La mbroglia scoperta

La mbroglia scoperta, Napoli, A spese de Nicola de Beaso, 1732

a cura di Giovanni Recupido

paratesto ATTO PRIMO ATTO SECONDO ATTO TERZO Apparato

ATTO TERZO

SCENA PRIMMA

MENIELLO vestuto femmena, e LISA, ch’esceno da la casa de Marcone.

MENIELLO

E lassame ì a malanno.

LISA

Addo’ vuo’ ire?

MENIELLO

A rroina, a zeffunno.

LISA

Che d’è stato?

MENIELLO

Che bo’ essere stato cchiù de chello,

1310

Che mm’è socciesso!

LISA

Mara me, e che cosa?

MENIELLO

A marame, nne simmo? t’aggio ntesa;

No mme credeva maje che mme portasse

Co sta smorfia a sta casa,

Pe farme zanniare da Ciannella.

LISA

1315

Comme t’ha zanniato?

MENIELLO

Metto lo dito mmocca a sta nennella:

Ve site confarfate? non è niente.

LISA

Tu ch’è chello che dice?

MENIELLO

Le mmarcangegne voste,

1320

Lo ffareme venì co tanto riseco,

E po sta segnorella,

Non dirme doje parole;

Cala la capo nterra, e sta da rasso?

LISA

E chisto è lo sconquasso? no lo bide,

1325

Che chella è zetelluccia, ed è scornosa

Quanno maje s’è trovata a sulo a sulo,

Co chi sapeva ca le vole bene?

MENIELLO

Co chesta rasa viene?

Che so’ Lupomenaro, o so’ quarch’urzo,

1330

Che l’avea da scannà? già ll’aggio ntesa?

Io perdo la parata, essa la spesa,

LISA

Viene cca, viene cca crapecciusiello.

MENIELLO

E no mme sta a zucà lo cellevriello.

Cchiù priesto vedarria

1335

N’arpia

Che me sbrana,

Che cchiù bedè ssa cana,

Che mme fa desperà,

Che m’ha traduto.

1340

Dille ca li tormiente,

Che sente

Chisto core;

Ammore,

Scontarrà,

1345

E ch’essa chiagnarrà,

Nch’aggio io fenuto. (trase a la casa soia.)

SCENA II

LISA, e po CIANNELLA mmocca a la porta soja.

LISA

Ch’auto malanno è chisto. e ba te para,

Ed io sempe me trovo,

A ste rrotola scarze.

CIANNELLA

Lisa, Lisa.

LISA

1350

Che cos’è sia Maddamma?

CIANNELLA

Se nn’è ghiuto Meniello?

LISA

A lo commanno vuosto.

Bella prova, ch’aje fatta; scocchiareja

Auza l’accoppatura a sto pegnato,

1355

E te ll’aje fatto propio mmaretato.

CIANNELLA

Mara me, ch’aggio fatto?

LISA

Che bolive fa cchiù, me sonco strutta,

A fa na mbroglia pe servizio tujo,

Co portarte Meniello int’a le braccia

1360

E ttu pe no le di’ quatto parole,

Nne ll’aje fatto partire mmalorato,

E mpeccecaco mm’aje lo ffelato.

CIANNELLA

Scusame Lisa mia, ca mme so’ bista,

Perduta rent’a isso

1365

Pe scuorno, e pe paura.

LISA

Io non saccio che scuorno, e che paura;

Da che ascite da dinto de la coccola,

Comm’a gatta de Marzo jate sperte

P’abbuscà na retaglia de marito;

1370

Nché l’avite trovata,

Facite le schefose, e nce sputate.

CIANNELLA

No mm’accidere cchiù Lisa mia cara,

Ca sto pe mme iettà dint’a no puzzo;

Si mme vuo’ bene va lo chiamma, e dille...

LISA

1375

Che chiammare, che dire, chiamatillo;

Chi vo’ lo ffuoco; che lo baa cercanno.

E chi sinno non ha, c’aggia malanno.

Sciaurata, sciaurata

Non saje, ca la sciorte,

1380

È comm’a l’auguilla?

L’avive ancappata?

E strignela forte;

T’è sciuta da mano?

Va pigliala mo’.

1385

Co quatto parole,

Na vocca a rresillo,

No ciancio, no chillo;

Perdive le mmole?

Si’ ghiuta a Bajano?

1390

Mo’ chiagne, e mo’ strilla

Cchiù ppeo nce vo’. (trase a la casa soja.)

SCENA III

CIANNELLA sola.

CIANNELLA

Oddio, che mm’è socciesso? o c’aggio fatto

Che mme sonco nnemice tutte quante

Meniello a mme sso tratto?

1395

E tu Lisa m’accrisce cchiù li chiante?

Donca peché so’ stata,

E scornosa, e norata,

Aggio d’avè sti tuorte?

Ajemmè, ca maje l’annore avette sciorte.

1400

Tu me consiglia Ammore,

P’ascì da cheste ppene;

Pregà no mme commene,

Sdegnà non pò sto core;

Che ffaccio sbentorata?

1405

Ajemmè so’ desperata;

La morte addove sta.

Che morte vao cercanno?

Mora chi me tormenta,

E chillo strazio senta,

1410

Che a mme sentire fa:

Sì mora sto teranno,

Ma comme? addove? quanno?

E chi l’accidarrà.

SCENA IV

MARCONE pe strata co no muccaturo chino.

MARCONE

Che ghiornata nfadosa è chesta d’oje,

1415

E quanta frusciamiente tutte nziemo,

Mente steva accattanno ste ccoselle,

Pe ffa no compremiento a Ceccia mia;

M’è benuto pe nnante.

N’auto Spagnuolo Capetanio a guerra;

1420

Che dice ch’è benuto mo’ da fora,

E bo’ Ciannella, che lassaje a fratemo;

Che buo’ jocà, ca chesta

Sarrà la figlia de le sette mamme?

Ll’aggio ditto, che benca mmiero sera,

1425

E nfra tanto pigliammo qua’ conzurda

De che manera; m’aggio da portare,

Pocca so’ duje Spagnuole, che la vonno

Ma zitto zitto, o capo de cocozza!

Sto a cavallo a lo ciuccio, e bao cercanno,

1430

Chi mme ll’ave arrobbato;

Aggio Ciannella ncasa, che pò dire,

Quale de chiste la lassaje a fratemo

E bao trovanno piettene de quinnece?

Mo’ mmo’ parlo co d’essa, e accossì boglio

1435

Trovà lo capo, e speccecà sto mbruoglio. (tozzola a la porta soja.)

SCENA V

CIANNELLA abbascio, e lo stisso.

CIANNELLA

Chi tozzola... vuje site?

MARCONE

Io songo, piglia cca?

CIANNELLA

Che cos’è chesta?

MARCONE

Songo certe ccoselle,

Pe ffare na marenna a la Sia Ceccia.

CIANNELLA

1440

No nzerve, ca mo’ propio se nn’è ghiuta.

MARCONE

E perché.

CIANNELLA

L’è benuto

No dolore de capo.

MARCONE

Oh manna’ craje;

Chest’auto puro, e che scajenza è chesta?

Ogne cosa a la mmerza,

1445

Va trova cchiù designe, auh spesa perza.

CIANNELLA

No strellate pe chesto, ca servire

Ve pote n’auto juorno, le stipammo.

MARCONE

Eh no Ciannella mia, ca tu non saje,

Comm’è lo nnammorato; è peo de chillo,

1450

Che sta appiso a la corda,

Addove ogne momento

Le braccia allonca e cresce lo tormiento...

CIANNELLA

Ma vuje che nce farrissevo,

Volite desperareve pe chesto?

MARCONE

1455

No nne sia chiù pacienza; Eh di’ Ciannella.

CIANNELLA

Che cosa?

MARCONE

Si venesse

Chillo, che te lassaje a Cicco fratemo

Mo’ fa tre anne; tu lo saje canoscere?

CIANNELLA

Cierto ca lo canosco, che so’ locca?

1460

Avea quattuordece anne a chillo tiempo,

Ed otto n’era stata mman’a isso:

Ma perché lo spiate?

MARCONE

So’ benute

Duje Spagnuole da fore, e tutte duje

Te vonno; aggio paura, che nce sia

1465

Quarche mbroglia pe mmiezo; io vao penzanno

Faretille vedere, azzò me diche,

Si quarcuno de chille t’ha cresciuta;

Pocca se vanta ogn’uno,

Ca te lassaje a fratemo.

CIANNELLA

Va buono,

1470

Ma che muodo tenimmo pe bederle?...

MARCONE

Zitto zi’, trase dinto, ca mo’ vene

Uno de chiste, e si addimmanna a mmene,

Tu di’ ca non ce sonco,

E nfra tanto a sto vascio, io me stonco. (traseno a la casa.)

SCENA VI

MICCO, e SASINA da Spagnuolo pe strata.

SASINA

1475

Sto ghiastemmà no nzerve;

Vedimmo d’agghiustà ste gamme rotte

Ca mo’ nc’è ncuollo notte.

MICCO

Io non saccio, che ffa, pocca la scorta,

Ll’ha pegliata a partito

1480

De mannarme de chiatto;

Ed io non pozzo cchiù, già crepo, e schiatto.

SASINA

E si è chesto fenimmola sta joja,

Pigliate Ceccia, che pe tte speresce.

MICCO

Si volesse fa chesto,

1485

Uh da quant’ha, che me sarria nzorato.

SASINA

Tu propio si’ ncocciato, e non se sape,

Che t’ha fatto la scura.

MICCO

M’ave fatta na cura,

Che mme voleva fa? no ng’aggio genio.

SASINA

1490

Ma tu l’amave apprimmo, e mo’ ch’è stato.

MICCO

Da che bidde Ciannella so’ cagnato,

Ma lassammo sti lotane, vedimmo

Chello, che s’ha da fa?

SASINA

Miettete lloco,

Quanto vedo lo viecchio si nce stace,

1495

E a che tuono lo trovo.

MICCO

Vi’ ca sto cca ddereto, e non me movo.

Sti juorne tormentate,

Non pozzo cchiù zoffrì;

Quanno la vuo’ scompì

1500

Sciorte mmardetta.

No cchiù, ch’è canetate

A ffareme crepà;

Starraje pe te quietà?

Vi’ che desdetta.

SCENA VII

SASINA, e po CIANNELLA da lo barcone.

SASINA

1505

Ora mo’ tu paglieja, zuca st’acito,

Ca po vene lo mmusto.

Tozzolammo sta porta, e nc’aggio gusto.

CIANNELLA

Chi è lloco?

SASINA

Adios Segnora.

CIANNELLA

Schiavo d’ossignoria; chi volite?

SASINA

1510

El vieco de la casa.

CIANNELLA

Quale viecchio?

SASINA

Marcone quale vieco?

CIANNELLA

Uscia chi eje?

SASINA

(Da dove viene, porto pastenache,

Comme jammo a conzierto) en ora buena

C’aular es esto? yo chiero ravaniccos;

1515

Ostè me dà sevoglias, yo pergunto,

Se sta ncasa Marcones...

CIANNELLA

Ah, ah, che risa!

Chi volite Marcones?

Ah Si Spagnuolo mio de Calavria;

Diga chi en es ostè; y save que aula

1520

Co chi l’entiende,

SASINA

(E ba ca jammo a chiunzo,

Chesta parola spagnuolo, ed io so’ fritto.)

CIANNELLA

Cavagliero mal andante

Y soldado a guerra muorto,

Mira ostè, que nos soy nigna

1525

Ne soy locca d’engannar;

Aula bien, o non aular.

SASINA

Ostè non ria segnora, porqué aulo

Taliano spagnuolo, azzò me ntienna:

Marcone nce sta ncasa?

CIANNELLA

E buje chi site?

SASINA

1530

(E n’auta vota, vide comm’è tosta!

Abbesogna che dica chi songh’io.)

Yo, yo soy D. Pericco e ’l Capitano.

CIANNELLA

Qua D. Pericco?

SASINA

Vasta dica esto?

CIANNELLA

Ma isso no nce sta.

SASINA

Aonde è ghiuto?

CIANNELLA

1535

Non saccio, covernateve. (frabutto.)

SASINA

Si cchiù parlava, scommogliava tutto.

SCENA VIII

CECCIA e LISA da la casa.

CECCIA

Potea fa cchiù la sciorte?

A fa trovà Ciannella tanto spruceta...

LISA

No mporta, ca ll’ha ntesa la canzona

1540

De gallo, e de capone;

E si non iere tu, che mm’aje pregato,

Mo’ si parlava a frateto; voleva

Farla schiattare ncuorpo pe bint’anne.

CECCIA

No Lisa, ca so’ mieje li malanne,

1545

Vide de l’acquietare n’auta vota,

Ca nzi’, che Cianna non è mmaretata,

Starrà chest’arma sempe tormentata.

LISA

Frateto s’è arreddutto miezo miezo;

Mo’ vogl’ire addo Cianna pe trattare

1550

Chello che s’ha da fare.

CECCIA

Sì vance Lisa mia, pregale, e dille

Porzì da parte mia, che non stia tanto

Contegnosa co fratemo, che penza,

Ca la femmena maje non ha marito,

1555

Si non fa comme fa chillo, che pesca,

Che p’ancappà lo pesce jetta ll’esca.

Dille accossì: c’ammore,

È pesce cannaruto,

La femmena, che pesca

1560

Si all’ammo non mett’esca,

Non ce lo coglie no.

LISA

Troppo è lo vero figlia,

Senza carizze ll’ommo, non se piglia.

CECCIA

Lo dire gioja, e core,

1565

È chiajeto fenuto,

Ntennitela fegliole,

Ll’ommo no mmo’ parole,

Vo’ fatte quanno pò.

SCENA IX

LISA, e po MARCONE da la porta soja.

LISA

Va piglia, e non avere

1570

Vescuotto a buordo, quanno staje pe mare

E bide che biaggio porraje fare.

Si non fosse pe mme ste mmoccoselle,

Starranno fresche affé, jammo addo Cianna,

Oh ca nn’esce lo viecchio, zitto, zitto.

MARCONE

1575

Oh Lisa lloco staje?

LISA

Pe te servire.

MARCONE

Sapisse addo’ è Meniello?

LISA

Stace ncoppa.

MARCONE

Fallo scennere priesto.

LISA

Che nc’è niente?

MARCONE

Uh ca nc’è robba a mucchio, aggio scopierto

Na mbroglia.

LISA

E quale?

MARCONE

Lo Spagnuolo, chillo

1580

Che boleva Ciannella, è no frabutto,

Che cercava gabbarme.

LISA

E chi ll’hà ditto?

MARCONE

Ciannella, che ll’hà bisto.

LISA

Manco male,

Ch’è scomputa sta baja.

MARCONE

Ma nce n’è n’auta;

M’è benuto a trovà n’auto Spagnuolo

1585

Puro co chest’assisa.

LISA

E che ll’aje ditto?

MARCONE

Che torna cca sta sera.

LISA

E pecché fine?

MARCONE

No mme fa perde tiempo, saglie ncoppa,

Di’ a Meniello, che scenna, ca l’aspetto

Dereto a chillo vico.

LISA

Mo’ mmo’ vao, (trase a la casa soja.)

1590

Ma tu non te partire.

MARCONE

Llà l’aspetto,

Ceccia mia, io n’arrecetto.

Uh che caudo, che mme sento!

P’ogne banna jetto fuoco.

Non abbento,

1595

N’aggio luoco,

E non pozzo arrequià.

Ceccia mia, Ceccia bella,

Luna, Sole, Fata, Stella,

Addo’ si’ viene abbraccià,

1600

E sta caccia

Famme fa.

SCENA X

MENIELLO, e LISA da la casa lloro, e CIANNELLA mmocca a la porta soja.

MENIELLO

Ne t’hà ditto nient’auto?

LISA

Chesto sulo.

CIANNELLA

(Oh manco male tutte duje cca bascio,

Voglio sentì, che diceno.)

MENIELLO

1605

Tie’ mente quanta mpiedeche la sciorte

Me mette nnante; Addo’ malanno è sciuto

St’auto Spagnuolo? Vi’ s’è comm’io dico,

Ca non se vene a fine de sto nguadio?

E chi nce corpa a chesto? La Sia Cianna;

1610

Ca si essa non facea la contegnosa

La nguadejava, ed era n’auta cosa.

LISA

Non pe chesto lo munno s’è perduto,

Chello, che non s’è fatto, se pò fare.

MENIELLO

E si st’auto Spagnuolo è proprio chillo.

1615

Che se ll’ave cresciuta,

E no mme la vo’ dare,

Nuje, che pisce pigliammo?

CIANNELLA

Lisa, Lisa.

LISA

Uh teccotella te; viene Meniello.

MENIELLO

Vance tu vi’ che bole.

LISA

E biene mone.

MENIELLO

1620

Che buo’ che sta Segnora faccia peo?

CIANNELLA

No cchiù Meniello no, ca mo’ è sopierchio

Lo strazio, che mme faje, e n’aje raggione.

MENIELLO

Hà raggione Ossoria, che buo’ lo riesto?

CIANNELLA

Viene cca.

MENIELLO

Te so’ schiavo.

LISA

E biene priesto. (L’afferra, e lo porta addo Ciannella.)

CIANNELLA

1625

Che d’è? che t’aggio fatto,

Che tanto si ngrognato? tu già saje

Ca me strudo pe tte...

MENIELLO

Cierto te strude

A penzà de che muodo mm’aje da fare

O sperire, o schiattare.

LISA

1630

Ste chiacchiare non servono,

Ca se perde lo tiempo, e ll’acqua è ncanna,

Dateve mo’ la fede, nguadiateve,

E de lo riesto po faccia lo Cielo.

Ah Sia Ceccia, Sia Ceccia.

SCENA XI

CECCIA mmocca a la porta soja, e li stisse.

CECCIA

Che nc’è Lisa?

LISA

1635

Viene cca; vi’ ca frateto mo’ nguadia

Ciannella, e simmo nuje le ddestemmonie.

CECCIA

All’ora bona sia.

LISA

Priesto sbrigateve.

CIANNELLA

Lisa penzammo meglio.

MENIELLO

E si lo ddico,

Ca chesta non hà voglia; jammoncenne.

CIANNELLA

1640

Ah cano, e che cos’aje? chesto lo ddico

Pe gavetare quacche danno tujo.

LISA

Cianne’, chi troppo penza, maje non face,

Sbrigate mo’, stienne ssa mano.

CIANNELLA

Oddio,

Cossì decite vuje, cossì facc’io.

1645

Meniello mio t’azzetto pe marito.

MENIELLO

Ed io te voglio pe mogliere mia.

LISA

Ve mproseca lo Cielo.

Ceccia

Accossì sia.

MENIELLO

Ceccia va saglietenne, e non di’ niente;

1650

Sta facenna nfra nuje resta nsegreto,

Si abbesogna se scopra a luoco, e tiempo.

CIANNELLA

Sì, sì, Meniello mio, Cajenata cara

Vuoglieme bene sa.

CECCIA

Quanto cchiù pozzo,

E tu penza pe mmene,

CIANNELLA

È ppiso mio.

LISA

1655

Sbrigate Ceccia.

CECCIA

A revederce.

CIANNELLA - CECCIA

Addio. (trase Ceccia a la casa.)

CIANNELLA

Vita mia.

MENIELLO

Speranza bella.

CIANNELLA

Dice assaje.

MENIELLO

N’avè sospetto.

CIANNELLA - MENIELLO

Ma lo core int’a sto pietto

Tremma puro /

1660

E lo core int’a sto pietto.

Stia securo.

LISA

Che cos’aje?

Scumpe mo’ no cchiù Ciannella.

MENIELLO - CIANNELLA

Gioja mia non dobbetà. /

Chi lo ssape, che sarrà.

LISA

1665

Gusto, figlie, e sanetà.

CIANNELLA

Aje Meniello.

MENIELLO

Parla core.

CIANNELLA

Sta ncerviello.

MENIELLO

De che ccosa.

CIANNELLA

Non tradirme.

LISA

(Che pecciosa!)

MENIELLO

Io tradirte?

CIANNELLA

Cielo. Ammore

1670

No lassarce pe pietà.

MENIELLO

Spera sì, ng’ajutarrà.

LISA

Malaurio sciò, sciò llà. (Lisa se nne ttrase co Ciannella.)

SCENA XII

CECCIA da la casa, e po CARMOSINA.

CECCIA

Mo’, che Ciannella ha nguadiato fratemo,

E Micco n’ha perduta la speranza,

1675

Io creo, ca non sarrà cchiù tanto sgrato;

E pe chesto mo’ voglio

Farle sapè sto mbruoglio.

Fegliola non te sbrighe?

CARMOSINA

Eccome ccane.

CECCIA

St’attiento, famme buono sto servizio,

1680

Ca po te voglio dà na ziarella.

CARMOSINA

È piso mio.

CECCIA

Vattenne a la fontana llà ddereto,

E fegnenno lavà sto moccaturo,

Trattienete nzi’ a tanto,

1685

Che passa lo si Micco; nche lo vide,

Valle rente, e le di’ da parte mia,

Che mme veng’a sentire na parola.

CARMOSINA

E si chillo non passa,

Avesse da sta llà tutta la notte?

CECCIA

1690

No ca passa, e si caso non passasse

Aspetta na mez’ora, e tornatenne.

CARMOSINA

Aspetto puro n’ora; ma si zia

Strilla ca trico, e bo’ jocà le mmano

Penza tu de no mme fa toccare;

1695

Ca le dico si no, ca tu si’ stata,

Che llà me nc’aje mannata.

CECCIA

Non avè sta paura, io nce penzo.

CARMOSINA

E si Micco pe sciorta

No mmolesse venì, c’aggio da fare?

CECCIA

1700

Di’ che sta vota sulo

Me faccia sto piacere de venire,

Pecché ll’aggio da dire

Na cosa, che le mporta.

CARMOSINA

E si no mmene

Me daje la ziarella?

CECCIA

Te la donco.

CARMOSINA

1705

E già che mme la daje, dammella mone.

CECCIA

Mo’ no la tenco ncuollo.

CARMOSINA

E ba la piglia.

CECCIA

Uh comme si’ schiattosa; vavattenne

Ca mo’ saglio, e la trovo.

CARMOSINA

Tu mme gabbe.

CECCIA

Non te gabbo si affé.

CARMOSINA

Vi’ ca po ncrogno,

1710

Non te faccio mmasciate, e te sbregogno.

CECCIA

Fa chello, che buo’ tu: va bella mia,

E po lassa fa a mme.

CARMOSINA

Mo vavo.

CECCIA

O ammore.

Ch’aggio da fare pe no tradetore. (si ne trase.)

SCENA XIII

CARMOSINA sola.

CARMOSINA

Bene mio, che d’è chesto? nzo ddo’ vao,

1715

Sento parlà d’ammore, e nnammorate;

St’ammore; che cos’è, ch’è tanto doce,

E tanto cannaruto pe le ffemene?

E perché vanno morte appriesso all’uommene?

Ll’aggio spiato a zia, e mm’ha schiaffata

1720

Na mmoccata a lo musso bona bona;

Sarrà qua’ brutta cosa; ma si è brutta,

Comme pò piacè a tutte? ora va sacce,

Che mbruoglio sarrà chisto,

Ch’è tanto saporito, e tanto tristo.

1725

Quanno, quanno so’ cchiù grossa,

Pe sapè che d’è st’ammore?

Che bo’ di’ sto ssosperare,

Zenneiare a chisto, a chillo,

Fa na tossa,

1730

No resillo,

E lo ddire gioia, core,

Fato mio, mme faie morì.

Sto speruta de sapere

Comme sonco chelle ppene,

1735

Che ppatesce chi vo’ bene;

E pecché duje nnammorate,

Stanno sule, e reterate,

Non se vonno fa abbedere,

E le siente ascevolì.

SCENA XIV

MARCONE, e MENIELLO pe strata.

MARCONE

1740

Si Capetanio collecienza vosta. (comme parlasse dinto.)

Mo’ ve venco servenno. A nuje Meniello

Mo’ va la casa vi’; curre va trova

Quatt’ammice, e cca torna;

MENIELLO

Pecché nne? e chi è chillo?

MARCONE

1745

E chill’auto spagnuolo, ch’è benuto:

Io mo’ lo porto dinto a lo ciardino,

E lo faccio vedere da Ciannella

Si chisto puro è quarche mpecaiuolo;

Voglio, che tu m’aiute co l’ammice.

MENIELLO

1750

Sta ntiso

MARCONE

Viene priesto

MENIELLO

Mo’ so ccane.

A DUE

Tiemente ncopp’a n’uosso quanta cane. (lo viecchio trase pe ddo’ è asciuto, e Meniello va pe n’auta parte.)

SCENA XV

CARMOSINA, e MICCO pe strata.

CARMOSINA

E biene mo’, che d’aje, comme si’ tuosto!

MICCO

No nce pozzo venì c’aggio da fare.

CARMOSINA

Na parolella schitto, e mo’ te sbrighe.

1755

Mo’ te la chiammo.

MICCO

No lassala ire

C’aggio da fare assaje, vavattenne.

CARMOSINA

Vattenne? e chi te lassa si no mmiene.

MICCO

Tiemente, che zelletra, quanno squaglie?

CARMOSINA

E che so’ ssivo, o nzogna.

1760

Viene mo’, ch’è breogna.

MICCO

No mme fa perde tiempo, vavattenne.

CARMOSINA

Sto tiempo ch’aje perduto,

L’avarrisse sentuta;

Viene cianciuso mio, uuocchie de zingare.

MICCO

1765

Vi’ che gliannola è chesta! Mo’ non pozzo:

Va ca venco sta sera.

CARMOSINA

Sta sera nc’è lo frate e mo’ sta sola.

MICCO

E che bo’?

CARMOSINA

No lo ssaccio.

MICCO

Chist’è lotano.

CARMOSINA

N’è lotano si affé, cierto t’è utele.

MICCO

1770

Tieme’, che roffianella!

CARMOSINA

Quanto me fa sentì na ziarella.

Che d’è sta ncozzella?

No poco cchiù chiano,

Si Micco si Mi’.

1775

Si tiene l’anella

Tenimmo le mmano

Te videle bi’.

MICCO

Ch’aggio da fa co chesta, va la chiamma

Ma dille che se sbrica.

CARMOSINA

1780

Accostate cca rente.

MICCO

Va, ca vengo.

CARMOSINA

Mià, miavo; sì te lasso, te ll’alliccie.

MICCO

Vi’ che fremma nce vole, no mme parto.

CARMOSINA

Azzeccate.

MICCO

Azzeccammonce: si’ ssazia?

CARMOSINA

Obbregata a ossoria de la grazia. (tozzola la porta, ed esce Ceccia.)

SCENA XVI

MICCO, CECCIA da la porta soja, e CARMOSINA.

MICCO

1785

Ch’è squagliato Sasina, che no mmene?

Oh sia Ceccia, che nc’è? sbrigate priesto

Ca porto pressa assaje.

CECCIA

Mo’ mmo’ te sbrico

Fegliola saglie ncoppa.

CARMOSINA

E la prommessa?

CECCIA

Saglie che te la donco, vi’ che pressa!

CARMOSINA

1790

Losseria non nse nfada, ca mo’ saglio.

Già lo ssaccio, ca mo’ vao a lo pantano;

Chesto soccede a chi non tene mmano. (se ne trase.)

MICCO

Che mm’aje da di’ sbrigammoce.

CECCIA

Sì llesto,

Ciannella è mmaretata,

1795

Chesto mo’ che bo’ dire,

Tu già lo ppuò capire.

MICCO

Maretata? e co cchine? quanno? comme?

CECCIA

Co fratemo mo’ nnante, ed annascuso.

MICCO

È bella sta canzona, torn’a dire,

1800

Co fratemo mmo’ nnante, ed annascuso.

CECCIA

Che d’è tu me coffie? non lo ccride?

Aspetta n’auto ppoco, ca lo bide.

Straziame quanto vuoje

Turco de varvaria,

Chi sa sta sciorte mia,

1805

S’ha da cagnare.

MICCO

Mmentane quanto puoje,

La sgarre Ceccia mia;

No cchiù ca nteressia

Non pò durare.

CECCIA

1810

Mannaggia vene gente

Te ne faccio pentire, va scontente.

SCENA XVII

MENIELLO pe strata co gente armate de spata, e po LISA da la casa de Marcone.

MENIELLO

Mettiteve a sto pizzo, e quanno sisco

Corrite ccane.

LISA

Oh bene mio, che gusto!

Sapesse addo’ è Meniello

1815

Pe le dare sta nova, oh teccotillo.

MENIELLO

Lisa tu staje allegra, c’aje de buono?

LISA

Damme lo veveraggio.

MENIELLO

Si’ la patrona, pigliate quant’aggio.

LISA

Lo Viecchio te vo’ dinto a lo ciardino.

MENIELLO

1820

Venimmo, e pe cche fine?

LISA

Lo Spagnuolo

Ch’è benuto a la casa , è chillo propio

C’ha cresciuto Ciannella,

Essa ll’hà canosciuto, e c’anno fatto

Tutte duje p’allegrezza.

MENIELLO

Ll’aggio a gusto

1825

Ma de me che s’è ditto?

LISA

Si’ a cavallo

Co parlare, e contare s’è scopierto

Ca Ciannella è la figlia de Marcone,

Che perdie fegliolella.

MENIELLO

Che mme dice?

E Marcone ll’hà criso? n’è contento?

LISA

1830

Cierto ca ll’hà creduto a tanta signe,

Che lo Spagnuolo ll’ave date, e stace,

Ca non cape a la pelle de prejezza.

MENIELLO

Me la vo’ dare.

LISA

Sine jammo priesto

Pe lo ciardino e sentarraje lo riesto.

MENIELLO

1835

Oh Cielo, o Sciorte, o Ammore, io ve rengrazio,

Ca mme levate da tormiento, e strazio. (e traseno pe la via de lo ciardino.)

SCENA XVIII

MICCO, e SASINA da Spagnuolo pe strata.

MICCO

Bene mio comm’è bona! se credeva,

Ca songo tanto locco,

Che chella nnorchia soja, me l’agliotteva:

1840

Mmaretata Ciannella! ah a, che rrisa.

SASINA

E pecché non pò essere che sia

Fatta qua’ mmarcangegna.

MICCO

Comme si rracchio

Chi l’hà bisto, o l’hà ditto? la sia Ceccia

Ch’è parte nteressata,

1845

E borria, che sgarrasse la frettata,

Va tozzola a lo Viecchio, ca sto ccane.

SASINA

Eh Mi’ non te partire,

Chi sa che pò soccedere, ca tenco

Lo core nigro cchiù, che n’è la pece.

MICCO

1850

No mme parto, che d’aje? vi’ che pecciuso!

SASINA

Oh bonora me prode lo caruso. (s’annasconne tozzola da Marcone.)

SCENA XIX

MARCONE da lo barcone, SASINA, e MICCO de banna.

MARCONE

Chi è lloco? oh patro’ mmio, che mme commanne?

SASINA

Non save ostè, che chiero?

MARCONE

Mo’ scenno, (ed avarraje cocchie, e cocchiero.)

SASINA

1855

Mo’ scenno! jammo buono, quanto mporta

A fa lo mpertenente,

Ca te faje largo, e faje tremmà la gente.

Bene mio, che bermenara,

C’hà lo Viecchio nzemprecone.

1860

Smargiassicco,

Mpara, mpara,

Strilla, spacca, e fa pontone,

C’accossì vince lo cricco,

Che pretienne guadagnà.

1865

Viva yo da cca, e da llà.

Quantos picaros mantrones;

Che non servono pe niente

C’a comer los maccarones

E se teneno valiente,

1870

Pecché sanno sbravià.

Quanno è po l’accasione

No mmide auto, che sfelà.

SCENA XX

MARCONE da la porta soja, MENIELLO, e gente armate da la via de lo ciardino, e po CIANNELLA.

MARCONE

E eccome cca si D. Pericco; uscia,

Che mm’hà da commannare?

SASINA

E otras veses?

1875

Yo chiero la mucciaccia.

MARCONE

Uscia è patrone,

Ah Ciannella, Ciannella.

CIANNELLA

Che decite?

MARCONE

Va viestete p’ascire.

CIANNELLA

E pe cche fine.

MARCONE

Te voglio consegnare a lo Spagnuolo,

Che t’hà cresciuta, e te lassaje a fratemo.

CIANNELLA

1880

Ch’è benuto? e addov’è?

MARCONE

Che si’ cecata?

No lo vide ch’è ccane?

CIANNELLA

Addove? quale?

SASINA

(Buono pe diece, so’ arrivato a chiunzo.)

MARCONE

Chillo llà, chillo llà, si D. Pericco

Faccia favore, venca.

SASINA

Addios Segnora.

CIANNELLA

1885

Bemmenuto patrone, uscia chi site?

MARCONE

Chesta si ch’è commeddia!

MENIELLO

(Oddio, che rrisa.)

SASINA

Ostè non me canosces?

CIANNELLA

Signornone.

SASINA

Buerica mucciacca; yo t’escuso,

Pues ch’yo alla gherra, y al patimiento,

1890

Me soy mutado todo al’acqua, y al viento.

CIANNELLA

Uscia s’è mutato? ll’aggio a gusto

E chi site pe grazia?

SASINA

D. Pericco.

A chel che t’hà criada?

CIANNELLA

Chillo, che mm’hà cresciuta! uh sine, sine,

1895

Oh gnore bello mio, ah Lisa, Lisa.

SCENA XXI

LISA co na scopa mmano, e li stisse.

LISA

Che buo’ Ciannella?

CIANNELLA

Curre viene vide

Chillo, che mm’hà cresciuta.

LISA

Quale?

MARCONE

Chisto.

CIANNELLA

Mo’ è benuto da fora.

LISA

Co nzalute.

CIANNELLA

Sta tutto mporverato, scopamillo.

LISA

1900

Mo’ te servo.

SASINA

Uh mmalora, che d’è chesto? (e ba pe mmette mano a la spata, ed è tenuto da Meniello co le gente armate.)

Ah Picheros vergante, arreto, arreto.

MENIELLO

Ah frabotto si’ muorto, non te movere.

MARCONE

Afferratelo buono, ed attaccatelo,

Ca mo’ chiammo la corte

SASINA

Ohimmè so’ ghiuto

1905

Ah si Micco, ah si Micco, ajuto, ajuto.

SCENA XXII

CECCIA mmocc’a la porta soja, po CARMOSINA co na scopa, e li stisse.

CECCIA

Uh maramene fratemo s’appicceca

Va Carmosina curre,

E portame na mazza.

MENIELLO

Non te movere cano, ca te scicco

1910

Ssi pile a sso mostaccio.

MARCONE

Ed io te spenno... (Meniello va pe tterarle lo mostaccio, e Marcone p’afferrarle li capille e le veneno mmano, ed è canosciuto pe Sasina.)

MENIELLO

Oh bonora ch’è chesto!

MARCONE

Ah frabbuttone.

Tu si’.

SASINA

Io so’.

CARMOSINA

Te piglia chesta.

CECCIA

Tiene. (cca Carmosina vo’ dare la scopa a Ceccia, ed essa nce la fa tenere.)

MARCONE

E mbe’ che mbroglia è chesta?

SASINA

Faccio mascare.

MENIELLO

Faje mascare guittone, mo’ t’agghiusto

1915

Crepatelo de mazze tutte doje. (dice a Lisa e Carmosina.)

Confessa ch’è sta mbroglia.

CARMOSINA

Schiavo Si D. Pericco. (e le dà na mazzata.)

SASINA

Chiano, ca mo’ confesso aje Micco Micco.

SCENA URDEMA

MICCO co la spata sfodarata mmano, e li stisse.

MICCO

Che remmore nc’è lloco? che cos’aje?

SASINA

1920

Che boglio avè mmalora, ca so’ acciso

Pe ccaosa toja, m’hanno già scopierto.

MICCO

E si pate pe mme io te defenno:

Chiano Segnure mieie; non sia nullo,

Che dia fastidio a lo guarzone mio,

1925

Ca m’accido co tutte; che v’ha fatto?

MARCONE

Che boleva fa cchiù? lo frabuttone

Stravestuto spagnuolo

Volea levarme figliema.

MICCO

Qua figlia

Si tu non aje?

MARCONE

Ll’aggio, ed è Ciannella,

1930

Ch’aggio scopierto, ed era Popa mia.

MICCO

Che sento? comme? quanno? chesta è mbroglia

MARCONE

O sia mbruoglio, o arravuoglio tu che buoje.

MICCO

Pretenno ssa fegliola pe mogliere.

MARCONE

Va lavate le mmano, è mmaretata.

MENIELLO

1935

Ed io so’ lo marito.

LISA

E conzalute.

MICCO

Tu marito! Ah Ciannella t’aggio perzo...

SASINA

Arremmedia a sti guaje co la bonora;

Levame da ste mazze

Ca po te miette a fa ssi parasiseme?

MICCO

1940

Lassatelo pe grazia; cca so’ io,

Che corpo a chesta mbroglia, a me accedite

E già miezo juto;

Ca le speranze meje, aggio perduto.

MENIELLO

È tiempo d’allegrezza,

1945

Le sia fatta la grazia... lassa telo.

LISA

Aspe’ quanto le donco na mazzata,

C’arrobà me voleva lo ffelato.

SASINA

Lassateme bonora

Ca che chesta me spestella.

CARMOSINA

1950

Curre zia.

LISA

Curre tu

SASINA

Ah ghianarella. (Sasina fuje, Carmosina lo secuta, e traseno.)

MARCONE

Orsù venimmo a nuje. Micco te scuso

Ca l’arrure p’Ammore,

So’ compatute; e digne de perduono;

Arrecettate mone, e si non simmo

1955

Pariente siammo ammice; e tu Meniello

Giacch’io t’aggio attesa la parola,

Attocca puro a ttene,

Attenerme la toja co darme Ceccia...

Che d’è no mme respunne?

MENIELLO

Io so’ pronto.

1960

Accordat’essa, e nguadiatella.

MICCO

(Oimmene.

Chist’auto guajo.)

MARCONE

Ceccia è tutta mia.

Io già sonco a cavallo; n’è lo vero. (a Ceccia.)

MICCO

Ah Ceccia, vi’ che faje: io t’allecordo

Li patte nfra de nuje.

MARCONE

Che sso’ ssi patte?

CECCIA

1965

Me l’allecordo sì fauzario sgrato,

E si be’ no mmierete, l’attenno

Frate mio giacché buoje, ch’io me mmarita

Co chi me sia de genio; mo’ te dico (a Meniello.)

Co Micco, ed io stammo co n’accordio

1970

De nguadejarce nziemo

Quanno tu te nzorave;

Tu già si’ nguadiato co Ciannella,

Ed io me nguadio Micco. (cca esce Carmosina, s’accosta a lo viecchio, e dice:)

CARMOSINA

E tu Messere alliscia sto palicco. (e le dà la scopa.)

MARCONE

1975

Bonora a che ghiocammo?

A chi se sose nnanze; e già ch’è chesto,

Anticepo lo tiempo, oje Lisa siente,

Azzò che non me sia fatta la baja,

Crisceme chesta tu pe la vecchiaja.

CARMOSINA

1980

Non te peglià fastidio core mio,

Ca nnanze arrunchie tu, che cresco io.

LISA

Via su, ch’è notte, jammoncenne dinto

Venca a gaudè chi pote, e chi no aspetta.

SASINA

È notte sì ca canta sta cevetta. (esce da dinto.)

LISA

1985

E co no tuono vascio,

Face cù, cù, e me responne st’ascio.

MENIELLO - CIANNELLA - MICCO - CECCIA a 4.

Notte cara fortunata

Bello juorno si pe mme.

MARCONE

Singhe sempe nommenata

1990

Cana figlia mm’aje...

LISA - CARMOSINA

Ca na Mbroglia nc’aje Scoperta.

TUTTE

Pe nce fa tutte gaudè.

SASINA

Che bell’aglie vi’ che nzerta.

Pe sta mbroglia tocca mme.

TUTTE

1995

Pe sta mbroglia tocca a tte.