La mbroglia scoperta

La mbroglia scoperta, Napoli, A spese de Nicola de Beaso, 1732

a cura di Giovanni Recupido

paratesto ATTO PRIMO ATTO SECONDO ATTO TERZO Apparato

ATTO PRIMMO

SCENA PRIMMA

CECCIA da ommo co li vestite de MENIELLO frate sujo, e LISA, ch’esceno da la casa.

CECCIA

Nne venca lo zeffunno,

Lo deantene, e peo; lassame Lisa,

Ca vogl’ì ddo’ me porta la sciaura.

LISA

Ma Ceccia mia, si’ pazza; chi te vede

Co sti vestite ncuollo, che ppò dire?

Vuoje fa parlà la ggente?

Non nce pienze a l’annore?

Chesta non te la do proprio pe benta.

CECCIA

E tu vuo’, che cchiù senta

Sto dolore, e st’affanno?

LISA

Tiemente, che malanno!

Dimme, co chesto, che pretienne fare?

CECCIA

De trovà Micco.

LISA

E po?

CECCIA

A chillo sgrato,

Io le voglio a a quatt’uuocchie renfacciare;

Ca senza causa, me fa penejare.

LISA

E a chillo, che nce vide?

Io te lo ddico, ca te voglio bene,

E mocca a sta portella,

T’aggio cresciuta, ch’jere peccerella;

Perzò te do st’aviso,

Che sto facce de mpiso,

Lo lasse a la bonora,

Ca no nne passa craje, che se nzora.

CECCIA

Non saccio,che mme dice?

Isso mm’ave d’attenne la parola,

Che tanta, e tanta volte mm’ave data.

LISA

Te nn’hà data parola? e buo’ sta fresca.

Ah figlia, tu non saje,

Ch’a sta parola non ce vene maje;

Siente chesto, che ddico,

Nce perdarraje lo tiempo, e lo designo.

CECCIA

Non saccio chi te mette a chisto mpigno.

Lassame Lisa.

LISA

No.

CECCIA

Che ccosa vuoje da me?

LISA

Si’ pazza mara te,

Scumpela no cchiù mo’.

CECCIA

Oh Dio ca non se pò,

So’ desperata.

LISA

Si’ speretata.

CECCIA

Ammore mme fracella.

LISA

Aje perzo le ccervella.

CECCIA

Me tira a fa morire.

LISA

E tu mme faje mpazzire.

CECCIA

No cchiù, lassame ì.

LISA

E n’auta vota vi’?

CECCIA - LISA

Mo’ si’ ncocciata.

SCENA II

CIANNELLA mmocca a la porta soja, s’addona de Ceccia, che se nne va pe strata, e credennola Meniello la chiamma.

CIANNELLA

Menie’ Menie’ Meniello mio, non siente?

Vi’ comme se nne vace de campiglia!

E puro mme vo’ dare sta schiattiglia.

Oh Dio porzì no surdo,

Sentuto mm’avarria;

Che d’è? fosse schierchiato?

O pure fosse stato mmottonato?

Me roseco la mappa,

Sapesse come fare,

Pe le potè parlare.

SCENA III

SASINA pe strata e la stessa.

SASINA

Sia Cianna te so’ schiavo.

CIANNELLA

Addio Sasina,

Comm’accossì matino?

SASINA

Ora de nnammorato.

CIANNELLA

Nigro te sfortunato;

Oh bella facce te de nnammorato!

SASINA

Sapisse, che mme manca?

CIANNELLA

Si tanto scontrafatto

SASINA

Pacienzeja, ma vuje nce stravesate.

CIANNELLA

Comm’a dicere?

SASINA

Vasta,

Nché nc’avite ncappate,

E puostoce lo fierro, comm’a schiave,

Nce la sapite dà la matenata.

CIANNELLA

Tu puro co li ciasche?

Fortuna, e quanno scumpe,

De dareme martiello?

Forniscela na vota,

Co mmico tu vuoje sta sempe a rrevota?

SASINA

Quaccosa mo’ te va pe lo cerviello,

Poverella?

CIANNELLA

Benaggia chi ve crede;

Co ciento fenezzelle,

E mille chiacchiarelle,

Nce facite vedè perne a li spite;

Po quanno nce vedite,

Ca simmo a la tagliola,

E scappà non potimmo,

Subbeto ve sbotate,

E mmano a la fortuna, nce lassate.

Chi se fida a nnammorate,

E se crede

Trovà fede;

Lo designo ll’hà sgarrato;

Ca fermezza maje non hà.

La scuressa è na varchetta,

Che se dà mmano a lo viento,

Che non ave maje abbiento,

E la jetta

Addo’ non sa.

SCENA IV

SASINA sulo.

SASINA

Oh bene mio, che gusto,

Che mme nc’aggio pegliato;

Aveva accommenzato no taluorno;

E po chiano, chianillo,

Veneva a lo bosillo;

100

Io, nch’aggio visto ascì lo male juorno,

Aggio dato no taglio a lo locigno,

Co ffarele vedere,

Ca resce a magrejata lo designo.

Uh scasato,

105

Negrecato,

Chi co ffemmene se ntrica;

Sempe fanno comm’a pica,

E te vonno nzallanì.

Si tu cade int’a lo ffuoco,

110

Nne può scì, te può sanare;

Ma co cheste aje da schiattare;

Non se scompe pe no poco,

E te siente addebbolì.

SCENA V

MENIELLO, e MARCONE pe strata, e lo stisso de banna.

MARCONE

Vi’ ca va l’appontato.

MENIELLO

Sta concruso;

115

Si tu mme daje Ciannella,

Sorema pigliatella.

MARCONE

Parè, si te paresse,

Dalle na voce, la vorria vedere,

Ca me sento lo core

120

Zompare de prejezza.

SASINA

(Aspe’ ca mo’ le metto la capezza.)

MENIELLO

Te servarria, ma non ce sta.

MARCONE

Ddo’ è ghiuta?

MENIELLO

Ddo Tenza la commare.

MARCONE

E che nc’è ghiuta a fare?

MENIELLO

125

A farle compagnia pe tutt’oje,

Ca lo marito è fora.

MARCONE

Nce volea st’auto mpiedeco, bonora.

SASINA

Oh manco male; zi Marcone curre,

Curre a la guardeiola

MARCONE

Che d’è stato?

SASINA

130

Nc’è mmattuto n’aggrisso, e no greciello,

E tanta ggente fanno no rotiello.

MARCONE

E perché ne?

SASINA

Aggio ntiso,

Ca Fonzo, e Micco fanno a costejune.

MARCONE

E non se sonco accise, che mme mporta?

SASINA

135

Oh ca mme pare d’avè ntiso dire,

Ch’è nato lo remmore pe Ciannella,

Che festeggia co Micco.

MENIELLO

Oimmè, so’ muorto.

MARCONE

Co Micco? e Fonzo puro,

Mme fa lo galemeo? vi’ quanta zanne.

140

Menie’ mo’ nce vedimmo.

SASINA

Eh zi Marcone

De chesto ch’aggio ditto

No mme ne fare autore

MARCONE

E che so’ pazzo.

SASINA

(Vi’ comm’è pastore.) (se nne va.)

MARCONE

Da do’ è benuto chisto cuorvo nigro

145

A ntossecarme ncuorpo l’allegrezza!

Menie’, tu si’ ncronnato! che cos’aje?

Ch’è piso mio d’agghiustà sti guaje.

MENIELLO

Va vide, ch’è socciesso, e torna priesto.

MARCONE

Mo’ nce vedimmo.

MENIELLO

Penza,

150

Ca so’ fatto na statola de marmo,

Nzi’ che non tuorne, io non piglio sciato.

MARCONE

Oh ca cchiù ppeo de te so’ addefreddato.

So’ cemm’a n’assetato,

Ch’abbruscia, e bo’ sciacquare,

155

Nche ll’acqua vo’ terare,

Se fa scappà lo cato,

E friddo resta.

Aimmè ca vollo, e squaglio

De fa na veppetella,

160

Nè trovo la lancella,

Io tutto mme tenaglio;

È sciorte chesta?

SCENA VI

MENIELLO sulo.

MENIELLO

So’ restato de jelo,

Comme? che mm’è socciesso?

165

Cianna facea pe mme la spantecata,

Mo’ sento ca de Micco è nnammorata.

Lo ccredo? o no lo ccredo? a mme sto tratto?

Voglio vedere comme va lo fatto. (e ba a tozzolare la porta de Ciannella.)

SCENA VII

CIANNELLA da lo barcone sujo, e lo stisso.

CIANNELLA

Chi tozzola?

MENIELLO

Sonch’io.

CIANNELLA

Bemmenuto;

170

Che v’accorre?

MENIELLO

Scennite; na parola

CIANNELLA

Non nc’avimmo facenne.

Co bosta segnoria, jatevenne.

MENIELLO

Ha raggione ossoria,

So’ mercante falluto, ed a lo nzicco;

175

E le facenne meie mo’ le fa Micco.

CIANNELLA

Chi Micco tu che dice? staje mpazzuto?

Forfante co sta rasa te nne viene?

Te vuoje trovà da coppa; ll’aje sgarrata,

Ca sto bona nformata.

MENIELLO

De che ccosa?

CIANNELLA

180

Va bello figlio mio, non pozzo fare,

La Cajazza pe ttene a la fenesta.

MENIELLO

E tu scinne cca bbascio,

Ca parlammo cchiù meglio.

CIANNELLA

Scinne cca bbascio? a n’autra lo ppuò dire?

MENIELLO

185

A quale?

CIANNELLA

Zuca cca nennillo mio.

Non saje a quale ne! fauzo forfante,

Pe chesto stammatina,

Quanno t’aggio chiammato,

Tu mm’aje fatto l’arecchia de mercante.

MENIELLO

190

Tu mm’aje chiammato! addove? comme? quanno?

CIANNELLA

No mme nfettare cchiù, squaglia a malanno. (Se ne trase nfurejata.)

SCENA VIII

MENIELLO sulo.

MENIELLO

Sonch’io? o non sonch’io? Menie’ ch’è stato?

Chessa, che t’ha parlato,

Non è Ciannella? si; tu che ll’aje fatto,

195

Che te tratta accossì? niente: e pecchene,

Manco te vo’ sentire? ah mmaro mene,

Ch’aggio troppo creduto

A na fraschetta, e sonco mo’ traduto.

Ah Micco mme ll’aje fatta...

200

Ma la carrera n’è scomputa ancora;

Sto palio non è binto, sta a bedere,

C’a lo mmeglio, te voglio fa cadere.

Va nfammo tradetore,

Ca venco a la pedata,

205

E co na sgammettata,

Te faccio derropà.

Va birbo, ca sto core,

Te voglio sdellanzare,

Te voglio fa nnozzare,

210

Sto muodo de trattà.

SCENA IX

CIANNELLA ch’esce da la porta soja.

CIANNELLA

Addove si’? sentimmo, c’aje da dire

Uh chisto non ce stace, se nn’è ghiuto?

Buommiaggio, che baga, che mme mporta...

Che te mporta? Ciannella chesto dice?

215

Non te mporta, e cca scinne? e pecché fine

Ah mara me, ch’ammore

A quanto non mmogl’io, sforza sto core.

Comme a schiava ncatenata,

Strascenata

220

So’ a la morte,

Faccio forza per scappare,

E non trovo libertà.

Troppo forte

È la catena,

225

Che mme stregne chisto core;

Ed ammore

Pe cchiù pena,

Rennovare, me la fa. (se ne saglie.)

SCENA X

CARMOSINA pe strata co na carrafella d’acqua pe la faccia, e po LISA da lo barcone.

CARMOSINA

Gnorsì nce lo decimmo, (comme parlasse dinto.)

230

Mo’ che saglio, ogne ccosa le contammo;

Che ccosa mpacciarella e sta sia Tenza,

Non avarrà, che ffare, e non nce penza,

Ca chi se mpaccia resta po mpacciata,

E pe ghionta se vede coffejata. (tozzola la porta soja.)

235

Che d’è? zia non nce sente... manco... buono,

Pigliammo chesta preta, e tozzolammo. (posa la carrafa.)

Mannaggia, ca me sonco stroppeata.

LISA

No poco no mmastava, t’aggio ntesa.

CARMOSINA

E pecché non si’ scesa?

LISA

240

Ca steva arrecentanno lo ffelato.

CARMOSINA

Ed io me sonco accisa a tozzolare.

LISA

Via su, ca non è niente

CARMOSINA

Lo ssapeva,

Ch’a diente, e mmole avea da scì la cosa.

LISA

Vi’ comm’è presentosa, screanzata.

CARMOSINA

245

Ah, a, vi’ si può fa quacche chiazzata.

LISA

La carrafa addov’è? l’avisse rotta?

CARMOSINA

Ll’aggio posta cca ssotta.

LISA

Pigliala ca mo’ scenno.

CARMOSINA

Ente fremma, che puorte, ed io me mpenno:

250

Nzanetate è cchiu longa, arrasso sia, (e piglia la carrafa.)

Ch’anno de carestia,

E po quanno le vene,

La carpetena all’ogna de li piede,

Non se sa chi la piglia,

255

Me fa afferrà lo friddo co la freve;

Nche bole no servizio,

Non mme da tiempo manco de sciatare,

È becchia, e non la vedo cchiù schiattare.

LISA

Addo’ si’, dalla cca, mo’ non te sbrighe?

CARMOSINA

260

So’ llesta, che mm aje sciso?

Ca t’aggio fatto buono lo servizio.

LISA

Non aggio, che te dare, n’auta vota,

T’abbusco quaccosella.

CARMOSINA

N’aje niente? e tu non aje la carrafella.

LISA

265

Viene cca; male ncanna, che te schiatta,

No mme fa perde tiempo, e chella strilla,

Co dolore de mole, che mme nfetta;

E sta aspettanno st’acqua.

Comm’all’acqua de Majo, che l’addecrea.

CARMOSINA

270

St’acqua ne?

LISA

St’acqua fine.

CARMOSINA

È pe le mmole?

LISA

Pe le mmole; che d’è? Tu pecché ride?

CARMOSINA

E non vuo’ di’, ca chella

Se vo’ allisciare, e farse jancolella.

LISA

Tu che malanne dice, staje mbreaca.

CARMOSINA

275

E ba ca sto mbreaca, piglia, piglia,

Veramente hà ragione de lo ffare,

Ca sta mpunto, e se vole mmaretare.

LISA

E non te vuo’ sta zitto schefenzosa?

CARMOSINA

Che non fosse lo vero?

LISA

E manco mone?

280

Sbricate saglie ncoppa.

CARMOSINA

Aggio scomputo;

Mamma decea, sempe nce vo’ n’ajuto.

Na casa jancheata,

T’allegra cchiù lo core,

Te nce face mette ammore,

285

E si ave qua’ defietto,

Se pote sopportà

Na femmena conciata,

Fa n’auta comparenza,

Sia pesta, sia scajenza,

290

Si non te move affetto,

Se face padejà. (e trase a la casa soja.)

SCENA XI

LISA sola.

LISA

Janca me, che demmonia è sta fegliola,

E ba non dire po, ca nuje nascimmo,

Co le chiocche sottile, e farfariello,

295

Nc’abbotta propio co lo schizzariello.

Le figliole, che nasceno mone,

Fanno comme l’ardica, e la spina,

Che te pogne, nche ncigna e spontà.

Mo’ na scigna te piglia nzermone,

300

Quant’aje ncuorpo de botta annevina

Uh, che pozzano tutte schiattà.

SCENA XII

MARCONE pe strata, e po CARMOSINA mmocca a la porta soja.

MARCONE

Po diceno le gente,

Ca Marcone è manisco, e mpertenento

Porzì Sasina a dareme la burla,

305

Co fareme j de pressa a la gabbella,

Ca nce steva remmore pe Ciannella:

Di’, che mme venca nnante, ca le donco

Lo veveraggio de sta bella nova;

Decimmelo a Meniello.

310

Ca n’è stato lo vero,

Azzò lo scuro, non stia cchiù mpenziero. (tozzola la casa de Meniello.)

CARMOSINA

Chi hà tozzolato?

MARCONE

So’ stat’io nennella.

(Lo ssaje, ca sta fegliola è fatta bella.)

CARMOSINA

E che bolite?

MARCONE

Nnc’è Meniello ncoppa?

CARMOSINA

315

Non nce stace, ch’è sciuto.

MARCONE

Sapisse addov’è ghiuto?

CARMOSINA

Gnorennone.

MARCONE

(E parla accreanzata,

Si non me piglio Ceccia, chesta voglio.)

CARMOSINA

Si Marco’, vuo’ nient’auto?

MARCONE

Puorte pressa.

CARMOSINA

320

Aggio da trapanare seje matasse.

MARCONE

Seje matasse! mannaggia,

Tu si’ fatta massara, chisto è signo,

Ca quanto prima vuoje lo maretiello.

CARMOSINA

Io non saccio, che dice, vavattenne,

325

Ca mm’aje fatto fa rossa.

MARCONE

E pecché ccosa?

CARMOSINA

Ca so’ fegliola ancora, e so’ scornosa.

MARCONE

Ah vegliacca, vegliacca, accossì dice,

Ma te faje la resella.

CARMOSINA

E co ragione.

MARCONE

E pecché?

CARMOSINA

La resella vo’ vavone.

330

Orsù lassame j, c’aggio da fare.

MARCONE

E statte n’auto ppoco, musso mio.

CARMOSINA

Che musso? staje mpazzuto, nn’aje creanza?

Si’ biecchio, e scannarizze le fegliole.

MARCONE

E che scannaro è chisto, ch’aggio ditto,

335

Facce de carosiello nnargentato?

Si te deceva, Carmosina mia,

Nn’era mala parola, e decea tutto;

Co dire musso mio, dico tantillo,

E tu te faje saglì lo speretillo.

CARMOSINA

340

Va, va, Marcone mio, ca le fegliole,

No mmenceno li viecchie de parole.

MARCONE

E binceme de fatte.

CARMOSINA

Co qua’ fatte?

MARCONE

Damme no pezzechillo,

No schiaffetiello co ssa bella mano.

345

Damme no puniello; ma fa chiano.

CARMOSINA

Staje bravo allegrolillo stammatina,

Tu quarcuno aje gabbato.

MARCONE

No, addavero

Ma de farme gabbà tenco mpensiero.

CARMOSINA

Si’ no bello sorecillo

350

Da ncappare a la tagliola.

MARCONE

Sine, sine, e tu fegliola,

Aje da esse lo mastrillo,

Addov’aggio da ncappà.

CARMOSINA

Nene nè?

MARCONE

Pe si affé.

CARMOSINA

Bella cosa.

A DUE

Ah, a, a. (ridono.)

CARMOSINA

355

Non si caccia pe mastrillo,

Ch’aje mmecchiata già la pella.

MARCONE

Si tu aspiette no tantillo,

Vedarraje na caccia bella,

Me nce venco a derropà.

CARMOSINA

360

Dice a mme?

MARCONE

Dico a tte.

CARMOSINA

Quarche gatta puoje trovà.

MARCONE

Va nnevina, chi lo ssa. (e traseno a lle ccase lloro.)

SCENA XIII

CECCIA co li stisse vestite de Meniello frate sujo, e MICCO pe strata.

CECCIA

Sì, cacciame desprezzame,

Famme chello, che buoje,

365

Ca sempe te sarraggio cchiù fedele;

Ma tu cano crudele,

Senza sapè pecché, me lasse, e fuje?

MICCO

No cchiù me tormentare, o mo’ m’accido;

Ca quanto crisce tu la passeione,

370

Tanto cchiù me despiace.

Né saccio, che te fare.

CECCIA

Muta pensiero, ca mme può quietare.

MICCO

Fornisce, ca mm’accora lo dolore.

CECCIA

Ah cano! e te comporta chisso core,

375

De vedè spasemare na fegliola,

Che tu la può ajutare, e non l’ajute?

MICCO

Oh si potesse fa chello, che boglio,

Non chiagnarrisse none,

Et io non penarria;

380

Ma da che benne Cianna a chesta casa,

Che mmale me nne sape,

Mm’ha levate li sienze, e lo cerviello,

Né manco ll’hà fenuta.

CECCIA

Penzace buono Micco, vi’ che faje,

385

Ca Cianna non se sape de chi è figlia,

E po, chi t’assecura... uh che deceva...

Te vasta, che sia stata

Cresciuta a ciento banne;

Mo’ a la casa de chisto, e mo’ de chella,

390

Non te la fa sferrà, va pigliatella.

MICCO

Lo ssaccio, e tu può di’ chello, che buoje;

Ca non faje niente none; è lo destino,

Che mme vole perduto appriesso a chella,

E pe chesto le fforze mm’ha levato;

395

Non si’ sola a strellà; ca puro io pato.

Si potesse a boglia mia,

Chisto core manejare,

Tu sta lonca percopia,

Non farrisse cride a mme.

400

Datte pace, no stentare,

Ca non pozzo; si sto cchino

De malanne, e de venino;

Niente cchiù nce pò capè.

SCENA XIV

CECCIA sola.

CECCIA

Ah! Micco, e comme, Oddio,

405

Mentre chiagno pe tte, tu no me siente?

E dinto a li lamiente,

Mme lasse abbannonata?

È chesta la parola, che mm’aje data?

Ma famme nzò che puoje,

410

Pe bederme schiattare,

Lassame, fuje, curre appriesso a n’auta,

Sempre t’aggio d’ammare,

E mone cchiù, che maje

Speruta appriesso a tte me vedarraje.

415

Si n’auciello lo ppò fare,

De non ghì a lo nido sujo;

St’arma mia, se pò scordare,

No mmenire appriesso a tte?

Loco sta lo nido mio,

420

E mme strujo

Pe golio

De venirmece a pofare;

Tu me cacce; Oddio pecché?

SCENA XV

LISA, e CARMOSINA mmocca a la porta de la casa lloro, e po MENIELLO pe strata.

LISA

Sapesse comme fare,

425

Ca si’ na creatura assai nsestosa.

CARMOSINA

Si’ ttu proffedeosa,

Che no mme vuo’ portare.

LISA

Addove?

CARMOSINA

A la sia Zeza

LISA

Chi Zeza hà fatt’a ttene?

430

Chesta boscia, chi te ll’ha posta nchiocca?

CARMOSINA

Si ttu, che mme mpapuocchie.

LISA

Io non ce vavo mo’; po te nce porto.

CARMOSINA

No mme la schiaffe chesta nnatta all’uocchie.

LISA

Oh manco male te, vene Meniello.

CARMOSINA

435

De chisso, che mme mporta. (le dà na vottata Lisa la secuta.)

LISA

Aspe’ te voglio fa na mazzeata.

CARMOSINA

Famme na secotata; curre, curre.

LISA

Vi’ quanta me nne face sta moccosa. (a Meniello.)

MENIELLO

Forniscela, ca si’ proprio ncocciosa

CARMOSINA

440

E ttu che buoje da me, chi te nce chiamma. (a Meniello.)

MENIELLO

Statt’affitta no poco,

Ch’avimmo da parlare. (parla zitto co Lisa de banna.)

CARMOSINA

Parlate, chi ve tene?

(No le voglio fa dire na parola.)

445

Ah, a, mo’ te n’abbia,

Sciù, sciù, chesta è boscia...

MENIELLO

Se pò sapè che d’ave sta pecciotta? (a Lisa.)

LISA

Le prodeno le spalle.

CARMOSINA

Le spalle ne ne? uh bella cosa.

LISA

450

Va che puozze squagliare schefenzosa.

MENIELLO

Lassala ì a bonora, stamm’a nuje. (a Lisa.)

CARMOSINA

(Eh sì ca mo’ fenite lo descurzo) (parlano zitto.)

Gnorsine accossì bace attaccatence...

Chesto mo’ n’è lo vero...

455

Non ghiorà, ca te credo...

MENIELLO

E scumpela a malanno, o mo’ ne votto...

CARMOSINA

Quanno lo scumpe tu sso giorgioleo?

LISA

Lassala j ca chesta fa cchiù ppeo.

Siente cca bella mia,

460

Vavattenne a la casa,

E spanne lo ffelato, ca mo’ venco,

E te porto le ccose?

CARMOSINA

E che me puorte? (Lisa le parla a l’orecchia.)

E che nn’aggio da fa de sta schefienza

Io voglio le scioscelle.

LISA

Te le pporto.

CARMOSINA

465

Tu me gabbe.

LISA

Le pporto pe ssi assene;

Va mo’ bellezza mia.

CARMOSINA

Comme si’ fina;

Mo so’ bellezza, e fata,

Ca vuoje lo fatto tujo,

Quanno no, sonco locca, e so’ sciaurata. (se ne va a la casa soja.)

MENIELLO

470

Ca se nn’è ghiuta, siente, si Ciannella

Facesse la ntosciata.

LISA

È piso mio

De l’accordare...

MENIELLO

E si no mmo’ parlare

Dalle viento a la vela.

LISA

T’aggio ntiso,

L’alliscio, l’accarezzo, tanto dico,

475

Che le faccio contà, quant’ave ncuorpo.

MENIELLO

Eh, siente si dicesse...

LISA

No cchiù, ca so’ nformata. (trase a la casa de Ciannella.)

MENIELLO

St’attiento ca non faje quacche frettata.

So’ na varca mmiezo all’onna,

480

Che lo viento la zeffonna,

E la tira a mmertecà.

Mo’ la votta da na banna,

Mo’ da n’auta te la manna,

Né la lassa arrequià.

SCENA XVI

MICCO, SASINA pe strata, e po CARMOSINA da la loggia, che spanne lo ffelato.

SASINA

485

Lloco stace lo punto.

MICCO

Tu farraje comm’a chillo de lo cunto,

Che boleva diec’anne pe mparare,

N’aseno de parlare,

Pecché nfra chillo tiempo,

490

O ll’aseno moreva, o ll’asenaro.

SASINA

Chesto ll’aje ntiso di’ da qua’ scolaro:

Ora dimme na cosa,

Pe chello, ch’aggio ntiso;

Cianna no fu lassata fegliolella

495

Da no Spagnuolo, ch’era Capetaneo?

MICCO

È lo vero gnorsine.

SASINA

Da che tiempo? si saje.

MICCO

Pe chello, che se dice

Mo’ sarranno tre anne.

SASINA

500

Si vene lo Spagnuolo,

Lo canosce sto viecchio?

MICCO

Comme lo vo’ conoscere;

Si no ll’ha bisto maje?

E chillo la lassaje a Ciccotonne;

505

Lo frate de sso viecchio,

Che steva a Ponteciello. (parlano zitto nfra de lloro.)

CARMOSINA

Tiemente che bregogna è sto ffelato!

Comme sta mpeccecato.

SASINA

E chesto va cchiù mmeglio a lo designo.

CARMOSINA

510

Non saccio addove mettere le mmano,

Mara me, che roina!

MICCO

Siente buono.

SASINA

Te sento.

CARMOSINA

Ma che nne voglio fa de chiste chiajete;

Ella nc’hà da penzare, quanno vene,

515

Se ll’ha da speccecà si nne le tene. (trase.)

SASINA

Chi vo’ sentì la chianca,

Che farranno lo viecchio, co la vecchia.

MICCO

Pecchene?

SASINA

E no llo ssaje

Co fegnerme Spagnuolo,

520

Me faccio dà da isso la fegliola.

MICCO

E saje parlà Spagnuolo?

SASINA

Qua’ pparola;

Tu saje ca songo juto

Sett’anne pe sso mare,

Spierto, e demierto pe li guaje mieje,

525

E ssaccio nfrocecà cchiù de la lengua.

MICCO

Stamm’a bedè, che nn’esce.

SASINA

Co ffa sto trajeniello

Carosammo la vecchia,

Che tira pe Meniello,

530

E lo viecchio porzine,

S’hà da vattere ncapo co na vreccia;

Ca non pò avè cchiù Ceccia.

MICCO

Tu ll’aje penzata bona,

Curre datte da fare.

SASINA

Mo’ mmo’ vao;

535

Quant’arremedio n’auta mbroglietella,

Tu aspettame cchiù attardo addo Martella.

MICCO

Fa priesto, st’attiento,

E penza ca stento,

Ca si’ la speranza,

540

De farme gaudè.

Chi sa la tardanza,

Non scopre ssa mbroglia;

Lo Cielo no mmoglia,

Ca moro si affé.

SCENA URDEMA

SASINA, e po LISA da la casa de Marcone, CARMOSINA, CECCIA e CIANNELLA mmocca a le pporte lloro.

SASINA

545

Mente parlava a Micco, aggio allummato,

Ca Carmosina è asciuta,

Et hà spaso a la loggia sto ffelato.

Uh quanto pagarria, p’avè na mazza,

Vorria fa no corrivo a la sia Lisa,

550

Co scervecchiarne mo’ quatto matasse;

Bonora non c’è niente;

Ma si non faccio arrore,

Passa no peccerillo attiempo, attiempo,

Che bene da pescare,

555

Mo’ lo voglio chiammare:

Oje guaglione; guaglione viene ccane,

Ca te faccio abboscà no tornesiello,

Aza li piede curre,

Che bella accaseone, e ba a ciammiello. (Cca esce no peccerillo co na canna, e no panaro.)

560

Damme ssa canna da’... mo’ te la piglie.

Malanno no nc’arriva,

Posa cca lo panaro,

No mmide sto ffelato;

Io mo’ te piglio mbraccia, singhe lesto

565

Facimmo no corrivo a chesta vecchia. (fa signo ca vo’ lo tornese.)

Mo’ te lo donco, sì, sbricate priesto.

LISA

Ah canaglie, assassine,

Chest’a la casa mia?

Meniello, Carmosina, gente, ajuto.

SASINA

570

Scajenza che t’afferra, che cos’aje?

LISA

Comme, che d’aggio, mpiso frabuttone?

SASINA

No strellare a malanno.

LISA

Guitto, guitto,

Si’ benuto a rrobbareme,

E buo’ che mme stia zitto?

575

Te voglio stravesare.

SASINA

E no la scompe cchiù vascia le mmano.

CARMOSINA

Che ghioja è chesta?

LISA

Curre Carmosina.

CARMOSINA

Chiamma gente scrofone.

LISA

Chest’a mme lazzarone?

CARMOSINA

580

Zia mia, che d’è stato.

LISA

No mme scappe.

SASINA

Te piglia.

LISA

Marejuolo assassino.

SASINA

Matreco, fattocchiara.

CARMOSINA

Mara me, ca s’accidono.

585

Vecine ajuto, ajuto.

CARMOSINA - CECCIA

Che rremore nc’è lloco?

CARMOSINA

Aimmè corrite ccane,

Ca me stravisa, ziema sto cane.

Cano perro forfantone

590

Fuss’accisa janarone.

LISA

Aje ragione chest’a mme.

CIANNELLA - CECCIA - CARMOSINA

Via fornitela che d’è?

SASINA

Tu co mmico aje da fa.

LISA

Io te voglio sdellommà.

SASINA

595

Chesto faccio quanno ncoccio.

LISA

Lassame ire, ca te scoccio.

SASINA

De mmascune, e cauce mpietto.

LISA

De Schiaffune, e para pietto.

A DUE

Me nne voglio sazeà / sgoleà.

CIANNELLA - CECCIA

600

Comm’è bona.

CARMOSINA

Chist’è spasso.

CIANNELLA - CECCIA - CARMOSINA

Vide cca ah, ah, ah. (Carmosina trase co Llisa a la casa de Marcone.)