| | |
| | |
| | Le zitelle de lo Vommaro, Napoli, Se venneno sotta alla Posta da Nicola de Biase, 1731 |
| | a cura di Simone Caputo |
| |
| |
| |
|
| |
| | ATTO PRIMMO |
| |
| | SCENA PRIMMA |
| |
| | MIMMO, e CICCIO; vestute verde da Cacciature, dormendo ncoppa a duje puoje, co le scoppette vicino. LENA, e PERZECHELLA, co li panare nfelate a le braccia che banno coglienno sciure pe le sepora de lo Ciardino de Fonzo. |
| |
| | LENA - PERZECHELLA |
| |
| | De lo Vommaro le zitelle |
| | So’ li martielle |
| | Dell’uommene |
| | Songo pronte, so’ saporite |
| 5 | Comm’a l’antrite |
| | De Napole. |
| | E l’antrite de Napole e bà; |
| | Cca so’ le rrezze di chi vo’ ncappà. |
| |
| | LENA |
| | Perzeche’, vide vi’! (mostranno li Cacciature.) |
| | PERZECHELLA |
| | Chi so’ sti sfuorge! |
| | LENA |
| 10 | So’ Cacciature. |
| | PERZECHELLA |
| | E berde, tutte duje |
| | So’ bestute; e pecché? |
| | LENA |
| | L’usanza è chesta. |
| | PERZECHELLA |
| | Te te! Che bella cosa! |
| | LENA |
| | Mme pareno doje sarme de menesta! |
| | PERZECHELLA |
| | A Sore mia, che chiste |
| 15 | So’ chille giovenielle de ll’autriero. |
| | LENA |
| | A chille che bedettemo a la festa? |
| | PERZECHELLA |
| | Appunto, che nce fecero |
| | Tanta licchesalemme. |
| | LENA |
| | Uh! nigre lloro! |
| | Cca so’ benute a perdere lo tiempo. |
| | PERZECHELLA |
| 20 | Io pe mme, mo nce voglio |
| | Peglià no de gusto. |
| | LENA |
| | Ed io porzì. Pateto le canosce! |
| | PERZECHELLA |
| | Accossì creo, sa che bolimmo fare |
| | Nfrocimmole a le mmaneche |
| 25 | Quattro sciure de chiste. |
| | LENA |
| | A gusto tujo. |
| | Oje Perzechella? pe lo tarcenale, |
| | Chesta sì ca sarria na bella presa. |
| | PERZECHELLA - LENA |
| | Ah, ah, ah, ah, ah. |
| | Bello paro de quatre. A chi fa spesa. |
| | LENA |
| 30 | Ora trasimmoncenne. |
| | PERZECHELLA |
| | Comme vuoje. |
| | LENA |
| | Ca nce volimmo devertì tutt’oje. |
| | PERZECHELLA - LENA |
| |
| | De lo Vommaro le Zitelle. (Se nne traseno cantanno la canzona.) |
| |
| | SCENA II |
| |
| | FONZO, e MARRONE da la casa. MIMMO, e CICCIO, che scotejano a dormire. |
| |
| | MARRONE |
| | Chiano, chiano: ch’è stato? |
| | Manco mme vuo’ scompere |
| 35 | De m’attaccà le cauze? |
| | FONZO |
| | Non vi’ ch’è miezo juorno, |
| | Che fuss’acciso Uh! Negrecato mene! |
| | Non vide lo si Ciccio, e lo si Mimmo! |
| | MARRONE |
| | Oh! te te, bemmenute. |
| | FONZO |
| 40 | Bemmenute lo piello |
| | Che te sbatt’atte, e loro. Uh ch’arrojna |
| | Che m’è benuta ncuollo stammatina. |
| | MARRONE |
| | E pecche? |
| | FONZO |
| | Ch’avaranno |
| | Pe ll’uorto Cacciato, |
| 45 | E la sporchia a li frutte m’anno dato. |
| | MARRONE |
| | Non è niente. |
| | FONZO |
| | N’è niente! E stamattina |
| | Chiste, cca se vorranno anghì lo stefano; |
| | E manco non è niente. |
| | MARRONE |
| | Seuro. |
| | FONZO |
| | E la mmlora che te torca. |
| 50 | Tu vuo’ proprio a li lumme |
| | Na zappellata, n’è lo ve’? N’è niente! |
| | Che so’ fatto mercante de raggione. (Se scetano li Cacciature.) |
| | MARRONE |
| | Zi’, zi’, ca mo’ se scetano. |
| | FONZO |
| | (Oh dejaschence) |
| | Sa che buo’ fa? di’ ca so’ ghiuto a Napole. |
| | MARRONE |
| 55 | Io non sa |
| | FONZO |
| | Zitto cano |
| | Ca te strafoco. (le fa la pollecare ncanna.) |
| | CICCIO |
| | Mimmo! |
| | MIMMO |
| | Ciccio Oh schiavo |
| | Si Fonzo bello. |
| | FONZO |
| | Uh! morte! |
| | Che mme nce lasse a fa? |
| | MARRONE |
| | Siente lo lesena! (a Mimmo.) |
| | Carreca mo’ si Mimmo. |
| | MIMMO |
| | Commo staje? |
| | FONZO |
| 60 | E commo voglio sta? Chino de guaje. |
| | CICCIO |
| | Stammattina volimmo |
| | Godè le grazeje voste. |
| | FONZO |
| | Si n’avesse |
| | Da j mo’ propio a Napole, sarrissevo |
| | Li patrune. |
| | FONZO |
| | No mporta, nce songh’io. |
| | MARRONE |
| 65 | Oh? Nce sta sto Segnore, |
| | Che ve farrà favore. |
| | MIMMO |
| | Co l’acquavite vosta. |
| | FONZO |
| | Co la malascajenza che t’afferra |
| | Dint’a le mmasche. Io stongo, |
| 70 | Che mo’ m’esce lo spireto. Acquavita! |
| | Addov’è ss’acquavita? |
| | Collecienzeja vosta. (va pe se nne trasire.) |
| | MARRONE |
| | Ah? ah? che ve nne pare? |
| | MIMMO |
| | Sio Fonzo, nce vedimmo craje matino. |
| | FONZO |
| 75 | (O dejavolo oje!) Craje vao a Capoa |
| | E manco non è cosa. |
| | Collecienzia vosta. |
| | CICCIO |
| | Pescraje? |
| | FONZO |
| | No, ca starraggio |
| | Seje juorne fora. |
| | MIMMO |
| | La semmana ntrante? |
| | FONZO |
| 80 | (Uh! Mo’, nne vottarria, che nce so’ nato.) |
| | Manco nce songo. |
| | MARRONE |
| | Uh? otto juorne a Capua! |
| | FONZO |
| | Gnora sì, nce volimmo |
| | Ire a morì de Subbeto. |
| | Ve mporta niente a buje? bonora scumpela. |
| |
| | SCENA III |
| |
| | MIMMO, CICCIO e MARRONE. |
| |
| | MIMMO |
| 85 | Ah ah ah ah. Che sfizejo! |
| | MARRONE |
| | Tene la rraggia nfacce. |
| | CICCIO |
| | È bizejo, è bizejo. |
| | MARRONE |
| | Uh? sti sciure che so’? |
| | MIMMO |
| | Qua’ sciure? ah potta! |
| | Chi nce l’avarrà puoste. |
| | CICCIO |
| | O chesta è scena. |
| | MARRONE |
| 90 | Saranno state, Perzechella, e Lena. |
| | MIMMO |
| | Ah? chella Lena! |
| | CICCIO |
| | Chella Perzechella |
| | MIMMO |
| | È proprio bona. |
| | CICCIO |
| | È saporita, è bella. |
| | Io mme sento morì, si no la vedo. |
| | MARRONE |
| | Sa che buo’ fa si Ciccio va la trova, |
| 95 | Ca stace dint’all’uorto. |
| | MIMMO |
| | Uh? na vota ll’aje vista |
| | E già si ghiuto? |
| | CICCIO |
| | Ah? Mimmo mio, so’ muorto. |
| |
| | Quanno ncappa lo Marvizzo |
| | A la rezza, sa che fa? |
| 100 | Co le scelle, e co lo pizzo |
| | Va cercando de scappà: |
| | Ma fuire cchiù non pò. |
| | Io porzì |
| | Song’ accossì |
| 105 | M’ha ncappato ssa fegliola |
| | Comm’à borpa a la tagliola |
| | E ba scappa va si puo’. |
| |
| | SCENA IV |
| |
| | MARRONE, MIMMO, e po LENA, e GRANNIZEJA. |
| |
| | MARRONE |
| | Vide, co Perzechella |
| | Lo cammarata commo se nce mena. |
| | MIMMO |
| 110 | Sì ca io monno Nespole co Lena. |
| | Commo facimmo pe le di’. Na chiacchiara? |
| | MARRONE |
| | Abbesogna scavare na mmenzione. |
| | LENA |
| | E sempre mm’aje da fa sso tordeglione? |
| | Da me che buo’? (a la Mamma.) |
| | MIMMO |
| | Veccola cca. |
| | MARRONE |
| | Mo’ è tiempo. |
| 115 | Sa che buo’ fa? Jettale ca si’ Astroloco. |
| | Dille ca vuo’ squatrarele la mano, |
| | Ca io t’abbono, e tu co essa spassate, |
| | Parla, Cerrea. |
| | MIMMO |
| | No cchiù, lassa fa a Pateto. |
| | MARRONE |
| | Bonnì Grannizeja. |
| | MIMMO |
| | Schiavo bella femmena. |
| | GRANNIZEJA |
| 120 | Patrone mio. Chi è chisto? (a Marrone.) |
| | MARRONE |
| | No lo vide, |
| | Ca, è Cacciatore? |
| | GRANNIZEJA |
| | È Ommo buono? |
| | MARRONE |
| | Cagliara! |
| | È Strolaco, e parlanno te conzola. |
| | MIMMO |
| | Bella Felosomia, ch’à sta fegliola. (miranno Lena.) |
| | GRANNIZEJA |
| 125 | Ne ne! |
| | MIMMO |
| | Si de la mano |
| | Li signe corresponneno |
| | A chille de lo fronte, essa è Segnora. |
| | MARRONE |
| | E mbe’, falla osservà. |
| | GRANNIZEJA |
| | Mme fa favore. |
| | Via, va llà. (a Lena.) |
| | LENA |
| | No, obrecato a llossoria, |
| 130 | Ca già canosco la Fortuna mia. |
| | MARRONE |
| | Ncoccia. falla mmirà. (a Grannizeja.) |
| | GRANNIZEJA |
| | Spruceta, spruceta: |
| | Vuo’ perdere accossì la sciorte toja? |
| | LENA |
| | Gia te ll’aje accattata: |
| | Mamma, commo si smocca. |
| | MARRONE |
| 135 | No lo siente sso Canto? (chiano a Lena. e ba vicino a Mimmo.) |
| | LENA |
| | Sine sì, tiene a curto tu nfratanto. |
| | MARRONE |
| | Sidece. Sa che Ommo è chisto lloco. (a Grannizeja. Ntramente Mimmo parla d’ammore. Co Lena Marrone da chiacchiere a Grannizeja.) |
| | MIMMO |
| | Damme ssa mano; Ah: Lena! |
| | Si sapisse che fuoco, |
| 140 | Si vedisse che pena |
| | Sento pe tte a sto core, |
| | Tu fuorze |
| | LENA |
| | A bene mio; |
| | Tu mme vuo’ astrolocare, o fa l’ammore? (Mimmo fa atte de desperazione.) |
| | GRANNIZEJA |
| | A negra me l’astroloco. |
| 145 | Tutto se torce. (a Marrone.) |
| | MARRONE |
| | È buono chesto. Mone |
| | Ciufoleja co le stelle. |
| | GRANNIZEJA |
| | Ch’aje asciato? |
| | MIMMO |
| | Core mio, pe nfi a mone aggio trovato, |
| | Ch’a d’avè no marito. |
| | Che de tremilia scute, |
| 150 | L’avarrà d’addotà. |
| | MARRONE |
| | Scazza! l’astroloco |
| | Mme pare ca n’abburla! |
| | GRANNIZEJA |
| | E sarrà bero? |
| | MARRONE |
| | Non dubetà, ca stace a bone mane. |
| | Attenta uscia, facite il fatto vostro. (a Mimmo.) |
| | GRANNIZEJA |
| | Che nce sarrà cchiù robba? |
| | MIMMO |
| 155 | Uh nce cchiù rrobba assaje. |
| | GRANNIZEJA |
| | E mbe’, faccia favore, |
| | E scusate lo ncommeto. |
| | MIMMO |
| | No nce de cche. |
| | MARRONE |
| | No no, lo fa co gusto |
| | Ch’è no galantomone. |
| 160 | Vide commo t’abbono. (chiano a Mimmo.) |
| | LENA |
| | A pardiglione! (a Marrone.) |
| | MIMMO |
| | E accossì Lena mia ssi palluncielle |
| | Che puorte mpietto, songo |
| | Pe mme doje cognolella de la Cerra: |
| | Anze, songo doj o tre, addove Ammore, |
| 165 | Ogne sospiro mio nce mpizza, e serra. |
| | LENA |
| | No nte ire accostanno, ca te mollo |
| | No paccariglio. |
| | MIMMO |
| | Accideme. |
| | GRANNIZEJA |
| | Scosta, lassa vedè. (a Marrone.) |
| | MARRONE |
| | Lassa fa a lloro |
| | Che nne vuo’ fa. Pe mmo’ già tiene ncascia |
| 170 | Tremilia piezze. |
| | GRANNIZEJA |
| | Sine. E mbe’, che nceje? (a Mimmo.) |
| | MIMMO |
| | N’autra linea mme resta da osservare, |
| | Ca no trasoro creo, ch’aggia d’asciare. |
| | GRANNIZEJA |
| | Bene, bene: attennite felicissimmo. |
| | Pare ca jammo buono. (a Marrone.) |
| | MARRONE |
| | Uh va bellissemo. |
| | MIMMO |
| 175 | Lassamete vasà, sta bella mano. |
| | LENA |
| | A briccone! |
| | MIMMO |
| | No, statte, ca mme mpesto. |
| | LENA |
| | Pigliate chisto, e torna pe lo riesto. (le da no schiaffo.) |
| | GRANNIZEJA |
| | Ch’è stato. |
| | MARRONE |
| | A potta d’oje! |
| | GRANNIZEJA |
| | Presentosazza. |
| | Ch’aje fatto. |
| | LENA |
| | Niente, niente: |
| 180 | Isso lo ssa. (e se nne trase Lena.) |
| | MARRONE |
| | Proprio nce vo’ la Mazza |
| | Oje co sse berrutelle. |
| | GRANNIZEJA |
| | Compatesca ussoria |
| | Ca so’ tutte accossì mo’ le Zitelle. |
| |
| | Na fegliola grazejosa, |
| 185 | Nche la vide già te pare |
| | Ch’è na Rosa |
| | Senza spine, |
| | Ma po quanno t’abbecine |
| | Pe bolerel’addorare, |
| 190 | Le punture aje da sentì. |
| | Agge freuma, ca co cheste |
| | Abesogna che te vieste, |
| | O te nc’aje da nnettechì. |
| |
| | SCENA V |
| |
| | MIMMO, e MARRONE. |
| |
| | MIMMO |
| | Che nne dice Marrone? |
| | MARRONE |
| 195 | Ve dico, ca chi pesce vole rodere |
| | La Coda s’hà da nfonnere. |
| | Ve so’ schiavo. |
| | MIMMO |
| | Addo’ vaje? |
| | MARRONE |
| | Pe no servizejo. |
| | MIMMO |
| | No, io non so’ de chiste: si essa penza |
| | De fareme schiattà; l’ha fatta corta. |
| 200 | Ca si mme corresponne |
| | Bene sta, quanno no, poco me mporta. |
| | MARRONE |
| | No, scusame, è buscia, |
| | Ca tu si’ cannaruto. |
| | E te spezzolearisse na panella |
| 205 | A l’addorillo de na cotenella. (Se ne va.) |
| |
| | SCENA VI |
| |
| | CIOMMA fojenno co na Mazza mmano, CICCIO appriesso, e MIMMO. |
| |
| | CICCIO |
| | Sarvateme, ajutateme, |
| | Ca chisto mme vo’ accidere |
| | Senza sapè pecché. |
| | MIMMO |
| | Comm’è sta cosa? |
| | Ciccio, fusse mpazzuto. |
| | CICCIO |
| 210 | Io non saccio che dice! |
| | Ussoria co chi ll’à? (a Ciomma.) |
| | CIOMMA |
| | Si mme vuo’ morta, |
| | Viene sgrato, vien’apreme sto pietto: |
| | Eccome addenocchiata |
| | Nnante a li piede tuoie, via famme a riesto. |
| | CICCIO |
| 215 | Chesto che d’è? |
| | MIMMO |
| | Ch’è chesto? |
| | CIOMMA |
| | Che d’è? te si’ pentuto? |
| | Va’ va; te compatesco, si’ mpazzuto. (s’auza, a Mimmo.) |
| | MIMMO |
| | Chesto, che bene a ddi’? |
| | CIOMMA |
| | Ma di’, te guarde ll’arma n’è accossì |
| 220 | E tu mo’, nce puo’ di’ manco no Callo? (a Ciccio.) |
| | MIMMO |
| | (Chesta è pazza.) |
| | CICCIO |
| | A che cosa? |
| | CIOMMA |
| | Ca tu n’aseno si’, tu no Cavallo. |
| | MIMMO - CICCIO |
| | Ah ah ah ah ah ah. Ma uscia chi è? |
| | CIOMMA |
| | Lo bolite sapè? |
| | MIMMO |
| | Nce fa favore. |
| | CIOMMA |
| 225 | So’ na coda de gatta |
| | Ma no, aggio fatt’arrore, |
| | Songo la mmala pasca che ve vatta. |
| | CICCIO |
| | (Che bella facce tosta.) Chesta creo |
| | Ch’a Nepote de Fonzo. |
| | CIOMMA |
| 230 | Gnorsì, so’ la nepote de la Zia |
| | Figlia de lo fratiello, de lo gnore |
| | De la fata Morgante; |
| | E buje site de vrenna duje Mercante. |
| | MIMMO |
| | Che bella diciaria. |
| | CICCIO |
| | Che bell’umore. |
| | CIOMMA |
| 235 | Or io ve voglio fa no gran favore. |
| | MIMMO |
| | Nce fa grazia. |
| | CICCIO |
| | Fa Onore. |
| | CIOMMA |
| | Ora scostateve. |
| | MIMMO |
| | Eccoce cca. |
| | CICCIO |
| | (Chesta che bo’ da nuje.) |
| | CIOMMA |
| | Ve voglio co sta Mazza |
| | Aghiustà le costate a tutte duje. (auza la mazza.) |
| | MIMMO |
| 240 | No, schiavo. |
| | CICCIO |
| | Obrecatissimo. |
| | CIOMMA |
| | No, azzellenzia, lostrissemo |
| | Aggiate la bontà, |
| | Lassateve contà quatto mazzate. |
| | MIMMO |
| | Chia’, chia’, chia’. (fuje.) |
| | CIOMMA |
| | None, è meglio |
| 245 | Ch’accommenza da chisto. |
| | CICCIO |
| | Ferma potta de nnico. (fuje.) |
| | MIMMO |
| | Jammoncenne. |
| | Ca chesta nce refila. |
| | CICCIO |
| | Dice buono. |
| | CIOMMA |
| | Comme, addo’ volit’ire? Non vedite |
| | Che tropea vene mo’, no ve partite, |
| 250 | Ca morite annegate. |
| | MIMMO |
| | Scuressa, e già partuta. |
| | CIOMMA |
| | Ecco jetto la mazza, e sott’a buje |
| | Comm’a doje capannelle |
| | Me reparo dall’acqua. |
| | MIMMO - CICCIO |
| | O Chiancarelle. |
| | CIOMMA |
| 255 | Che tempesta! che truone! che lampe! |
| |
| | E tu campe? (a Mimmo.) |
| | E tu non t’accide? (a Ciccio.) |
| | Vide, vide, |
| | Mo’ cade lo munno! |
| 260 | Che zeffunno! fuimmo da cca. |
| | Ma che bedo! lo naso addo’ è ghiuto! (a Mimmo.) |
| | Uh! nterra è caduto! |
| | Te, vide llà. |
| |
| | SCENA VII |
| |
| | CICCIO, e MIMMO. |
| |
| | CICCIO |
| | Mme faccio mmaraveglia, |
| 265 | Chesta comm’è mpazzuta: è assaje. |
| | MIMMO |
| | Si avessemo |
| | Asciata nfra le femmene na savia |
| | Sarria na maraviglia; ma na pazza |
| | N’è gran cosa, ca songo tutte argeneje. |
| | CICCIO |
| | Ora jammo vedenno |
| 270 | De menare na botta pe ss’arbusto. |
| | MIMMO |
| | Si, ca co sse pecciotte |
| | Nce volimm’oje peglià, no po’ de gusto. (se ne vanno.) |
| |
| | SCENA VIII |
| |
| | MARRONE, e PERZICHELLA co no panaro de frutte sotto a lo mantesino. |
| |
| | MARRONE |
| | Ah, ah ah ah ah. Va chiano: comm’aje fatto |
| | Pe le zampolejà? |
| | PERZECHELLA |
| | Non ghì sapenno. |
| 275 | Ca mme tremmeno ancora |
| | Sotta, le gamme pe la cacavessa, |
| | Ch’aggio avuta de Tata, bene mio. |
| | Che non venesse. |
| | MARRONE |
| | Poverella! via |
| | Manejammo, vedimmo ah potta d’oje |
| 280 | Ca so’ quatto percoca, |
| | Che banno, quanto va’ sta massaria. |
| | PERZECHELLA |
| | Or appara la coppola. |
| | MARRONE |
| | So’ lesto bella mia. |
| | Musso mio mpepatiello. |
| | PERZECHELLA |
| 285 | Ora via, va mangianno. |
| |
| | SCENA IX |
| |
| | FONZO da parte, e li stisse. |
| |
| | FONZO |
| | Io creo, ca se saranno |
| | Rotta la catenella delo cuollo |
| | Chelle meze perucche. Stamattina |
| | Vogliamo goder le grazie vostre eh! nnante |
| 290 | Ve nn’abbissa no truono. |
| | MARRONE |
| | O bello mastantuono? |
| | FONZO |
| | O deruppato Fonzo! (s’addona de Marrone.) |
| | Scasato me, che bedo. Uh rrobbe meje |
| | Fatiche meje! |
| | MARRONE |
| | Or io me le bogl’ire |
| 295 | A taffejà cca rrente a sto pontone. |
| | PERZECHELLA |
| | Si ca io mme ne traso. |
| | FONZO |
| | Ah! mariolone! (afferra Marrone.) |
| | PERZECHELLA |
| | (Oh! negrecata me!) |
| | FONZO |
| | Figlia mmardetta, |
| | Mme vuo’ vottà pezzenno |
| | Ne lo ve’? Lessa ccà, lassa sta coppola; |
| 300 | Ca mme te magno a muorze. (le leva la coppola.) |
| | MARRONE |
| | Chiano, chiano: |
| | Atta de me, che fosse |
| | Qua cantaro de robba? |
| | FONZO |
| | Si’ cantaro. |
| | Porta cca sso panaro, |
| | Guitta, scajenza de la casa mia. |
| | PERZECHELLA |
| 305 | Ch’è stato, arrasso sia! |
| | Di frutte ch’aggio asciato lloco nterra. |
| | FONZO |
| | Lloco nterra, e lo ve’? benaggia craje, |
| | Si no mme te vorria |
| | MARRONE |
| | Che mmalor’aje? |
| | Pe no terzo de robba |
| 310 | Già vuo’ revotà Napole. |
| | FONZO |
| | No terzo! |
| | No terzo! che te pozza magnà ciavola: |
| | Cheste so’ dece rotola. |
| | PERZECHELLA |
| | Sì, scarze. |
| | FONZO |
| | Senza chille, |
| | Che v’ate nfi a mo scrofonejate. |
| 315 | Tu, mo’ sfratta da lloco, |
| | E atte cannarutazza |
| | Te voglio fa morì sotto a na mazza. |
| | MARRONE |
| | Vance danno la coppola. |
| | FONZO |
| | No cuorno |
| | Avarraje, che te scorna. |
| | MARRONE |
| | Vi’ ch’arrajeso! |
| | FONZO |
| 320 | Mm’aje fatto de dammaggio |
| | Cchiù de dece carrine, e buo’ la coppola? |
| | MARRONE |
| | Oje patro’ non facimmo |
| | Qua comme saddemmanna. |
| | FONZO |
| | Te voglio da lo piello che te scanna. (trase ncasa.) |
| | PERZECHELLA |
| 325 | Vide si lo dejaschence |
| | Lo poteva fa scì cchiù a tiempo. |
| | MARRONE |
| | Saziate |
| | Sciorte cana! la coppola |
| | Nc’aggio perza porzì. |
| | PERZECHELLA |
| | Che nne vuo’ fare? |
| | Ca po io nce l’arrobbo, e te la torno. (esce Fonzo desperato da la casa.) |
| | FONZO |
| 330 | O casa mia precepetata! O Fonzo. |
| | Mo’, non si’ ommo cchiù. (va trovanno.) |
| | MARRONE |
| | Che t’è socciesso? |
| | PERZECHELLA |
| | Tata, ch’è stato? parla. |
| | FONZO |
| | O che mm’avesse |
| | Rotta na spalla quanno nce song’asciuto. |
| | PERZECHELLA |
| | Negra me, ch’aje perduto! |
| | FONZO |
| 335 | Scostateve da lloco; |
| | Ca mo’ mme chiavarria |
| | Na pollecara ncanna. |
| | MARRONE |
| | Se pò sapè ch’aje perzo? |
| | FONZO |
| | Lo spungolo mmalora, de la strenga |
| 340 | De lo cauzone. |
| | PERZECHELLA |
| | Ah. ah. ah. |
| | MARRONE |
| | O che t’afferra panteco |
| | Addonca pe no spungolo |
| | Te despiere accossì? |
| | PERZECHELLA |
| | Te te, non chiagnere |
| | Tata ca ll’aggio asciato. |
| | FONZO |
| | Addov’è? porta cca: Votta fortura. |
| | MARRONE |
| 345 | Ch’è stato mo’? |
| | FONZO |
| | Non vi’ ca s’è ammaccato. |
| | MARRONE |
| | (Uh? mo’, patrone e buono |
| | Lo smossaria.) Maleferuto saziate. |
| | Prete nce puozze asciare; prete, prete |
| | Dint’a chillo cascione. |
| | FONZO |
| 350 | A renegato cano! |
| | Leva le’? |
| | MARRONE |
| | Viene vie’. |
| | PERZECHELLA |
| | Vascia sse mmano. |
| | FONZO |
| |
| | Si tu pe cca nnante |
| | Birbante |
| | Cchiù assumme |
| 355 | Te voglio li lumme |
| | Spezza no zappiello. |
| | T’adaggio, te fello, |
| | Te rompo na gamma: |
| | E tu sia maddamma |
| 360 | Co mmic’aje da fa! |
| | Nfi’ a mo’ songo stato |
| | Da te assassenato. |
| | Tu mm’aje mpezzentuto, |
| | Mm’aje fatta la posta. |
| 365 | Ma mo’ resoluto |
| | Mme songo na vota |
| | E atte facce tosta, |
| | No callo de dota |
| | Non t’aggio da dà. |
| |
| | SCENA X |
| |
| | MARRONE, e PERZECHELLA. |
| |
| | MARRONE |
| 370 | Auh! Che mmalannaggia |
| | Li frutte, e quanno maje mme le portaste |
| | Che nne volive fare! |
| | PERZECHELLA |
| | Veramente, |
| | Va dà confiette a purce. Nce sarria |
| | Chi p’avè doja porcoca de le mmeje |
| 375 | Vennuta se sarria na massaria |
| | E tu non me n’aje grazeja. |
| | MARRONE |
| | Non è chesso |
| | Separolella mia; non vi’ ca pateto |
| | Pe chesso mme ne manna: E commo pozzo |
| | Iremenne da cca; si tu mme tiene |
| 380 | Legato comm’a n’aseno, a lo chiuppo |
| | De le bellizze toje? |
| | PERZECHELLA |
| | Sta zitto, uppeca, |
| | Che non t’auselejasse: Da cca ncoppa |
| | Non te partì, ca sarrà piso mio |
| | De te campà; si isso |
| 385 | No nte vo’ cchiù pe quatto frutte, io |
| | Mancà non te nne faccio e abbasta. Sempe |
| | Volimm’essere nzieme, carne, e ogna. |
| | MARRONE |
| | Facce de Gesommino catalogna |
| | No cchiù, ca sse fenizze che mme faje |
| 390 | Mme pogneno comm’estrece lo core. |
| | PERZECHELLA |
| | E pecché mo’. |
| | MARRONE |
| | Ca de ssi frutte tuoje |
| | Nsi’ a mmo’ no nne sent’autro che l’addore. |
| |
| | Nenna tu si’ lo spruoccolo, |
| | Che mme spertuse, e smafare: |
| 395 | Tu nott’e ghiuorno spulleche |
| | Sto core comm’a bruoccolo: |
| | Tu mme faje scevolì. |
| | Quanno mme faje no gnuoccolo |
| | Mme ne sent’ire nn’estrece! |
| 400 | Mme port’ammore nzuoccolo, |
| | E tu mme faje morì. |
| |
| | SCENA XI |
| |
| | PERZECHELLA, e po CICCIO. |
| |
| | PERZECHELLA |
| | Ora io mo’ pe chisto |
| | Ch’è no scuro guarzone |
| | Mme farria scortecà. Mme mancarria |
| 405 | A mme mo’ n’ommo buono |
| | A chi fa jacovelle, e bille valle? |
| | Ma chillo mm’ave genio. A chi è ncappata |
| | Li vascuotte li pareno taralle. |
| | CICCIO |
| | (O vecco Perzechella!) |
| | PERZECHELLA |
| | (O vecco Ciccio; |
| 410 | Lle voglio fa votà lo cellevriello.) |
| | CICCIO |
| | Vita mia? |
| | PERZECHELLA |
| | Chiuppo bello? |
| | CICCIO |
| | Comme chiuppo? |
| | PERZECHELLA |
| | Che bita? |
| | CICCIO - PERZECHELLA |
| | E ba ca mo’ agghiustammo sta partita. |
| | CICCIO |
| | E sempe mm’aje da pognere? |
| | PERZECHELLA |
| 415 | Negra me! che so’ spingola? |
| | CICCIO |
| | Si’ na spata appuntuta. |
| | PERZECHELLA |
| | E tu si’ fodero. |
| | CICCIO |
| | Si’ na cana arraggiata. |
| | PERZECHELLA |
| | E che te mozzeco? |
| | CICCIO |
| | Na nuvola, che pronta |
| | Pe bolerme annegare |
| 420 | Staje sempe chiena d’acqua. |
| | PERZECHELLA |
| | E tu de vino. |
| | CICCIO |
| | Ah! Barbara no cchiù; ca co sse ghieffole |
| | Che mme hiette, no juorno |
| | Nnanze a ssa casa toja, mme farraje mpennere. |
| | PERZECHELLA |
| |
| | O chesta è cchiù bella! |
| 425 | Da me che pretienne? |
| | O campe, o te mpienne, |
| | Tutt’uno m’è a mme. |
| | E saje lo pecché? |
| | Ca si’ sgrazejato, |
| 430 | Vuo’ fa lo ncappato, |
| | E nno lo saje fa. |
| | Non aje cellevrella; |
| | Mme vuo’ nfracetare |
| | Na zecca mme pare |
| 435 | Che ncuollo mme staje! |
| | Fegliu’ co chi ll’aje? |
| | Vi’ squaglia da cca. |
| |
| | SCENA XII |
| |
| | CICCIO, e po MIMMO. |
| |
| | CICCIO |
| | Co chesta già canosco, |
| | Ca non nce da fa bene: |
| 440 | Cagnà pensiero, o sopportà commene. |
| | MIMMO |
| | Cammara’, t’aggio visto da llà ncoppa |
| | Roccolejà co Perzechella. |
| | CICCIO |
| | A Mimmo! |
| | Ca n’è terreno chisto |
| | Da chiantare mellune. Ste picciotte, |
| 445 | Mme pare ca nce vonno |
| | Menà pe ll’aria comm’a doje pilotte. |
| | MIMMO |
| | Zitto, ca vene Lena; procurammo |
| | De ciammellà co chesta, |
| | Che nzemprece mme pare. |
| | CICCIO |
| 450 | Chesta lloco, ngalera |
| | Te venne, senza fartene addonare. |
| |
| | SCENA XIII |
| |
| | LENA cantanno da la Casa, e li stisse. |
| |
| | LENA |
| |
| | Quanno l’affetto mio mme chiamma Nenna |
| | Mme sento freccecare Uh maramene! |
| |
| | MIMMO |
| | Che d’è? ch’avisse visto |
| 455 | Qua’ brutto coccodrillo? |
| | LENA |
| | (Già che mamma è a chill’atto, |
| | Repassà mme le boglio no tantillo.) |
| | MIMMO |
| | Lena pecché mme fuje, che t’aggio fatto? |
| | LENA |
| | E che mme vuo’ fa cchiù?... mme piglio scuorno |
| 460 | De parlà nnanze a chisto. (chiano a Mimmo.) |
| | MIMMO |
| | Ciccio mio, pe no poco |
| | Fatte nnillà. |
| | LENA |
| | Non te partì da lloco. (chiano a Ciccio.) |
| | MIMMO |
| | Abbiate mo’. (a Ciccio.) |
| | LENA |
| | Vide comm’è ncocciuso? (chiano a Mimmo.) |
| | MIMMO |
| | E ba, potta de mene |
| 465 | Va mo’. (a Ciccio.) |
| | LENA |
| | No nte partì, si mme vuo’ bene. (chiano a Ciccio.) |
| | MIMMO |
| | Vi’ che cuoccio! (a Ciccio.) |
| | LENA |
| | Nn’à tanto a lo sottile: (chiano a Mimmo.) |
| | Falle na ngiurejata. |
| | MIMMO |
| | Dico, tu vuo’ che sbota? |
| | Non è lo ve’? (a Ciccio.) |
| | LENA |
| | Non nte partì na jota. (chiano a Ciccio.) |
| | MIMMO |
| 470 | Mme pare a mme, ch’aje perza |
| | Proprio la descrezzione. |
| | CICCIO |
| | Ora mo’ mm’aje frusciato lo Cauzone; |
| | Cca boglio sta. |
| | MIMMO |
| | Nce puozze stare Ciunco. |
| | LENA |
| | (O bene mio, che gusto!) |
| | CICCIO |
| 475 | A Mimmo tu che baje ascianno oje? |
| | LENA |
| | Via mo’, no nne sia cchiù: statte si vuoje. |
| | MIMMO |
| | Vide che robba! |
| | CICCIO |
| | Lena, |
| | Siente cca; tu co chisto (da parte a Lena.) |
| | Già te cride piglià pane franzese, |
| 480 | E accatte vrenna te lo dico io. |
| | LENA |
| | Te nganne Ciccio mio, |
| | Ca si a fare l’ammore |
| | M’avesse da resorvere; co chillo |
| | Io borria fa? lo facciarria co ttico. |
| | MIMMO |
| 485 | (O bonora, cche sento!) Commo?... |
| | LENA |
| | Zitto. |
| | Quant’aggio ditto a chillo, a tte lo dico. (chiano a Mimmo.) |
| | MIMMO |
| | E pecché mo’ sta Cosa? |
| | LENA |
| | Pecché chillo |
| | Dice ca pe mme more; |
| | Lo voglio tenè nfrisco. |
| 490 | Parla a chillo la lengua, e a tte lo core. |
| | MIMMO |
| | A Lena mia, tu mme ce vuo’ fa stare. |
| | LENA |
| | No, Ninno mio, te pare |
| | Ch’io te voglia gabbà? songh’io capace |
| | De dire na boscia? |
| 495 | Duorme, duorme; ca tu si’ ll’arma mia. |
| | CICCIO |
| | (Ca tu si’ ll’arma mia) |
| | LENA |
| | Mo vengo. (a Ciccio.) |
| | Statte a sentì! (chiano a Mimmo.) |
| | CICCIO |
| | (Mme songo già mbrogliato.) |
| | LENA |
| | Aje ntiso commo ll’aggio pasteggiato? (chiano a Ciccio.) |
| | CICCIO |
| | Mme pastigge a mme puro |
| 500 | Mme pare a mme, ch’aje ditto |
| | Lo stisso a chillo ch’aje mo’ ditto a mme. |
| | LENA |
| | Ma mentre lo decea, penzava a tte, |
| | Bello bammino mio. |
| | MIMMO |
| | (Ah potta d’oje?) |
| | E mbe’, chesto che gnifeca? |
| 505 | A chillo puro dice |
| | LENA |
| | No nte mette mpensiero. |
| | Ch’a chillo dico apposta, e a tte addavero. (a Mimmo.) |
| | MIMMO |
| | A Lena già m’addono ca m’abburle. |
| | LENA |
| | Ora io mo’ te dico tunno, e chiatto |
| 510 | Chello che d’è! |
| | CICCIO |
| | (Mo schiatto.) |
| | Lena, parlame chiaro: |
| | Tu mme repasse, o mme vuo’ fa mpazzire. |
| | LENA |
| | No; mo’ la verità te voglio dire. |
| |
| | A tte comm’a Nennillo, (a Mimmo.) |
| 515 | Mbraccia te portarria; |
| | Ma voglio bene a chillo; |
| | Non saccio che te fa. |
| | A tte mo’ donarria (a Ciccio.) |
| | Tutta me stessa; ma! |
| 520 | Ma chillo è ll’arma mia: |
| | Non, saccio che te di’. |
| | (Ll’aggio da fa mpazzì.) |
| | Ma non te despera’! (a Mimmo.) |
| | Chi sa si cagno amore! |
| 525 | Non te nfadà, chi sa. (a Ciccio.) |
| | Che maje pò fa sto core? |
| | (Cchiù meglio non pà hì.) |
| |
| | SCENA XIV |
| |
| | CICCIO, e MIMMO. |
| |
| | CICCIO |
| | Chesta nce porta a Mmammarannucella. |
| | MIMMO |
| | È bero sì, ma è grazejosa, e bella. |
| | CICCIO |
| 530 | E te dice lo Core |
| | De sopportà ssi passagaglie? (Mimmo cierto.) |
| | CICCIO |
| | Ora ammico; sta cosa |
| | De passare pe lloco non me sona. |
| | Si co quarche regalo |
| 535 | Lloro vonno d’Ammore |
| | Qua gusteciello fareme godere |
| | Bene sta; quanno none; |
| | A Lucca me te parze de vedere. (se nne va.) |
| | MIMMO |
| | Ah! Dice buono tu, ca no la vide |
| 540 | Co ll’uocchie mieje; né ll’amme |
| | Co sto core; Lo saccio ch’è na cana: |
| | Ca mme fa sta ncampana: |
| | Ma quanno n’arma spera |
| | De godere qua cchelleta ammorosa |
| 545 | Abesogna, che soffra quarche cosa. |
| |
| | Chi non sa sopportà no dolore |
| | Pe chi ll’ave arrobato lo core, |
| | Non pò dire ca bene le vo’. |
| | Ma chest’arma che troppo vo’ bene, |
| 550 | Se contenta soffrire le pene, |
| | Che le da, chi lassare non può. |
| |
| | SCENA XV |
| |
| | MARRONE, e GRANNIZIA. |
| |
| | MARRONE |
| | Ah ah ah bene mio ch’abbesogna |
| | Che rida pe no mese. |
| | GRANNIZEJA |
| | Che d’è Marrone, staje de buon’umore? |
| | MARRONE |
| 555 | Sta gliannola de schierchia |
| | M’à fatto proprio ridere de core. |
| | GRANNIZEJA |
| | E commo? |
| | MARRONE |
| | Sapparraje ca lo patrone |
| | Me n’hà mannato. |
| | GRANNIZEJA |
| | No nne saccio niente. |
| | MARRONE |
| | Sacce ca pe di frutte |
| 560 | Che m’hà trovato cca magnammo: È sciuto, |
| | E dapò avè sbruffato omm’a berro |
| | S’hà pegliata la coppola addov’io |
| | Tenea li frutte, e s’è nzerrato dinto. |
| | Io mo’ aggio visto Ciomma |
| 565 | E nce ll’aggio cercata; Essa, è trasuta |
| | Po s’è affacciata da lo fenestiello |
| | E mm’hà ditto, io non ll’ascio |
| | M’azzò che tu scaruso |
| | Non vaje da cca Marrone caro caro |
| 570 | Te, pigliate sta vesta de ll’aurenaro. |
| | GRANNIZEJA |
| | Ah ah ah ah. Lo buono e ch’è domesteca. |
| | MARRONE |
| | Cheste so’ peo de ll’autre. |
| |
| | SCENA XVI |
| |
| | CIOMMA strellanno da dinto e li stisse. |
| |
| | CIOMMA |
| | Piglia, afferralo |
| | Non me lo fa scappà. |
| | MARRONE |
| | O te, veccola cca. |
| | CIOMMA |
| | Teni’, tenitelo. |
| 575 | Addov’e ll’aje ncappata? |
| | GRANNIZEJA |
| | Che cosa mo’? |
| | CIOMMA |
| | No polece |
| | Che da miezo a ste deta m’è scappato. |
| | MARRONE |
| | Ah ah ah ah ah mme credeva |
| | Ch’era a lo mmanco, qua forgedecato. |
| | GRANNIZEJA |
| 580 | Va bene mio, va saglietenne ncoppa. |
| | CIOMMA |
| | Non pozzo, ca so’ zoppa, |
| | Chisto cano m’hà dato |
| | No muorzo a lo tallone. |
| | MARRONE |
| | Testemmoneia vosta |
| | CIOMMA |
| 585 | E tu no nte n’adduone |
| | Ca t’ha fatta la posta |
| | E t’à puosto pe naso no temmone. |
| | GRANNIZEJA |
| | A mme? |
| | CIOMMA |
| | Sì a tte che baje senza cammisa. |
| | MARRONE |
| | Ah ah ah ah. |
| 590 | Bene mio ca mo’ sbotto de la risa. |
| | GRANNIZEJA |
| | Sì, ca po passa |
| | Lo nnammorato tujo |
| | CIOMMA |
| | Che mo’ li nnammorate |
| | Se farriano scannà pe quattecalle |
| 595 | Paren’uommene buone, e so’ cavalle. |
| | MARRONE |
| | Che mporta chesto: vasta |
| | Che siano belle giuvene. |
| | CIOMMA |
| | No ca n’abbasta. Sona |
| | E tu va responnenno a sta canzona. |
| |
| 600 | Li ncappate che n’anno tornise, |
| | Mme pareno mpise, |
| | So’ lotane, sciù. |
| |
| | MARRONE - GRANNIZEJA |
| |
| | È lo vero, e no poco de cchù? |
| |
| | CIOMMA |
| |
| | Vonno fa li galante sforzuse, |
| 605 | E so’ peducchiuse. |
| | Che dice mo’ tu? |
| |
| | MARRONE GRANNIZEJA |
| |
| | È lo vero e no poco de cchiù. |
| |
| |
| |
| |
