| | |
| | |
| | Le zitelle de lo Vommaro, Napoli, Se venneno sotta alla Posta da Nicola de Biase, 1731 |
| | a cura di Simone Caputo |
| |
| |
| |
|
| |
| | ATTO SECONDO |
| |
| | SCENA PRIMMA |
| |
| | FONZO, che porta PERZECHELLA afferrata pe la recchia. |
| |
| | FONZO |
| | Passa cca, passa cca. |
| | PERZECHELLA |
| | Tata va chiano, |
| | Ca mme scippe na recchia. |
| | FONZO |
| 610 | Te voglio fa scì ll’arma. |
| | PERZECHELLA |
| | E ch’aggio fatto? |
| | FONZO |
| | Che facive mo’ nnante |
| | Nziemme co Lena, sott’a la nocella? |
| | PERZECHELLA |
| | Stevamo pazzejanno |
| | FONZO |
| | A che? |
| | PERZECHELLA |
| | A la fossetella. |
| | FONZO |
| 615 | Fossetella? |
| | PERZECHELLA |
| | Gnorsì. |
| | FONZO |
| | Pe chesto creo, |
| | Ca scavavano nterra |
| | Siente cca; cana perra |
| | (Lo sospetto mme roseca.) |
| | Si tu da mo’ nennante cchiù llà sotta |
| 620 | Te nce firme na cria, |
| | Io scorteco viva. |
| | PERZECHELLA |
| | Arrasso sia; |
| | E pecché? |
| | FONZO |
| | Saglietenne. |
| | Ca mm’aje avuto a fa morì de subbeto. |
| | PERZECHELLA |
| | Negra me stongo mmiezo |
| 625 | A na pazza, e a no Patre a lo spreposeto. (se ne trase.) |
| |
| | SCENA II |
| |
| | FONZO |
| | Oh! lasseme peglià no po’ de sciato; |
| | Oh! non so’ muorto oje pe la paura, |
| | Non moro cchiù: a treccalle, e quattecalle: |
| | A botta de magnare pane, e torza |
| 630 | M’aggio accocchiato chello po’ d’argiento |
| | Che saranno cred’io |
| | Cincociento (sentesseme quarcuno;) |
| | Cincociente docate |
| | Che dinto a na cascetta aggio atterrate |
| 635 | Sott’a chella nocella; e sta mmalora, |
| | Nzieme co ss’autra cauza nfosa, stevano |
| | Scavanno llà; considera, |
| | Che paura aggio avuta, |
| | Ca già mme smacenava, |
| 640 | Ca la cascetta mia s’era partuta. |
| |
| | SCENA III |
| |
| | GRANNIZEJA da la Casa, e lo stisso. |
| |
| | GRANNIZEJA |
| | Aje abbuscato? Schiatta |
| | Quanno parl’io, non ghire a la casetta. |
| | FONZO |
| | Cascetta! O nigro mene! |
| | Grannizeja, che cascetta? co chi ll’aje? |
| | GRANNIZEJA |
| 645 | Ll’aggio co Lena mia, che da che pratteca |
| | Co Perzechella, è fatta na superbia, |
| | E bace a la Cascetta |
| | FONZO |
| | A qua’ cascetta? |
| | Tu che gliannola dice? |
| | GRANNIZEJA |
| | Dico; ca da che a Lena |
| 650 | Ll’anno dato a rentennere |
| | Ch’ave d’ascià n’annascondiglio. |
| | FONZO |
| | (Cancaro?) |
| | GRANNIZEJA |
| | Ave auzata la coda. |
| | FONZO |
| | E addove ll’hà d’ascià ss’annasconniglio. |
| | GRANNIZEJA |
| | Che saccio: da cca attuorno. |
| | FONZO |
| 655 | (Nnanze le scenne gotta.) |
| | GRANNIZEJA |
| | Che t’aje pegliato collera? |
| | FONZO |
| | None no, vavattenne. (Io so’ barato.) |
| | GRANNIZEJA |
| | Negra me, chisto pare speretato. (se ne va.) |
| | FONZO |
| | Già mme la vonno fare: abesognante |
| 660 | Che la leva da llà, denare mieje, |
| | V’anno abbistate già. Si maje ve perdo |
| | Me scanno; ca la vita |
| | È peo de morte senza l’acquavita. |
| |
| | Li denare, chi le ghietta |
| 665 | Se pò di’ ch’è no pezzente |
| | Ricco è chillo, che ll’acchietta, |
| | Che dicenno ca n’hà niente |
| | Ave tutto mmeretà. |
| | Vonno dire, ca l’avare |
| 670 | So’ nfelice; ed è boscia. |
| | Ca l’avere li denare |
| | È no gusto; n’allegria |
| | Che cchiù meglio non se dà. |
| |
| | SCENA IV |
| |
| | MARRONE, co la sporta, e la valanza vennenno frutte, e LENA. |
| |
| | MARRONE |
| | O la bell’uva fresca, o la bell’uva. |
| 675 | Oje mela genovise, oje mela pera. |
| | LENA |
| | Oje mela mela? |
| | MARRONE |
| | Mela. |
| | LENA |
| | O addio Marrone: |
| | Ch’aje cagnato patrone? |
| | MARRONE |
| | E si era nzofribbolo. |
| | LENA |
| 680 | Posa. Quanto lo ruotolo? |
| | MARRONE |
| | Niente: pigliate chello |
| | Che buo’ da cca, facce de milo diece. |
| | LENA |
| | Uh; a mme mo’ milo diece? |
| | Non vi’ ca so’ cchiù negra de la pece. |
| | MARRONE |
| 685 | A Le’ |
| | LENA |
| | Ne? che te deze |
| | Chillo si Astrolaco apposticcio? |
| | MARRONE |
| | Uh chillo? |
| | Sacce ch’è no chiattillo |
| | Che non se dà |
| | LENA |
| | Uh? si non faccio arrore |
| | Veccolo ca mo’ vene. |
| | MARRONE |
| | A tte repassalo. |
| |
| | SCENA V |
| |
| | MIMMO, e li stisse. |
| |
| | MIMMO |
| 690 | Si so’ secuta pettole (votato dinto a la scena.) |
| | A lo commanno mio. |
| | LENA |
| | Co chi ll’hà? |
| | MARRONE |
| | No lo bi’, co lo Si Ciccio. |
| | MIMMO |
| | Gnorsine, coffejare nce facimmo |
| | Te mporta niente a tte? |
| | MARRONE |
| | Che nce si’ Mimmo? |
| | MIMMO |
| 695 | Niente; ll’aggio co Ciccio |
| | Ca dice ca mme faccio coffejare |
| | Da ssa fegliola. |
| | LENA |
| | Lassalo parlare: |
| | Ca chiste che pretenneno |
| | De n’esse da nuj’autre repassate; |
| 700 | Chiste so’ cchiù dell’autre coffejate |
| | Collecienzia vosta. |
| | MIMMO |
| | Aspetta, ferma. |
| | Non vuo’ peglià di frutte? |
| | LENA |
| | Obbrecatissimo. |
| | MARRONE |
| | (Afferra potta d’oje.) (a Lena.) |
| | MIMMO |
| | Piglia Marrone. (la dà no pezzotto.) |
| | MARRONE |
| | E biva lo si Mimmo, |
| 705 | Veramente che buo’? galantomone. |
| | Va piglia lo canisto. (a Lena.) |
| |
| | SCENA VI |
| |
| | CIOMMA, e li stisse. |
| |
| | CIOMMA |
| | Oh! Lena Lena?... Uh! negra me, chi è chisto? |
| | MARRONE |
| | Nce la voglio sta schierchia. |
| | LENA |
| | Comme no la canusce? |
| | CIOMMA |
| 710 | A sì, sì, ll’aggio visto da llà ncoppa |
| | A sso fante de mazze; |
| | Ma mo’ commo s’è fatto Re de coppa. |
| | MARRONE |
| | Ah, ah, ah, ah, Lene mio, mo’ mme smascello. |
| | MIMMO |
| | Mar’essa: è ghiuto già lo cellevriello. |
| | LENA |
| 715 | Embe’ Ciomma, a che t’aggio da servire. |
| | CIOMMA |
| | Sore mia cara cara |
| | Vogl’j nfi’ all’auto Munno. |
| | MARRONE |
| | Bonviaggio. |
| | CIOMMA |
| | E accossì Lena mia |
| | Mm’aje da fa no piacere, |
| 720 | Tu, e Marrone, mparateme la via. |
| | MARRONE |
| | Oh! nquanto a mme, te puo’ abbiare sola. |
| | LENA |
| | E io pe mme, manc’aggio sta ntenzione. |
| | CIOMMA |
| | Ma chesta non è azzione! |
| | A mme che so’ de Trocchia la Reggina |
| 725 | Se fa st’affrunto? avite troppo affiso |
| | Oggi la mia corona: |
| | O là? cca nnanze a mmene |
| | Facite tutte duje mo’ Zita bona. |
| | MARRONE |
| | Meglio. |
| | MIMMO |
| | Ah, ah. Mo’ crepo. |
| | LENA |
| | Io so’ scosciuta. |
| | CIOMMA |
| 730 | E tu auza, non vi’ ca t’è caduta. |
| | MIMMO |
| | Che cosa? |
| | CIOMMA |
| | L’attaccaglia. |
| | MIMMO |
| | E battenne. |
| | CIOMMA |
| | O Marrone, |
| | È lo vero ca staje senza na maglia? |
| | MARRONE |
| | Così fosse boscia. |
| | CIOMMA |
| 735 | Te, piglia cca sto piezzo |
| | M’ajemmè che bedo fuje arrasso sia. |
| | MARRONE |
| | Che bide? |
| | CIOMMA |
| | No serpente. |
| | Lo vide. |
| | MARRONE |
| | Io pe mme non vedo niente. |
| | CIOMMA |
| | E uscia manco lo vede? |
| | MIMMO |
| 740 | Che buo’ che bea, na cufece. |
| | CIOMMA |
| | A ca già mme lo sento nfra li piede. |
| |
| | A mme sento mozzecà. |
| | Chi mm’ajuta scura me! |
| | Ma te vide; Vide llà; |
| 745 | Mo’ è zompato mpietto a tte. (a Marrone.) |
| | Piglia, acchiappa ma dov’è; |
| | Co chi l’aje? da me che buo’? |
| | Belle pazze mmeretà. |
| | Ma vedite, poveriello; (mostranno Mimmo.) |
| 750 | Che scartiello |
| | Che t’è asciuto? |
| | O Marrone benmenuto? |
| | Do si’ stato pe nfi’ a mo’? |
| | Che se fa per la Cità? |
| |
| | MARRONE |
| |
| 755 | Chi hà d’avere, e chi hà da dà. |
| |
| | SCENA VII |
| |
| | MIMMO, LENA, e MARRONE. |
| |
| | MIMMO |
| | Ah, ah, ah, poverella. |
| | MARRONE |
| | O ch’è no pasto nobbole. |
| | MIMMO |
| | Pecché jette mpazzia? |
| | MARRONE |
| | Pecché lo Patre no le voze dare |
| 760 | No cierto malantrino pe marito. |
| | MIMMO |
| | E chillo s’e nzorato? |
| | MARRONE |
| | Cierto. |
| | LENA |
| | E chesto |
| | Ll’ave fatta schierchiare: Or io besogna |
| | Che mme ne trasa. |
| | MIMMO |
| | Oddio? |
| | Statte n’autro tantillo. |
| | LENA |
| | E che bolite? |
| | MIMMO |
| 765 | Che boglio ne? dincello tu Marrone. |
| | MARRONE |
| | Lena mia. tu non saje, |
| | Che ba cercanno l’assetato. |
| | LENA |
| | Acqua. |
| | MIMMO |
| | Cierto. |
| | LENA |
| | Cca sta lo puzzo; |
| | Mo’ te nne tiro no catillo, e sciacqua. (va pe se nne ire.) |
| | MIMMO |
| 770 | No, statte: che te pare? ah ca mo’ sbotto. |
| | MARRONE |
| | Vide ca mm’hà mollato no pezzotto, |
| | Non te fa tanto cana. (a Lena.) |
| | LENA |
| | E n’è schiattato ancora. |
| | MIMMO |
| | Propio tu vuo’ che mora |
| 775 | Non è lo ve’? (s’accosta.) |
| | LENA |
| | Parlate da lontano, |
| | Ca tengo bon’aurecchia. (se scosta.) |
| | MARRONE |
| | Oh! Bonora la vecchia, |
| | Si Mimmo leva mano. |
| | MIMMO |
| | Mannaggia lo potta de chi non crede, |
| 780 | Si non me scannarria. |
| | A lo mmacaro schiattosella mia |
| | Damme quacche speranza. |
| | LENA |
| | De che? |
| | MIMMO |
| | De consolareme. |
| | LENA |
| | Che t’è muorto quarc’uno? |
| | MIMMO |
| | Puro chesso. |
| | MARRONE |
| 785 | Veccola cca, vattenne. |
| | MIMMO |
| | Auh! mannaggia, chi ve vene appriesso. (Se nne va.) |
| | MARRONE |
| | Ah ah ah pover’ommo? |
| | Nc’hà perza na goniglia a ssa facenna. |
| | LENA |
| | Che cos’è na goniglia. |
| | MARRONE |
| | So’ doje pennarde. |
| | LENA |
| 790 | E che so’ doje pennarde? |
| | MARRONE |
| | No tarì. |
| | LENA |
| | Bravo! Che gusto nc’aggio quanno vedo |
| | No strafalario, co lo vagno ascì. |
| |
| | SCENA VIII |
| |
| | GRANNIZEJA, e li stisse. |
| |
| | GRANNIZEJA |
| | Che d’è Marrone? staje allegramente? |
| | MARRONE |
| | Granni’, non me di’ niente |
| 795 | Ch’aggio scippato no tarì a l’astroloco. |
| | GRANNIZEJA |
| | E commo? |
| | LENA |
| | M’hà boluto |
| | Pagà tutte ssi frutte. |
| | GRANNIZEJA |
| | E tu te ll’aje pigliate? |
| | LENA |
| | E che so’ tuosseco. |
| | GRANNIZEJA |
| | Facce tosta, non saje |
| 800 | Quanto pretenne, e bole |
| | No frustato de chiste |
| | Quanno co no regalo te s’azzezza. |
| | Non dovive pigliarelo. |
| | LENA |
| | Ah! mamma mia, mo’ chi non piglia secca. |
| |
| 805 | Quanno ssi milordielle |
| | Diceno a nuje Zitelle: |
| | Belsa fegliola mia |
| | Vuo’ sta galantaria? |
| | Subeto responnimmo, |
| 810 | La voglio signorsì. |
| | Po quanno nc’addonammo |
| | Ca vonno tu mme ntienne, |
| | Subbeto nce ngrifammo |
| | Dicenno, signor no, |
| 815 | L’ammore de sti tiempe |
| | S’ave da fa cossì. |
| |
| | SCENA IX |
| |
| | GRANNIZEJA, MARRONE, e po FONZO. |
| |
| | MARRONE |
| | Che nne dice tu mo’? |
| | GRANNIZEJA |
| | Che presentosa. |
| | MARRONE |
| | No, da na parte, dice quarche cosa. |
| | Ora va piglia lo Canisto. |
| | GRANNIZEJA |
| | Sine. |
| | MARRONE |
| 820 | Vide tu puro commo te ne accuonce. |
| | GRANNIZEJA |
| | Che nce vuo’ fa? lo Munno accossì corre. |
| | MARRONE |
| | Semp’è bona la robba de la Torre. |
| | FONZO |
| | Chillo non è Marrone |
| | Ah; marejuolo cano; |
| 825 | Chella n’è robba mia? e che nce dubbejo? |
| | All’Uorto se l’hà fatto; |
| | Mo’ si ca songo assassinato affatto. |
| | GRANNIZEJA |
| | Vecco cca lo canisto. |
| | MARRONE |
| | Posa lloco; |
| | All’uocchie de chi hà spiso li denare. |
| | FONZO |
| 830 | Oh; sango mio, vi commo se lo zucano, |
| | Ma no ve resciarrà. |
| | MARRONE |
| | Sto genovese |
| | Te non va’ no Carrino. |
| | FONZO |
| | Ah; lazzaro, assassino; |
| | Te nc’aggio cuoto. (da de mane, a Marrone.) |
| | GRANNIZEJA |
| | Marame ch’è stato. |
| | MARRONE |
| 835 | A mme assassino. |
| | GRANNIZEJA |
| | Ne? che t’ha arrobbato. |
| | FONZO |
| | Ssa rrobba che s’ha fatto all’Uorto mio. |
| | MARRONE |
| | Me ll’aggio fatta all’uorto |
| | De lo mmale feruto che te sbozza. |
| | Non vuo’ lassà? |
| 840 | Voglio lo stiento mio |
| | MARRONE |
| | E tu te la vuo’ fa na potechella. |
| | FONZO |
| | A schauzone, frabutto. |
| | MARRONE |
| | Che d’è? vuo’ che te perda lo respetto? |
| | FONZO |
| | Le Granni’, ca le voglio |
| 845 | Scippà proprio la capo da lo pietto. |
| | GRANNIZEJA |
| | Via Fonzo ch’è breogna. |
| | FONZO |
| | È breogna e lo ve’? facive apparte |
| | Co chisto tu porzì, brutto carogna. |
| | GRANNIZEJA |
| | A mme carogna? O allesenuto fraceto, |
| 850 | Facce d’Ascio de Capoa. |
| | MARRONE |
| | Scippale chillo naso. |
| | FONZO |
| | Viene viene, |
| | Ca te sguarro ssa vocca janarone. |
| | GRANNIZEJA |
| | Aspetta. |
| | MARRONE |
| | Via forniscela. |
| | Ca chisto vo’ da nuje, qua remessione. |
| |
| 855 | A mme Carogna? |
| | Carogna a mme? |
| | Si mmiezo a st’ogna |
| | T’aggio no juorno, |
| | Facce de Cuorno |
| 860 | Musso de Crapa; |
| | Comm’a na rapa |
| | Ssa catarozza |
| | Te spacco affe. |
| | A mme che a furia |
| 865 | Semp’aggio avute |
| | Botte, e mmestute, |
| | A mme sta ngiuria? |
| | Carogna a mme? |
| | Mpiso te pozza |
| 870 | Mpiso vedè. |
| |
| | SCENA X |
| |
| | FONZO, e MARRONE, e po PERZECHELLA. |
| |
| | FONZO |
| | Da cca ssa scartatura. |
| | MARRONE |
| | A chi? tu vuo’ che proprio |
| | Mme te sorchia comm’uovo. |
| | FONZO |
| | E che buo’ che te faccia |
| 875 | Sghizzà le cellevrella? |
| | MARRONE |
| | Va vascianno le mmano, |
| | Ca te nn’abbisso co no carcacoppola. |
| | FONZO |
| | Vi ta’ oje mme te joco |
| | PERZECHELLA |
| | (Ah! negramene!) |
| | Tata, Marrone, jate chia’, fermate. |
| 880 | Agge creanza tu, vatte arrassanno. |
| | Tata, trasimmoncenne. |
| | FONZO |
| | Va, non sia Fonzo io, |
| | Si no nte faccio chiagnere. |
| | PERZECHELLA |
| | Via mo’. |
| | MARRONE |
| | Mme schiaffarraje ssa facce a Napole. (trase Fonzo.) |
| | PERZECHELLA |
| 885 | Briccone, veramente. |
| | MARRONE |
| | Ma si isso |
| | PERZECHELLA |
| | Va va, ca si’ no lazzaro. |
| | MARRONE |
| | No, sienteme |
| | PERZECHELLA |
| | A dà de mano a Patremo! |
| | MARRONE |
| | La causa |
| | PERZECHELLA |
| | Non te pozzo vedè. |
| | MARRONE |
| | Sacce ca io |
| | PERZECHELLA |
| | Vattenne. |
| | MARRONE |
| | Perzechella |
| | PERZECHELLA |
| 890 | So’ sorda. |
| | MARRONE |
| | Na parola |
| | PERZECHELLA |
| | A bene mio. |
| | MARRONE |
| | Pe caretà. |
| | PERZECHELLA |
| | Non serve |
| | MARRONE |
| | Vi’ ca mm’accido. |
| | PERZECHELLA |
| | Scannate. |
| | MARRONE |
| | Bellissemo. |
| | Già che non vuo’ sentireme, |
| | Già che mme spriezze, e mm’uodie, |
| 895 | Già che buo’ che mm’accida |
| | Te voglio dare gusto; a chisto passo |
| | Mme vogl’j a derropè dint’a no Monte. |
| | PERZECHELLA |
| | No no, fermate. |
| | MARRONE |
| | Lassa. |
| | PERZECHELLA |
| | Sacce ca io |
| | MARRONE |
| | Vattenne. |
| | PERZECHELLA |
| 900 | Na parola |
| | MARRONE |
| | So’ surdo. |
| | PERZECHELLA |
| | Viene cca mo’ |
| | MARRONE |
| | Non serve. |
| | PERZECHELLA |
| | Marrone |
| | MARRONE |
| | A bene mio. |
| | PERZECHELLA |
| | Vi’ ca mm’accido? |
| | MARRONE |
| | Scannate. |
| | PERZECHELLA |
| | Bellissemo. |
| | Già che non vuo’ sentireme, vattenne, |
| 905 | Ca io mme pento d’avè fatto tanto |
| | Pe no guarzone comm’a tte. no sgrato, |
| | No perro, no schefienzia |
| | MARRONE |
| | Siente, Pareto |
| | PERZECHELLA |
| | Vorria che cheste lagreme |
| | M’affocassero oje. |
| | MARRONE |
| | (Mme sento fragnere.) |
| 910 | Perzechella non chiagnere |
| | PERZECHELLA |
| | Arrassateve. |
| | MARRONE |
| | Mo’ nce nne jammo. |
| | PERZECHELLA |
| | (Ah ca mme fa morire.) |
| | MARRONE |
| | Sa pecché |
| | PERZECHELLA |
| | Ancora lloco. |
| | MARRONE |
| | E non mne vuo’ |
| | PERZECHELLA |
| | Gnornò, lassame ire. |
| | MARRONE |
| |
| | Te lasso sì, ma tu |
| 915 | No nce penza cchiù a mme. |
| |
| | PERZECHELLA |
| |
| | Ah? si nce penzo cchiù, |
| | Tale nne sia de me. |
| |
| | MARRONE |
| |
| | Sgrata. |
| |
| | PERZECHELLA |
| |
| | Si’ ll’odio mio. |
| |
| | PERZECHELLA - MARRONE |
| |
| | (Ah? ca mme sent’Oddio, |
| 920 | Ll’arma de pietto ascì.) |
| |
| | MARRONE |
| |
| | Siente, te pentarraje |
| | De chesto che mme faje. |
| |
| | PERZECHELLA |
| |
| | No; ca no nce cchiù ammore |
| | Pe tte dint’a sto core. |
| |
| | MARRONE - PERZECHELLA |
| |
| 925 | (Ah ca mme fa morì.) |
| |
| | SCENA XI |
| |
| | MIMMO, CICCIO e po LENA |
| |
| | MIMMO |
| | E no nte vuo’ trattenere. |
| | Pe nfi’ a sta sera? |
| | CICCIO |
| | E quinnece |
| | Lloco, no nce d’accidere |
| | Manco na pappamosca, |
| 930 | E te vuo’ sta. |
| | MIMMO |
| | Mme faje venire a ride |
| | CICCIO |
| | E tu mme faje schiattare. |
| | MIMMO |
| | Nuje cca simmo sagliute |
| | Pe ste fegliole, e non pe Cacciare. |
| | LENA |
| | (Ancora cca ssi lotane! |
| 935 | Nne le boglio fa ire proprio Carreche |
| | De mmaraviglia oje.) |
| | MIMMO |
| | Vecconn’una: accostammonce; |
| | Perdimmonce na chiacchiara. |
| | CICCIO |
| | Nce perdarraje li passe. |
| | MIMMO |
| 940 | Embe’ Lena, vi’ commo nce repasse. |
| | LENA |
| | N’è lo vero; È ca vuje no ncanoscite |
| | Ca tutte duje mm’avite |
| | Ncappata comm’a Lecora a lo bisco. |
| | MIMMO |
| | No, chesto no mpò essere, |
| 945 | Ma si uno de nuje te jesse a genio; |
| | Dincello; pecché ll’autro |
| | No nse nne cura. |
| | LENA |
| | Ora parlammo chiaro. |
| | Cca simmo doje fegliole, |
| | E buje nce pretennite a tutte doje: |
| 950 | Non è lo ve’? |
| | MIMMO |
| | Securo. |
| | LENA |
| | Pe Mogliere mperrò. |
| | CICCIO |
| | Già, se nce ntenne. |
| | LENA |
| | Mo chiammo Perzechella; |
| | Che de vuje vole a chella |
| | Che se la piglia, e ll’autro |
| 955 | Po mme lo piglio io. |
| | MIMMO |
| | Ah! Lena ca si’ ttu l’affetto mio. |
| | LENA |
| | E chillo? |
| | CICCIO |
| | Perzechella |
| | No nfa pe mme. |
| | LENA |
| | Pecché? |
| | CICCIO |
| | Ca mm’ave fatto |
| | Ciento male creanze. |
| | LENA |
| 960 | E mbe’? comm’agghiustammo ste balanze? |
| | Sa che potriamo fare? |
| | Mo’ la chiammo: nch’è asciuta |
| | Ammarrammonce l’uocchie tutte quatto, |
| | Girammo attuorno, attuorno: |
| 965 | E po chi afferra a mme, sarrà lo mio, |
| | Chi afferra Perzechella, |
| | Chella se pigliarrà. Ve contentate? |
| | MIMMO |
| | Che dice Ciccio? |
| | CICCIO |
| | A mme? fa commo vuoje? |
| | LENA |
| | La chiammo, o mme ne traso? |
| | MIMMO |
| | Va la chiamma. |
| | LENA |
| 970 | (Commo nce so’ cadute) Oje Perzechella? |
| | MIMMO |
| | Che d’è? staje penzaruso? |
| | CICCIO |
| | Penzo ca songo locco arreventato |
| | Senz’addonaremenne. |
| |
| | SCENA XII |
| |
| | PERZECHELLA, e li stisse. |
| |
| | PERZECHELLA |
| | Lena mia m’aje chiammato? |
| | MIMMO |
| 975 | E siente a mme. (a Ciccio.) |
| | LENA |
| | Vi’ llà, li Cammarate. |
| | PERZECHELLA |
| | Ah! Sore mia ca stongo co li frate, |
| | Lassame ì. |
| | LENA |
| | Sie Perzechella mia |
| | Si per cose d’Ammore |
| | Te vuo’ ammalì, de la salute toja |
| 980 | Se mbroglia la matassa. |
| | Fa commo faccio io, |
| | Amma chi t’amma, e chi non t’amma lassa. |
| | PERZECHELLA |
| | Accossì borria fa, ma po |
| | CICCIO |
| | (Le burpe |
| | Se stanno consurtanno.) |
| | MIMMO |
| 985 | Pe chesto nce lo dono. |
| | PERZECHELLA |
| | Dice sopierchio buono, |
| | Che mme voglio fa jetteca, spassammoce. |
| | LENA |
| | E po ch’avimmo coffejate chiste |
| | Jammoncenne a la festa. |
| | PERZECHELLA |
| | Jammoncenne. |
| | MIMMO |
| 990 | Bella fegliola? |
| | LENA |
| | Ora nuje simmo leste. |
| | Vecco li moccature. |
| | MIMMO |
| | Ecco li nuoste. |
| | Legate Ciccio. |
| | CICCIO |
| | A mme? pe mme so’ llesto. |
| | LENA |
| | Ora decite vuje, |
| 995 | Commo decimmo nuje, e po girate. |
| | PERZECHELLA |
| | (Chesta sarrà na burla co li sciuocche.) |
| | MIMMO |
| | Chi sa che nn’esce. |
| | CICCIO |
| | Commo simmo Iocche. (Attaccate che se sarranno li moccature a l’uocchie l’uommene, le fegliole se sciogliarranno li lloro, e dapo cantata sta strofetta, se nne trasarranno dinto le femmene.) |
| | LENA - PERZECHELLA |
| |
| | Tant’attuorno a la lucernella |
| | Va volanno la palommella, |
| 1000 | Nfi’ che la scella |
| | S’hà da bruscià. (se nne traseno redenno.) |
| |
| | MIMMO - CICCIO |
| |
| | Tant’attuorno a la lucernella |
| | Va volanno la palommella, |
| | Nfi’ che la scella |
| 1005 | S’hà da bruscià. |
| |
| | SCENA XIII |
| |
| | FONZO da na parte, e GRANNIZEJA dall’autra, che se fermano a bedere MIMMO, e CICCIO girare, e po MARRONE. |
| |
| | FONZO |
| | (Che bo’ di’ sta mmenzione?) |
| | GRANNIZEJA |
| | (Chesto che d’è?) |
| | MIMMO |
| | Va chiano mascolone, |
| | Ca già saccio chi si’. |
| | CICCIO |
| | La schiattosella |
| | Vorria proprio acchiappare. |
| | MIMMO |
| | Ah! Cacciottella! |
| | MARRONE |
| 1010 | (Te te! chesto che gnifeca!) |
| | FONZO |
| | Chisto è ghiuto mpazzia. |
| | MARRONE |
| | (Stammo a bedè sta festa.) |
| | MIMMO |
| | Ah! Nenna mia (afferra Fonzo.) |
| | Tu si’ de Mimmo. |
| | CICCIO |
| | Tu si’ già de Ciccio (afferra Grannizeja.) |
| | FONZO |
| | Ah, ah, ah, ah. Redimmoncenne. |
| | GRANNIZEJA |
| | Chiste, |
| 1015 | Oje che banno vennenno! |
| | MIMMO |
| | Via, jammoce scioglienno. |
| | CICCIO |
| | Core mio. |
| | MIMMO |
| | Gioja bella. (Se scioglieno, e se troveno avè afferrato Fonzo, e Grannizeja.) |
| | MIMMO |
| | Oh! bonora! |
| | CICCIO |
| | Oh! dejaschence! |
| | No nte ll’aggio ditt’io? |
| | MIMMO |
| | Benaggia craje. |
| | FONZO |
| 1020 | Ah, ah, ah. Jatevenne da cca ncoppa |
| | Ca st’aria n’è pe buje. |
| | Vide che mbruoglio. (trase.) |
| | GRANNIZEJA |
| | Vuje starrite mbreache, |
| | È uoglio, è uoglio. (trase.) |
| | CICCIO |
| | Potta! Simmo trattate |
| 1025 | Da mbreache porzì. |
| | MARRONE |
| | Cheste so’ state |
| | Sse pecciotte è lo ve’? |
| | MIMMO |
| | Sse Cancarelle. |
| | MARRONE |
| | Che nce vuo’ fa. |
| | CICCIO |
| | Vi’ commo so’ resciute. |
| | MARRONE |
| | Bella pareglia. |
| | MIMMO |
| | Songo troppo astute. |
| | CICCIO |
| |
| | Sa pecché songo astute |
| 1030 | Sse meze pettolelle? |
| | Ca ll’uommene alloccute |
| | Co tanta partitielle |
| | Le fanno grellejà. |
| | Ma, nce lo mmeretammo |
| 1035 | Ca dammo |
| | Li Confiette, |
| | A chi co li despiette |
| | Lo tuosseco nce dà. |
| |
| | SCENA XIV |
| |
| | MARRONE, e MIMMO. |
| |
| | MARRONE |
| | Isso se piglia collera, e no nsape |
| 1040 | Ca sse doje cauze nfose |
| | Pe te fa no vestito a n’alloccuto, |
| | Una taglia de ncanto, e ll’autra cose. |
| | MIMMO |
| | E di’ ca n’è lo vero. |
| | MARRONE |
| | Ma vuje stisse |
| | Ve facite lo mmale. |
| | MIMMO |
| 1045 | E commo? |
| | MARRONE |
| | Ca le jate semp’appriesso: |
| | Le portate a le stelle: |
| | E comm’a fasanielle |
| | Ve facite spennà. |
| | MIMMO |
| | Fanne de manco |
| | Quanno lo panno te garbizza. |
| | MARRONE |
| | Addonca, |
| 1050 | Già che co gusto ve nce soggettate, |
| | Dichiarateve locche, e sopportate. |
| |
| | Sa che cos’è na Femmena? |
| | Justo no pesaturo, |
| | Nché te nce miette sotta, |
| 1055 | Tienelo pe securo |
| | Ca t’ha da spestellà. |
| | Quanno le daje grannezza |
| | Se ngrifa la Marmotta, |
| | E tanno cchiù la Rezza |
| 1060 | Figlio te fa magnà. |
| |
| | SCENA XV |
| |
| | MIMMO, e PERZECHELLA. |
| |
| | MIMMO |
| | Isso non dice male; ma sta Cana; |
| | Sta perra, sta teranna |
| | PERZECHELLA |
| | (Uh! Maramene! |
| | Ancora chisto cca?) |
| | MIMMO |
| | Non t’annasconnere |
| | Bella fegliola, e stirate lo vraccio, |
| 1065 | Ch’aje fatta na gran prova. |
| | PERZECHELLA |
| | Non se fa la frettata senza ll’ova. |
| | Chi vole pazzejare |
| | Co nnuje Foretanelle, |
| | S’ha da zucà ssi belle carezzielle. |
| | MIMMO |
| 1070 | Ma commo s’ha da fa pe ve fa molle? |
| | PERZECHELLA |
| | Siente a mme: A lo pignato quanto volle |
| | Non s’accosta la gatta. Si vedite |
| | Ca simmo toste; cca, che nce facite? |
| | MIMMO |
| | Aje raggione. Addo’ vaje? |
| | PERZECHELLA |
| | Vogl’ì a la festa. |
| | MIMMO |
| 1075 | E Lena. |
| | PERZECHELLA |
| | Creo ch’è ghiuta. |
| | MIMMO |
| | E statte, ca mo vaje. |
| | PERZECHELLA |
| | Che te fa male? |
| | MIMMO |
| | Niente; Vorria sapere pecché tanto |
| | Nc’avite nn’odio. All’utemo, |
| | Potta de mene, simmo galantuommene. |
| | PERZECHELLA |
| 1080 | Justo pe chesto nce parite Iotane. |
| | MIMMO |
| | Già, pecché ve pejaceno ssi Zammare. |
| | PERZECHELLA |
| | A lo commanno nuosto. |
| | MIMMO |
| | Nuje ve potimmo fa mutare stato. |
| | PERZECHELLA |
| | Obbrecato, obbrecato |
| 1085 | De la Carrozza. Nuje ce contentammo |
| | De sta dint’a sta Sepa. |
| | MIMMO |
| | E pecché mo’? |
| | PERZECHELLA |
| | Pecchene, |
| | Nnc’è defferenzia assai da Crapa, a Crepa. |
| |
| | Povera Vellanella |
| 1090 | Essere me contento: |
| | So’ nata poverella, |
| | E accossì boglio sta. |
| | E po so’ nzemprecella, |
| | Che manco saccio ancora |
| 1095 | Si Ammore è Cucco, o Viento; |
| | De me che nn’aje da fa? |
| |
| | SCENA XVI |
| |
| | MIMMO |
| | Vi’ addo’ simmo mmattute: |
| | Io pe mme songo miezo desperato. |
| | Ca sta cana de Lena m’ha ncappato. |
| 1100 | M’aburla, mme coffea: Mme sento fragnere, |
| | E mme ne vene pe la rraggia a chiagnere. |
| | Sì ca chiagnere voglio; ma lo chianto, |
| | Vorria che me stutasse |
| | La sciamma ch’aggio mpietto; O m’affocasse. |
| |
| 1105 | Si dinto a chisto core |
| | Tengo na Zorfatara; |
| | Comme da st’uocchie Ammore |
| | Mo’ mm’esce sta sciummara? |
| | Io no nte ntenno. |
| 1110 | Ma tu de me te ride, |
| | Ca si’ cecato, e bide |
| | Ca io pe sequità |
| | Chi morte mme vo’ dà |
| | Mme vao perdenno. |
| |
| | SCENA URDEMA |
| |
| | PERZECHELLA, LENA, ed autre Villane abballano la ntrezzata; Po GRANNIZEJA da la fenesta. |
| |
| | LENA |
| 1115 | Crideme sore mia ca so’ stracquata. |
| | PERZECHELLA |
| | Ma è stata troppo priesto la tornata. |
| | LENA |
| | Sì ca volea sentì strellare Mamma. |
| | PERZECHELLA |
| | Uh! Zitto, eccola lloco. |
| | GRANNIZEJA |
| | Oh! bentornate. |
| | LENA |
| | Simmo venute priesto, no strellare. |
| | PERZECHELLA |
| 1120 | Siente Grannizeja; chiste |
| | Te mmitano a ballare. |
| | GRANNIZEJA |
| | So’ becchia figlia mia. |
| | LENA |
| | Che so’, quatto girate. |
| | GRANNIZEJA |
| | Ve voglio dare gusto. Via sonate. (Cca se sona, e po s’abballa.) |
| | LENA - PERZICHELLA |
| |
| 1125 | Ncopp’a lo Vommaro, |
| | Songo le femmene |
| | De bona grazia, |
| | Cca tutte veneno |
| | Chi vo’ scialà. |
| 1130 | Chi no mmo’ lotane, |
| | E addecrearese |
| | Se vo’ lo spireto, |
| | A sta bell’aria |
| | Se veng’a sta. (Traseno tutte ballanno, e cantanno.) |
| |
| |
| |
| |
