Che bella sciorte!
 TITTA
 Oh quanto mme conzolo,
105Ca dapo’ de tant’anne
 Ve veo buono. Commo da ste parte?
 CARLO
 E tu che baje facenno pe da lloco?
 TITTA
 Chest’è la casa mia.
 CARLO
 Chesta!
 TITTA
                  Gnorsì, a commanno de ussoria.
110No responnite ajemmè, ched’è, ch’è stato!
 CARLO
 Titta mio, che mme dice!
 TITTA
 Ve despiace!
 CARLO
                           No; t’aggio trovato
 A no tiempo pe mme troppo felice.
 Tu mm’aje da consolare.
 TITTA
                                               Oh bene mio.
115Mo’ propio a no banchetto uscia me mmita!
 CARLO
 Puro pe tte lo stisso sarria io.
 TITTA
 M’abburlate; n’aggi’auto, che sta vita
 Sarvatame da vuje: pegliatevella.
 CARLO
 T’è sore Ciommetella?
 TITTA
120Signornò mm’è parente:
 Pecché? la canoscite?
 CARLO
 La canosco sopierchio.
 TITTA
 (Ajemmè, che sarrà chesto!) E che bolite?
 CARLO
 Che le decisse pecché bo’, che mora.
125Che non sia tanto sgrata,
 Co Carlo, che l’adora.
 TITTA
 (Oh Dio che stellettata,
 Mm’aggio sentuta dà mmiezo a sto core!)
 CARLO
 Ched’è, te si’ mutato de colore?
130Mme nnieghe sto piacere?
 TITTA
 Gnorsì, voglio vedè de ve servire
 (Sciorta, che cchiù mme resta de vedere!)
 CARLO
 Fa che sia mia! non me vedè morire.
 TITTA
 (Addio Ciomma! mo’ mm’iesce da le mano.
135E chello, ch’è lo peo,
 È, ca t’aggio da fa lo roffejano!)
 CARLO
 Titta tu m’haje tornato
 Da morte nvita.
 TITTA
                                Oh Dio so’ desperato.
 CARLO
 
    Mme sento allegrolillo
140Comm’a no peccerillo
 Quann’ha la marennella,
 E non fa scola.
    Oh Titta, Titta ammato
 Tu mm’haje resorzetato!
145E sta mprommessa bella
 Me consola.
 
 SCENA V
 
 TITTA sulo.
 
 TITTA
 Vide si la desditta
 Jocare mme potea cchiù de ponta!
 Desgrazejato Titta!
150Nce volev’a lo ruotolo sta jonta.
 
    Ammore dimme tu,
 Ch’aggio da vedè cchiù?
 Tu dimme si nce stato
 Core cchiù desperato
155De sto mio.
    Non te vastava ne
 Lo sdigno de ssa perra!
 Che puro mme faje guerra,
 Co fareme trovà
160Chi mme la vo’ levà,
 Dimme che buo’ da me,
 Che te facc’io.
 
 SCENA VI
 
 RAPISTO, e po BELLUCCIA.
 
 RAPISTO
 So’ ommo comm’all’aute
 E no poco de cchiù, mmalora chesta!
 BELLUCCIA
165Chiano; che d’è; Rapisto
 Co chi ll’aje?
 RAPISTO
                           Niente. Co sta Segnorella,
 Che mme commanna sempe a barda, e a sella
 E po
 BELLUCCIA
            Zitto
 Vo’ pazzejà co ttico.
 RAPISTO
170Lo Cielo me ne scanza,
 Io co femmene? io!
 BELLUCCIA
 Che non t’aje da nzorare.
 RAPISTO
 Nnzorà mia miao’; no me jastemmare.
 
    A lo tiempo, che simm’oje
175Lo nzorares’è pazzia.
 Chella nzegna de lo Voje,
 Peppo mio me fa tremmà!
    Semp’è meglio a stare sulo,
 Ca chi piglia la mogliere,
180O na sporta de fasule,
 O na sarma de pensiere
 Sempe ncapo ha da portà.
 
 SCENA VII
 
 CIOMMA, che caccia na seggia fora a lo barcone, e s’assetta, e po COL’AGNOLO co lo farrajuolo, e cappiello, da la casa, che bo’ ascire.
 
 CIOMMA
 Oh bene mio sto Sole t’addecreja.
 COL’AGNOLO
 Oh te! Vecco la quaglia.
 CIOMMA
185Oh masto schiavo, e mbe’?
 COL’AGNOLO
                                                   Gioja de st’arma.
 CIOMMA
 (Vide ch’antecaglia.)
 Embe’! parlaste a Peppo?
 COL’AGNOLO
 Che nne vuo’ fare de sto sbarvatiello,
 Trovate n’ommo
 CIOMMA
                                 E bia
190Che t’ha ditto?
 COL’AGNOLO
                              Sia Ciomma bella mia
 CIOMMA
 Tu dalle, ca te frusce,
 E n’aje sciato pe n’ora,
 Tu mo’ sconucchie, non te lo canusce?
 COL’AGNOLO
 Ah Sia Ciomma bon’ora
195No le di’ ste parole,
 Vuo’ che te faccia mo’ doje crapejole?
 Te vi’ si stongo forte.
 CIOMMA
 Chiano, che non te rumpe lo vrachiero.
 COL’AGNOLO
 (Chesta sa li segrete de la Corte.)
 CIOMMA
200E non te piglie scuorno
 De parlare co mmico de sse cose?
 COL’AGNOLO
 Sient’a mme; tengo rrobba: aggio denare:
 E tant’aggio da fare,
 Ch’aje da essere mia.
 CIOMMA
205Si’ llesto si te pienze a fa sta botta
 È ghiusto comme hisse
 A caccia a sturne co la rezza rotta.
 COL’AGNOLO
 
    N’ommo attempato
 De nott’e ghiuorno
210Te stace attuorno;
 Ma no sbarvato
 Lo vide ire
 Aucellejanno,
 E la mogliere
215Se fa a bedere
 Na vota ll’anno;
 E spisso spisso
 Te le regala
 Qua zitto mo’.
220   No vecchiariello,
 Che sia robbusto
 È justo justo
 No rafaniello
 Fort’e piccante,
225Che tutte quante
 Nn’hanno golio;
 Chisso
 Songh’io
 Te sciala sciala!
230Vi’ si può dire
 Ca no mme vuo’.
 
 SCENA VIII
 
 MENECA, CIOMMA, e po CICCARIELLO.
 
 MENECA
 Ciommetella.
 CIOMMA
                            Segno’, che commannate?
 MENECA
 Rapisto se nn’è ghiuto?
 CIOMMA
                                             Uh, va lo trova!
 MENECA
 Va singhe benedetta
235Vide si le galline hanno fatt’ova,
 E bide
 CIOMMA
                Si n’hann’acqua, e nce la metta?
 MENECA
 Massara!
 CIOMMA
                    Tanto locca mo’ mme faje?
 MENECA
 Vi’ comme piglie mmuolo!
 CIOMMA
 (Ma l’aucelluzzo mio non piglio maje.)
 CICCARIELLO
240Spiancello a li quatto de lo Muolo
 Che saccio?
 MENECA
                         Co cchi ll’aje
 Ne Ceccarie’?
 CICCARIELLO
                            Co n’ommo, che boleva
 Sapè da me lo Masto addove steva.
 MENECA
 Pecché no nce l’aje ditto?
 CICCARIELLO
                                                Comm’è bello,
245Vuo’ che le jetta ncanna
 Ch’è ghiuto a fa na cosa necessareja?
 MENECA
 Aspetta, aspetta sienteme na chiacchiara.
 CICCARIELLO
 Via fa priesto sbrigammonce.
 MENECA
 Dimme a sso Peppariello
250Pecché no me vo’ bene?
 Ca non se ne rentenne
 Ca chi Meneca fuje; e chi me sprezza
 O n’hà core, o non sa che sia bellezza.
 Tu ride? sa da quanta so’ pregata.
 CICCARIELLO
255(Chesta vo’ esse propejo pasteggiata.)
 MENECA
 Le femmene, che so’ dell’ajtà mia
 Che dammo, e recevimmo tentazejune?
 Volimmo li marite.
 
    Ll’ommo
260È commo
 A no piezzo de pane.
 Quann’è frisco te dace appetito
 Quann’è tuosto nnozzare te pò.
    Lo marito,
265Vo’ esse peccione
 Pe fa sta la mogliere contenta,
 Ca vavone
 Nesciuno lo vo’.
 
 SCENA IX
 
 CICCARIELLO, e po RAPISTO.
 
 CICCARIELLO
 Ah ah ah chesta vecchia è corejosa,
270Ma si non faccio arrore,
 Vecco Rapisto!
 RAPISTO
                              Ciccarie’ che faje?
 CICCARIELLO
 Rapisto mio servennote
 Che barva è chesta!
 RAPISTO
                                       Mme vorrisse radere.
 CICCARIELLO
 Veramente è cresciuta.
 RAPISTO
275Chiano bon’ora me vuo’ caccià n’uocchie
 N’aje propejo descrezione!
 CICCARIELLO
 Ah ah (che bella mmenzejone.)
 RAPISTO
 Via su addov’è lo masto?
 Mme voglio sbarbizzare.
 CICCARIELLO
280(Che bella burla che le voglio fare.)
 Torna a cca n’auto poco,
 Ca si’ llesto, ma sacce,
 Ca non troppo nce sente
 E abbesogna strellà quanno le parle.
 RAPISTO
285Ne? non sapeva niente
 Ca co chisto non nc’aggio maje parlato,
 Pocca da poche juorne, ch’è arrevato.
 CICCARIELLO
 Orsù non ce vo’ auto.
 RAPISTO
                                         Schiavo tujo.
 CICCARIELLO
 Covernate Rapisto.
290Comm’è propejo catarchio
 Che bello gusto, che bo’ esse chisto.
 Io mo’ aviso lo masto
 Ca chisto porzì è surdo;
 Ah, ah, ah, ah,
295Sarrà bello a sentire sto contrasto.
 
    Sa comm’è no peccerillo
 Quann’abburla qua marrone?
 Justo comm’a no gattillo
 Che postea no sorecone;
300Si lo piglia ch’allegrezza
 Che prejezza che te fa.
    Io che so’ scapizzacuollo
 Quann’allummo quarche rracchio
 Lo coffeo, e po le mollo
305Da dereto no vernacchio
 Ch’è no gusto mmeretà. Sa &c.
 
 SCENA X
 
 Masto COL’AGNOLO, e po CICCARIELLO.
 
 COL’AGNOLO
 Non se ne ponno fa propejo cchiù barve;
 Sti cacapuzonette
 Ogne ghiuorno se vonno sbarbizzare.
310E maje se vede ll’ora de pagare.
 Ciccariello?
 CICCARIELLO
                         Oh. si masto
 Sto locco de Rapisto
 Se volea fa la varva.
 COL’AGNOLO
 Non ll’aje ditto, che torna?
 CICCARIELLO
                                                   Gnoressine.
315Na cosa sulo t’aggio d’avertire,
 Ch’abbesogna strellà quanno le parle.
 COL’AGNOLO
 Avimma da fa auto, che strellare.
 CICCARIELLO
 Che sfazione m’aggio da pegliare.
 
 SCENA XI
 
 BELLUCCIA, e po CIOMMA.
 
 BELLUCCIA
 
 T’aggio mmideja
320Bello auciello!
 Tu te spasse nfra ste frunne;
 Cante vuole t’annascunne
 Ed io stongo a penejà!
 
 CIOMMA
 Pe cchi staje a penejà?
 BELLUCCIA
325Ciomma da me che buo’? te ll’aggio ditto,
 Ca ste parole tu le ghiette a maro:
 E puro ncuoccie?
 CIOMMA
                                  Oh. Comme si’ schiattuso!
 Mme vuo’ piglià de fila.
 BELLUCCIA
 Comme voglio felà si nn’aggio Fuso.
 CIOMMA
330Siente; si chesto dice
 Pecché fuorze non aje commodetate
 Pe potè mantenere la mogliere
 Nuje simmo già arrevate,
 Te dongh’io tutto chello, che te manca.
 BELLUCCIA
335Mme faje venire a ridere, ah, ah, ah.
 CIOMMA
 Tu co ssa risa mme farrisse accidere.
 Manco chesso vuo’ fa?
 BELLUCCIA
                                           No, ca te juro
 Ca, chello che n’agg’io manc’a tte puro.
 
 SCENA XII
 
 CARLO, e li stisse.
 
 CARLO
 Vecco la sgrata! e chillo
340È fuorze lo zembrillo
 Che già ll’ave ncappata!
 CIOMMA
 (E chisto sempe appriesso, è na gran cosa!)
 BELLUCCIA
 Che bedo! Carlo! è jsso.
 È jsso, ah! tradetore! ajemmè so’ morta! (s’addebolesce.)
 CIOMMA
345Ah bene mio; ched’aje? che t’è benuto?
 CARLO
 Ch’è socciesso; ched’è? volite ajuto?
 CIOMMA
 Cerca no poco d’acqua lloco dinto.
 Gioja de st’arma
 BELLUCCIA
                                  Oh! Dio.
 CIOMMA
 Ah Peppariello mio
350Tu sude friddo? assettate cca ncoppa
 Che sarrà stato chesto?
 Ll’acqua?
 CARLO
                     Mo’ vene.
 CIOMMA
                                         Di’ che faccia priesto.
 CARLO
 Veccola cca.
 CIOMMA
                         Bellezza mia? revene?
 Co ttico llà non vide
355Ca t’ammenaccia.
 BELLUCCIA
                                    Ajemè! dimme na cosa
 De dove si’?
 CARLO
                          Io songo de Sorriento.
 BELLUCCIA
 E a sto luogo n’ammaste maje nesciuna?
 CARLO
 No.
 BELLUCCIA
           Busciardo!
 CARLO
                                 Sbarije?
 CIOMMA
                                                   Via di’ lo vero.
 CARLO
 Sì dudece anne arrete n’ammaje una
360(Comm’è benuto a chisto sto penziero!)
 BELLUCCIA
 E mo’ non l’amme cchiù?
 CARLO
                                                 No.
 BELLUCCIA
                                                           Pecché?
 CARLO
 Che nne saccio; chiano, chiano
 Mme è sciuta da lo core
 (Vi’ comm’è corejuso!)
 BELLUCCIA
                                             (Ah Turco cano)
365Teranno ngannatore
 CIOMMA
 Core mio co chi ll’aje?
 CARLO
                                           (Chist’è mpazzuto.)
 CIOMMA
 Che nne vuo’ fa ssi guaje?
 BELLUCCIA
 Pecché nfammo, pecché; po ll’haje traduta?
 CIOMMA
 Pecché te piglie, collera? ch’è stato?
 BELLUCCIA
370So’ giovene nnorato
 E non pozzo sentì sta brutt’azzione
 Ch’à fatto a na zetella sto briccone.
 CARLO
 A mme briccone a mme? te lasso ire
 Ca stammo nnanze a Ciomma.
375Ma che, già te canosco
 (Agghiustare te voglio.)
 BELLUCCIA
 Ah, si mme canoscisse
 Non derrisse accossine arma de scuoglio!
 CARLO
 Dimme na cosa; chella c’aggio ammata
380La canusce tu fuorze? parla?
 BELLUCCIA
                                                      Oh! quanto.
 CARLO
 E dimmene quarcosa?
 BELLUCCIA
                                            (Ah. Tradetore)
 Non saccio pe nfi’ a mo’, comme lo chianto
 No l’hà affocata; e comme lo dolore
 No l’accide! sospira, s’allamenta,
385Se despera, s’affrje,
 E de chesta manera
 Passa da la mattina nfi’ a la sera.
 
    Da che sponta chisto sole
 Nfi’ che torn’addov’è sciuto,
390Chella scura ch’aje traduto
 Sempe sta penzanno a te!
    E po dice ste parole
 Pecché m’aje abbannonato
 Carlo sgrato
395Oh! Dio! Perché?
 
 CIOMMA
 Ah! Peppo mio non chiagnere.
 (Io no lo ntenno.)
 CARLO
                                   (Io manco lo capesco!)
 BELLUCCIA
 (Ah, ca mme sento fragnere!)
 CARLO
                                                        (Io spazzesco!)
 BELLUCCIA
 
    Da che sponta chisto sole &c.
 
 CIOMMA
400A Peppo fremma! Aspetta; mo’ se vede
 Si mme vuo’ bene, siente
 Se nn’è ghiusto! Pe tte chesto succede.
 CARLO
 Io non ce corpo a niente
 Schitto vorria da te
 CIOMMA
                                      Na stellettata,
405Che te passasse ll’arma.
 CARLO
                                              (È sempe sgrata.)
 E mme vuo’
 CIOMMA
                          Vedè muorto.
 CARLO
 Io songo
 CIOMMA
                   Ll’odio mio
 T’abboresco, te sprezzo.
 CARLO
                                              Fremma, o Dio
 Tu pe mme si’
 CIOMMA
                              Tutt’ira.
 CARLO
410E buo’ esse
 CIOMMA
                        Pe tte sempe teranna.
 CARLO
 Siente na cosa
 CIOMMA
                             Niente.
 CARLO
 Vuo’ che baa, a morì?
 CIOMMA
                                          Sì va te scanna.
 
    Da me che buo’
 Se sa?
415Si’ propejo no pezzente
 De chill’mpierteniente;
 Te dico ch’agge pace
 E tu cchiù ncuocce.
    Non me pejace
420No!
 Comme lo buo’ sentì?
 Vi’ si se nne vo’ ì?
 St’uommene nzanetà
 So’ tutte suocce. Da me &c.
 
 SCENA XIII
 
 CARLO sulo.
 
 CARLO
425E qual’arma, e qua core ha sopportato
 No dolore cchiù forte
 De chisto, che sent’io so’ desperato!
 Che fa; che fa la morte?
 Che chiena de despietto
430No mme vene a scippà st’arma da pietto?
 
    Si ll’arme desperate
 Fossero tormentate
 Co chesta pena mia
 Lo nfierno mo’ sarria
435Chiù peo de chello ch’è.
    De pena, e de dolore
 Vuje niente nne sapite:
 Da lloco abbascio ascite
 E dinto a chisto core
440Venitele a bedè. Si &c.
 
 SCENA XIV
 
 RAPISTO, CICCARIELLO, e COL’AGNOLO.
 
 RAPISTO
 Ciccariello.
 CICCARIELLO
                        Oh Rapisto! bemmenuto.
 RAPISTO
 Si ncè masto Col’Agnolo
 Mme vorria Sbarbizzare.
 CICCARIELLO
 Sta cca (non te scordà de lo strellare.)
 RAPISTO
445Schiavo si masto Col’Agnolo.
 COL’AGNOLO
 (Puozze morì de subbeto
 Mm’ha storduto; isso è surdo, e a mme strilla.)
 CICCARIELLO
 È bizejo de li surde.
 RAPISTO
 (Manco m’avarrà ntiso.)
 COL’AGNOLO
450Siente a mme Bemmenuto.
 RAPISTO
                                                     (Oh! fuss’acciso.)
 Ciccariello.
 CICCARIELLO
                        Che dice?
 RAPISTO
 Chisto, che mmalor’hà?
 CICCARIELLO
                                              Non saccio niente.
 RAPISTO
 Si’ llesto?
 COL’AGNOLO
                     Segnorsì, comm’a sargente.
 CICCARIELLO
 Jammo.
 RAPISTO
                   Tu mm’aje da radere.
 CICCARIELLO
455Cierto.
 RAPISTO
                Lo Cielo me la manna bona.
 CICCARIELLO
 Ah. ah. ah. comm’è locco.
 Via mo’ anemo, e core
 Ah. ah. ah.
 Bene mio chist’è gusto de Segnore.
 
 SCENA XV
 
 MENECA, po CICCARIELLO, e COL’AGNELO.
 
 MENECA
 
460Ora vide, che taluorno
 Crepa schiatta ca sto juorno
 De pegliarte Peppariello
 No lo vide sta pe mme.
 
 Mo’ lo chiammo bonora Ciccariello
465Che si’ cecato.
 CICCARIELLO
                             Oh! aje visto!
 No ll’aggio fatto apposta.
 MENECA
 Che si’ fatto rapisto?
 CICCARIELLO
                                         (Io mo’ l’abbiarria
 Sto vacile a lo musso.)
 Sì non t’avevo visto.
 MENECA
470Tu non haje descrezejone
 E po vuo’ avè raggione.
 COL’AGNOLO
 Che d’è si’ stato acciso lloco fora
 Oh co buje chiacchereja.
 CICCARIELLO
 E comme stace bella, ah. ah. ah.
 MENECA
475Ussoria nce coffeja;
 Vi’ ca sti zerolille.
 COL’AGNOLO
 Chiano no poco.
 MENECA
                                Leva.
 CICCARIELLO
 Se sa da me che buo’?
 
 SCENA XVI
 
 CIOMMA da la Fenesta, e li stisse.
 
 CIOMMA
                                           Che so’ ssi strille
 COL’AGNOLO
 Che ll’aje asciato sulo
480Sto povero fegliulo.
 RAPISTO
 Quanno mmalora scompe sto contrasto.
 CICCARIELLO
 Oh che bella fegura.
 MENECA
 E che buo’, che te sbatta
 La capo pe sse mura?
 RAPISTO
485Aggio da ì co meza varva fatta!
 CIOMMA
 Ch’è stato sto contrasto?
 COL’AGNOLO
 Mo’ ve dich’io sia Ciomma.
 MENECA
 Leva da lloco tu vide sti panne.
 COL’AGNOLO
 Lassa parlare a mmene
 MENECA
                                             Oje varvajanne
490Agge creanza mente stea felanno
 COL’AGNOLO
 Stea facenno la varva
 MENECA
 Chillo facce de mpiso
 COL’AGNOLO
 Sto povero fegliulo
 
 SCENA XVII
 
 RAPISTO, CICCARIELLO, e li stisse.
 
 RAPISTO
 Va rade li forzate fuss’acciso
495Tene no cortellaccio pe rasulo,
 Bene mio m’ha spaccata sta mascella.
 CICCARIELLO
 Jammo a fornire.
 RAPISTO
                                   E non vuo’ ghì a mmalora.
 MENECA
 Vattenne.
 RAPISTO
                     Si Col’A’
 COL’AGNOLO
                                       Mo’ bene mio.
 Non mmottà.
 CICCARIELLO
                            Jammoncenne.
 CIOMMA
500Forniscela mo’ zia, via trasetenne.
 MENECA
 
 Vi’ che lazzaro maroglione!
 
 RAPISTO
 
 Facce mia!
 
 COL’AGNOLO
 
                       Che marrone!
 
 RAPISTO
 
 Quanto sango!
 
 CIOMMA
 
                              Trase zia.
 
 MENECA
 
 Te nne voglio fa pentì.
 
 COL’AGNOLO
 
505Vecchicone.
 
 CICCARIELLO
 
                         Lassa ire.
 
 RAPISTO
 
 Jammo sbrigame a me mo’.
 
 COL’AGNOLO
 
 M’aje acciso, mo’, mo’, mo’.
 
 MENECA
 
 Varvajanne sciò, sciò, sciò.
 
 CIOMMA
 
 Via fornite no cchiù mo’.
 
 COL’AGNOLO
 
510Scortecone sciò sciò, sciò.
 
 
 
 

 

 

Trimestrale elettronico 2016-1

Ultimo aggiornamento: 4 gennaio 2016

 

Valid XHTML 1.0 Transitional